BOMOI YA BAKRISTO

Kosakola mpe koteya ezali na ntina mingi mpo na kokómisa bato bayekoli

Yesu atindaki bayekoli na ye bákende mpe bákómisa bato bayekoli. (Mt 28:19) Yango esɛngi kosakola mpe koteya. Mbala na mbala, tosengeli komituna boye: ‘Ndenge nini nakoki kobongisa lisusu lolenge na ngai ya kosakola mpe koteya oyo ezali na ntina mingi mpo na kokómisa bato bayekoli?’

KOSAKOLA

Na esika tózela ete bato báya epai na biso, tosengeli kokende koluka ‘baoyo babongi.’ (Mt 10:11) Ntango tobimaka na mosala ya kosakola, tosalelaka libaku nyonso mpo na kosolola na bato oyo ‘bazali wana’? (Mis 17:17) Lidia akómaki moyekoli mpo ntoma Paulo asakolaki na molende.—Mis 16:13-15.

Ndeko Samuel azali kopesa Ezekiel zulunalo; ndeko Solomon ná Mary bazali kosakwela Ezekiel ná Abigail — “Na ntɔngɔ, loná mboto na yo mpe tii na mpokwa kopemisa lobɔkɔ na yo te” (Mos 11:6)

TALÁ VIDEO KOBÁ KOSAKOLA “KOZANGA KOTIKA”—LITATOLI YA LIBAKU MALAMU MPE NDAKO NA NDAKO, MPE NA NSIMA YANOLÁ NA MITUNA OYO:

Na bomoi na ye ya mokolo na mokolo, ndenge nini ndeko Samuel amonisaki ete azalaki koluka na molende nyonso kolona mboto ya solo?
Mpo na nini tosengeli kokoba kosakola na mitindo nyonso?
Na misala na yo ya mokolo na mokolo, okoki kosakwela nani nsango ya Bokonzi?

KOTEYA

Mpo tókómisa bato bayekoli, tosengeli kosuka kaka te na kotikela bango mikanda. Tosengeli kozongelaka bango mpe koyekolaka na bango Biblia mpo tósalisa bango bákola na elimo. (1Ko 3:6-9) Kasi, bongo soki milende na biso mpo na koteya moto moko solo ya Bokonzi ezali mpenza kobimisa matomba te? (Mt 13:19-22) Tosengeli kokoba koluka baoyo mitema na bango ezali lokola “mabele ya malamu.”—Mt 13:23; Mis 13:48.

Ndeko Solomon ná Mary bazali koyekola Biblia na Ezekiel ná Abigail; Ezekiel ná Abigail bazali kopesa litatoli na bisika ya bato nyonso — “Ngai nalonaki, Apolosi amwangisaki mai, kasi Nzambe azalaki kokolisa” (1Ko 3:6)

TALÁ VIDEO KOBÁ KOSAKOLA “KOZANGA KOTIKA”—NA BISIKA YA BATO EBELE MPE KOKÓMISA BATO BAYEKOLI, MPE NA NSIMA YANOLÁ NA MITUNA OYO:

Ndenge nini ndeko Solomon ná Mary bamwangisaki mai na mboto ya solo na mitema ya Ezekiel ná Abigail?
Mikano na biso esengeli kozala nini mpo na mitindo nyonso ya mosala ya kosakola, ezala mpe kopesa litatoli na bisika ya bato ebele?
Ndenge nini tokoki kotya likebi mingi lisusu na likambo ya koteya basusu solo?