Tokoki kotika ezaleli ya koyina basusu!

Soki bayiná yo naino te, ntango mosusu omoná ndenge bazali koyina moto mosusu. Mbala mingi, tomonaka ndenge bazali konyokola bato mpo bautá na mboka mosusu, bazali bato ya loposo mosusu to mpo basangisaka nzoto mibali na mibali to basi na basi. Yango wana, baguvɛrnema mingi ezali kobimisa mibeko mpo na kopesa etumbu ya makasi na baoyo bazali konyokola etuluku moko boye ya bato.

Mbala mingi, bato oyo bayinami, na ngala na bango mpe bayinaka bato oyo bazali koyina bango. Mpe mbala na mbala basalelaka bango makambo mingi ya mabe.

Ntango mosusu basilá kokanisela yo mabe, kotalela yo na ndenge moko boye, kotyola yo, kofinga yo, mpe konyokola yo. Kutu, koyina ekendaka mosika mpenza. Mbala mingi etindaka na kobɛta bato, kosalela bango makambo ya mabe, koyiba biloko na bango, koboma bango, to mpe koboma etuluku moko boye ya bato na likanisi ya kosilisa bango.

Zulunalo oyo ekopesa biyano na mituna oyo elandi mpe ekomonisa ndenge ya kotika koyina basusu:

• Mpo na nini bato bazali koyinana mingi boye?

• Ndenge nini koyinana ekoki kosila?

• Ezali na ntango oyo koyinana ekosila mpo na libela?