BOMOI YA BAKRISTO

Salisá bato oyo basambelaka ata na lingomba moko te báluka koyeba Mozalisi na bango

Ekómelaka yo okakatana kopesa litatoli epai ya bato oyo basambelaka ata na lingomba moko te, mpe okanisaka ete bakoyoka te? Soki bongo, kobosana te ete bato mingi oyo bazalaki kosambela ata na lingomba moko te, ezala mpe bato oyo bazalaki kondima te ete Nzambe azalaka, bakómaki Batatoli ya Yehova. Mbala mingi, bazalaki kaka na mposa ete moto moko asalisa bango bámona bilembeteli oyo emonisi ete Nzambe azalaka.—Ro 1:20; 10:14.

TALÁ VIDEO BATO OYO BAZANGI KONDIMA BAKOKI KOKÓMA NA KONDIMA!—BATO OYO BASAMBELAKA ATA NA LINGOMBA MOKO TE, MPE NA NSIMA YANOLÁ NA MITUNA OYO:

Ndenge nini ndakisa ya Tommaso esalisi yo ozala na likanisi malamu mpo na kopesa litatoli epai ya bato oyo basambelaka ata na lingomba moko te?

Eyano na yo

Ndenge ya kosala yango

Soki moto moko alobi ete andimelaka Nzambe te, zalá na boboto, salelá mayele, mpe tyá likebi na makanisi mpe mayoki na ye mpo na likambo yango. (2Ti 2:24) Lobelá makambo oyo ekobenda likebi na ye. Azali kosepela mpo bólobela bilembeteli oyo etindi bato mingi bándima ete Mozalisi moko azali? Soki ezali bongo, salelá mikanda mpe bavideo oyo ebongisami mpo na likambo yango. Mwa buku La vie a-t-elle ete créée ? mpe Cinq questions à se poser sur l’origine de la vie ebakisami na kati ya bisaleli na biso mpo na koteya mpo tómona yango kozanga mindɔndɔ.

Na ebandeli, okoki kobanga kosolola na moto oyo andimelaka Nzambe te. Yango wana, ekozala malamu osɛnga lisalisi epai ya mosakoli oyo amesaná kosakola. Kobosana mpe te ete Yehova akoki kosalisa biso tósimba mitema ya baoyo bazali na ezaleli oyo ebongi, ata soki na ebandeli bandimaka te ete ye azalaka.—Mis 13:48.