Salelá mwa buku “Maloba ya ebandeli mpo na Liloba ya Nzambe” mpo na kobanda lisolo
1. Esaleli nini ya sika tozwaki mpo na mosala ya kosakola?
1 Biblia Libongoli ya Mokili ya Sika na Lingelesi oyo ebongisami lisusu ezali na eteni moko oyo elobi: “Maloba ya ebandeli mpo na Liloba ya Nzambe.” Makambo oyo ezali na eteni yango ebimaki na mwa buku moko na liyangani ya etúká “Kobá koluka liboso Bokonzi ya Nzambe!” Ndenge nini tokoki kosalela esaleli wana ya sika ntango tozali kobongisa masolo etali mosala ya kosakola? Lokola mwa buku yango ezali na bavɛrsɛ na nse ya masolo ndenge na ndenge ya Biblia, ekoki kosalisa mpenza mpo na kobanda masolo kaka ndenge buku Ndenge ya kosolola esalisaka.
2. Ndenge nini tokoki kosalela mwa buku “Maloba ya ebandeli mpo na Liloba ya Nzambe” na mosala ya kosakola?
2 Okoki kosalela motuna 8 mpe koloba boye: “Tozali kotala bato ya kartye na miniti moke mpo bato mingi bazali komituna ete: ‘Esengeli kopesa Nzambe foti mpo na bampasi ya bato?’ [Na bateritware mosusu, ezalaka malamu kolakisa moto motuna.] Yo, okanisi nini? [Tiká ye apesa eyano.] Biblia epesi eyano ya malamu na motuna wana.” Tángá mbala moko na Biblia vɛrsɛ to bavɛrsɛ oyo maloba na yango etyami wana mpe limbolá yango. Soki moto yango asepeli, okoki kolakisa ye mituna 20 oyo elandani na mwa buku yango mpe kosɛnga ye apona moko oyo bokotalela na mbala ya nsima. To mpe, okoki kopesa ye moko ya mikanda oyo toyekolaka na bato, oyo elimboli mpenza lisolo oyo bouti kotalela.
3. Ndenge nini tokoki kosalela mwa buku “Maloba ya ebandeli mpo na Liloba ya Nzambe” mpo na kobanda masolo na bateritware oyo bato bazali na mangomba ya bokristo te?
3 Motuna 4 mpe 13 tii 17, ekoki kosalisa mpenza ntango tozali kosakola na bateritware oyo bato bazali na mangomba ya bokristo te. Na ndakisa, okoki kosalela makambo oyo ezali na motuna 17 mpe koloba: “Tozali kotala bato na mwa miniti moke mpo na kosolola makambo etali mabota. Omoni te ete lelo oyo mabota ezali kokutana na mikakatano ebele? [Tiká ye apesa eyano.] Babalani mingi bamoni ete maloba oyo ya bwanya esalisaka bango: “Mwasi asengeli kozala na limemya makasi mpo na mobali na ye.” [Ezali na ntina te oloba ete maloba yango euti na Baefese 5:33. Soki ozali kosolola na mwasi, okoki kozongela maloba ya Baefese 5:28.] Okanisi ete kosalela toli wana ekoki kosalisa na kati ya libala?”
4. Okoki kosala nini na nsuka ya lisolo elongo na moto oyo azali na lingomba ya bokristo te?
4 Na nsuka, yokaná na moto yango mpo bókoba lisolo mokolo mosusu. Bokoki koyokana mpo bólobela moko ya bavɛrsɛ oyo ezali na nse ya motuna oyo botalelaki. Na ntango oyo ebongi, yebisá moto yango ete maloba ya bwanya oyo ozalaki koyebisa ye euti na Biblia. Na kotalela masolo na bino ya mbala eleki mpe ndenge oyo atalelaka Biblia, pesá ye mokanda moko oyo omoni ete ekosepelisa ye.—Talá siplema ya Mosala na biso ya Bokonzi ya sanza ya zomi na mibale 2013.