Libala ezali mpo na bomoi mobimba

Mabala ya bakristo oyo ezali kotambola malamu ekumisaka Yehova mpe epesaka mwasi ná mobali esengo. (Mr 10:9) Mpo libala eumela mpe ezala na esengo, mokristo asengeli kosalela mitinda ya Biblia ntango azali kopona moto akobalana na ye.

Ezali malamu kolingana na moto kaka nsima ya kolekisa “eleko ya ebandeli ya bolenge,” eleko oyo bamposa ya kosangisa nzoto ezalaka makasi mpe ezalaka pɛtɛɛ te kozwa bikateli oyo ebongi. (1Ko 7:36) Salelá na mayele bonzemba na yo mpo na kokómisa boyokani na yo ná Nzambe makasi mpe mpo na kokolisa bizaleli ya bokristo. Soki osali bongo, okozala na likoki ya kosala ete libala na yo ezala ya esengo.

Liboso ozwa ekateli ya kobalana na moto moko, ezali na ntina ozwa mpenza ntango ya koyeba ‘bomoto oyo ebombaná na motema’ ya moto yango. (1Pe 3:4) Mpe soki obandi komona mwa makambo ya malamu te epai ya moto yango, bósolola yango mbala moko. Kaka ndenge ezalaka na boninga, mwasi ná mobali basengeli kotya makanisi mingi na makambo oyo mokomoko akoki kosalela moninga kasi te na oyo moninga asengeli kosalela ye. (Flp 2:3, 4) Soki osaleli mitinda ya Biblia liboso opona moto oyo okobalana na ye, ekozala mpasi te okoba kosalela yango ata na nsima ya libala na bino. Mpe yango ekosala ete bózala na libala ya esengo.

TALÁ VIDEO KOMIBONGISA MPO NA LIBALA​—ETENI 3: ‘LUKÁ KOYEBA MOSOLO OYO YANGO EKOSENGA,’ NA NSIMA YANOLÁ NA MITUNA OYO:

• Ndeko mwasi oyo ná Shane makambo na bango ezalaki kotambola ndenge nini na ebandeli?

• Makambo nini amonaki ntango akómaki koyeba Shane malamu?

• Ndenge nini baboti na ye basalisaki ye, mpe ekateli nini azwaki?