Oyo Biblia eyebisi biso mpo na Mobandisi na yango

1. Mpo na nini tozali na botɔndi mpo na Biblia?

TOZALI mpenza na botɔndi mingi epai ya Yehova mpo na Biblia! Na kati ya Biblia, apesi biso batoli ya bwanya oyo ekoki kosalisa biso tózala na esengo mpe na kimya ntango tozali na mitungisi. Apesi biso lisusu elikya ya kitoko mpo na mikolo ezali koya. Oyo eleki ntina, Yehova akomisaki Biblia mpo na komonisa biso makambo mingi oyo etali bomoto na ye. Ntango tozali komanyola na bizaleli kitoko oyo Nzambe azali na yango, mitema na biso etondaka na esengo mpe tolingaka kokóma baninga na ye.​—Nz. 25:14.

2. Na ndenge nini Yehova amimonisaki epai ya bato?

² Yehova alingi ete bato na ye báyeba ye. Na kala, amimonisaki epai ya basaleli na ye na nzela ya bandɔtɔ, bimonaneli, mpe atindaki baanzelu bápesa basusu bansango. (Mit. 12:6; Mis. 10:3, 4) Kasi, ndenge nini bandɔtɔ, bimonaneli, mpe bansango yango ekokaki kotángama soki ekomamaka te? Yango wana, Yehova aponaki mibali mpo na ‘kokoma na buku’ makambo oyo alingi ete biso tóyeba. (Yir. 30:2) Tokoki kozala na kondima ete lolenge wana ya kosolola na biso eleki malamu mpe ezali na litomba mpamba te “nzela ya Nzambe ya solo ezali ya kokoka.”​—Nz. 18:30.

3. Yehova asalaki nini mpo Biblia ebatelama tii lelo oyo? (Yisaya 40:8)

³ Tángá Yisaya 40:8. Banda bankóto ya bambula, Liloba ya Nzambe ezali kopesa basaleli na ye litambwisi ya malamu mpenza. Ndenge nini yango ekoki kosalema? Makomami ekomamaki kala na biloko oyo ebebaka, na yango mokanda moko te ya ebandeli ezali tii lelo oyo. Kasi Yehova asalaki ete bato básala bakopi ya Makomi mosantu. Atako bato oyo basalaki bakopi bazalaki bato ya kozanga kokoka, bazalaki mpenza ekɛngɛ. Na ndakisa, na kotalela Makomami ya Ebre, moto moko ya mayele akomaki ete: “Tozali na kondima ete buku moko te ya kala ebatelamaki malamu koleka Makomami Mosantu.” Atako Biblia ekomamaki bambula mingi liboso mpe bato oyo basalaki bakopi na yango bazalaki bato ya kozanga kokoka, tokoki kozala na kondima ete makambo oyo ekomami na Biblia oyo totángaka lelo oyo ezali komonisa makanisi ya Mobandisi na yango, Yehova.

4. Tokoyekola nini na lisolo oyo?

⁴ “Likabo nyonso ya malamu mpe libonza nyonso oyo ekoki” Yehova nde apesaka biso yango. (Yak. 1:17) Biblia ezali likabo moko kitoko oyo Yehova apesá biso. Ntango moto moko apesi yo likabo to kado, yango emonisaka ete moto yango ayebi yo malamu mpe ayebi bamposa na yo. Ezali mpe bongo mpo na Mopesi ya Biblia. Ntango totalelaka malamumalamu likabo yango, tóyekolaka makambo mingi oyo etali Yehova. Tomonaka ete Yehova ayebi biso malamu mpe ayebi bamposa na biso. Na lisolo oyo, tokoyekola ndenge oyo Biblia elobeli bizaleli misato ya Yehova: bwanya na ye, bosembo na ye, mpe bolingo na ye. Tiká tólobela naino ndenge oyo Biblia emonisaka bwanya ya Yehova.

BIBLIA EMONISAKA BWANYA YA NZAMBE

5. Wapi lolenge moko oyo Biblia emonisaka bwanya ya Nzambe?

⁵ Yehova ayebi ete tozalaka na mposa ya toli na ye ya bwanya. Mpe Biblia, likabo oyo apesá biso, etondi mpenza na bwanya. Toli ya Biblia ezali kosalisa bato mingi. Biblia ebongolaka bomoi ya bato. Ntango Moize akomaki babuku ya liboso ya Biblia, ayebisaki basaleli ya Nzambe, Bayisraele boye: “Liloba oyo ezangi ntina te mpo na bino, kasi ezali nde bomoi na bino.” (Mib. 32:47) Baoyo batosaki makambo oyo Makomami elobi, bakokaki kolonga na bomoi mpe kozala na esengo. (Nz. 1:2, 3) Atako Biblia ekomamaki eleki sikoyo bambula mingi, ezali na nguya ya kobongola bomoi ya bato. Na ndakisa, na jw.org, na molɔngɔ ya masolo “Biblia ebongolaka bato” okokuta bandakisa ya masolo ya mikolo na biso koleka 50 oyo emonisi ndenge Biblia ezalaka na nguya mpe ndenge esalaka ‘mosala na kati ya bandimi [na yango]’ lelo oyo.​—1 Tes. 2:13.

6. Mpo na nini tokoki koloba ete Biblia ekokani te na babuku mosusu?

⁶ Buku moko te ekokani na Liloba ya Nzambe. Mpo na nini? Mpamba te Mobandisi na yango, Yehova Nzambe, azali seko na seko mpe azali na bwanya koleka moto nyonso. Babuku mingi mosusu ekobaka kotángama ata nsima ya liwa ya moto oyo akomaki yango, kasi nsima ya bantango batoli na yango esilaka ngala. Kasi mitinda ya bwanya oyo ezali na Biblia ezali mpo na seko; yango emonani na ndenge esalisi bato ya bileko nyonso. Ntango tozali kotánga Makomi mosantu mpe komanyola na makambo oyo tozali koyekola, Mobandisi na yango asalelaka nguya ya elimo santu na ye mpo na kosunga biso tómona ndenge oyo tokoki kosalela batoli ya Biblia na bomoi na biso. (Nz. 119:27; Mal. 3:16; Ebr. 4:12) Ya solo, Mobandisi ya Biblia azali na mposa makasi ya kosalisa biso. Yango esengeli kotinda biso tótángaka Biblia mokolo na mokolo!

7. Ndenge nini Biblia esangisaki basaleli ya Nzambe na ntango ya kala?

⁷ Eloko mosusu oyo emonisi ete Biblia ezali na bwanya ya Nzambe ezali ndenge esalisaka basaleli ya Nzambe bázala na bomoko. Ntango Bayisraele bakɔtaki na Mokili ya Ndaka, bafandaki na bisika ndenge na ndenge. Bamoko bazalaki balɔbi-mbisi, bamosusu bazalaki kobɔkɔla bibwele, mpe bamosusu bazalaki kosala bilanga. Ekokaki kozala mpasi te mpo Bayisraele oyo bazalaki kofanda na esika moko bázanga kotyela Bayisraele oyo bazalaki kofanda na esika mosusu likebi. Kasi Yehova azwaki bibongiseli mpo ete Bayisraele bakutanaka na mabaku ndenge na ndenge mpo na koyoka botángi mpe ndimbola ya Liloba na ye. (Mib. 31:10-13; Neh. 8:2, 8, 18) Meká komona na makanisi ntango Moyisraele moko ya sembo ayei na Yerusaleme mpe mbala mosusu amoni bamilio ya bandeko na ye oyo bauti na bisika ndenge na ndenge mpo na kosambela! Na ndenge yango Yehova asalaki ete basaleli na ye bázala na bomoko. Na nsima, ntango lisangá ya bokristo esalemaki, yango ezalaki na basi mpe mibali oyo bazalaki koloba minɔkɔ ndenge na ndenge mpe baoyo bautaki na mimeseno ekeseni oyo na kati na bango bamosusu bazalaki bazwi mpe bamosusu babola. Kasi lokola bazalaki kolinga Makomami mingi, bazalaki kosambela Nzambe ya solo na bomoko. Baoyo bakómaki bandimi bakokaki kokanga ntina ya Liloba ya Nzambe kaka na nzela ya lisalisi ya bandeko na bango bakristo mpe koyanganaka elongo na bango.​—Mis. 2:42; 8:30, 31.

8. Ndenge nini Biblia esangisaka basaleli ya Yehova lelo oyo?

⁸ Na nzela ya Biblia, Nzambe na biso ya bwanya azali kokoba koteya mpe kosangisa basaleli na ye. Mateya nyonso ya solo oyo tosengeli koyeba mpo na Yehova ezali na kati ya Biblia. Toyanganaka mbala na mbala elongo na makita ya lisangá, na mayangani ya mike mpe ya minene. Kuna bátángelaka biso Biblia, bálimbolaka mpe bálobelaka yango. Biblia ezali esaleli moko ya ntina mingi oyo Yehova asalelaka mpo na kosalisa basaleli na ye “básalela ye na bomoko.”​—Sef. 3:9.

9. Na kotalela Luka 10:21, ezaleli nini ezali na ntina mpo moto akanga ntina ya mateya ya Biblia?

⁹ Tótalela likambo mosusu oyo emonisi bwanya ya Yehova. Akomisaki biteni mingi ya Makomami mpo kaka bato ya komikitisa nde bákanga ntina na yango ntango bazali kotánga. (Tángá Luka 10:21.) Bisika nyonso bato bátángaka Biblia. Moto moko ya mayele alobi ete: “Biblia ezali buku oyo bato mingi bátángaka koleka babuku mosusu nyonso, mpe bátángaka yango na likebi mingi koleka.” Kasi kaka bato ya komikitisa nde bákangaka ntina na yango mpe básalelaka makambo oyo elobaka.​—2 Ko. 3:15, 16.

10. Wapi lolenge mosusu oyo Biblia emonisi bwanya ya Nzambe?

¹⁰ Tososolaka mpe bwanya ya Yehova na Biblia na lolenge mosusu. Yehova asalelaka kaka te Makomami mpo na koteya biso lokola etuluku kasi mpe kolakisa mpe kobɔndisa mokomoko na biso. Ntango tótángaka Liloba ya Yehova tokoki komona ete atyelaka mokomoko na biso likebi. (Yis. 30:21) Ntango okutani na mokakatano moko, na ntembe te ekómelaka yo otánga vɛrsɛ moko ya Biblia mpe omona ete makambo yango ekomamaki mpenza mpo na yo. Ya solo, Biblia ekomamaki mpo ete bamilio ya bato bákanga ntina na yango. Nini esalaka ete Biblia ezala na makambo oyo esilaka ngala te mpe oyo osengeli na yango na ntango moko ya sikisiki? Ezali bongo mpo moto oyo akomisaki Biblia azali Moto oyo aleki na bwanya na molɔ́ngɔ́ mobimba.​—2 Tim. 3:16, 17.

BIBLIA EMONISAKA BOSEMBO YA NZAMBE

11. Ndenge nini Nzambe amonisi ete aponaka bilongi te ntango Biblia ezalaki kokomama?

¹¹ Bosembo ezali ezaleli mosusu ya Yehova. (Mib. 32:4) Bosembo etambolaka nzela moko na kozanga kopona bilongi, mpe Yehova aponaka bilongi te. (Mis. 10:34, 35; Rom. 2:11) Ndenge oyo Yehova aponaka bilongi te emonani na ndenge asalaki ete Biblia ekomama na minɔkɔ oyo bato mingi bazalaki koloba na ntango wana. Babuku 39 ya liboso ya Biblia ekomamaki mingimingi na monɔkɔ ya Ebre, oyo ezalaki mpasi te mpo basaleli ya Nzambe ya ntango wana bákanga ntina na yango. Nzokande, na siɛklɛ ya liboso ya T.B, bato mingi bazalaki koloba monɔkɔ ya Grɛki, yango wana mikanda 27 ekomamaki na monɔkɔ yango. Yehova alingaki te ete Liloba na ye ekomama kaka na monɔkɔ moko. Lelo oyo bato pene na milio mwambe balobaka minɔkɔ ndenge na ndenge. Ndenge nini bato mingi wana bakoki koyekola makambo etali Yehova?

12. Wapi mwa makambo oyo esali ete Danyele 12:4 ekokisama na mikolo oyo ya nsuka?

¹² Na nzela ya mosakoli Danyele, Yehova alakaki ete na eleko ya nsuka, “boyebi ya sikisiki” oyo ezali na Biblia “ekokóma mingi.” Bato mingi bakokanga ntina na yango. (Tángá Danyele 12:4.) Mosala ya kobongola, ya kobimisa mpe kokabola Biblia mpe mikanda oyo elimbolaka yango, ezali mwa makambo oyo esali ete boyebi yango ekóma mingi. Biblia ezali mokanda oyo ebongolami mpe ekabolami koleka mikanda mosusu na mokili. Mbala mingi, mabongoli mosusu ya Biblia oyo bato ya mombongo babimisaka ezalaka ntalo mingi. Basaleli ya Yehova babongoli Liloba ya Nzambe mingi mpenza, ezala na mobimba to na ndambo na yango na minɔkɔ koleka 240, mpe bato bakoki kozwa yango ofele. Yango ezali kosala ete, bato ya bikólo nyonso bandima “nsango malamu oyo ya bokonzi” liboso ete nsuka eya. (Mat. 24:14) Nzambe na biso ya sembo alingi kopesa bato nyonso libaku ya koyeba ye na kotángaka Liloba na ye. Ezali mpo alingaka biso nyonso mingi mpenza.

BIBLIA EMONISAKA BOLINGO YA NZAMBE

13. Na kotalela Yoane 21:25, mpo na nini tokoki koloba ete Biblia emonisaka bolingo ya Yehova?

¹³ Biblia esalisaka biso tómona ete bolingo ezali ezaleli ya Yehova oyo eleki bizaleli na ye nyonso. (1 Yoa. 4:8) Tótala makambo oyo Yehova akomisaki na Biblia mpe oyo akomisaki te. Apesá biso oyo tosengeli na yango mpo tózala na boyokani ya malamu na ye, tózala na bomoi ya esengo sikoyo mpe mpo tózwa bomoi ya seko. Nzokande, lokola Yehova alingaka biso, ayebisi biso te makambo nyonso ya mikemike oyo tosengeli na yango mpo na kosalela ye.​—Tángá Yoane 21:25.

14. Na lolenge nini mosusu makambo oyo ezali na Biblia emonisaka ete Nzambe alingaka biso?

¹⁴ Yehova amonisaka mpe bolingo na ye na ndenge alobaka na biso na lolenge oyo emonisaka ete apesaka biso lokumu. Na Biblia, Yehova apesá biso te liste ya mibeko ebeleebele, ayebisá biso mpe te na bosikisiki oyo tosengeli kosala to te na makambo nyonso ya bomoi na biso. Kasi, asalelaka bandakisa ya makambo oyo esalemá, bisakweli ya kokamwa, mpe batoli oyo ebongi mpo na kosalisa biso tózwa bikateli ya malamu. Na ndenge yango, Liloba ya Nzambe etindaka biso tólinga ye mpe tótosa ye na motema na biso mobimba.

15. (a) Ndenge nini Yehova amonisi ete atyelaka bato oyo batángaka Liloba na ye likebi? (b) Na elilingi, lisolo nini ya bato oyo Biblia elobeli, elenge mwasi oyo, ndeko mobali oyo mpe ndeko mwasi oyo ya mobange bazali komanyola likoló na yango? (Eba. 39:1, 10-12; 2 Bak. 5:1-3; Luka 2:25-38)

¹⁵ Biblia emonisi ete Yehova atyelaka biso mpenza likebi. Na ndenge nini? Liloba na ye etondi na masolo oyo emonisaka mayoki oyo bato bazalaka na yango. Tokoki kokanga ntina ya mayoki ya bato oyo Biblia elobeli mpamba te bazalaki bato “lokola biso.” (Yak. 5:17) Oyo eleki ntina, soki totali makambo oyo Yehova asalelaka bato lokola biso, yango ekosalisa biso tómona polele ete “Yehova azali na bolingo mingi ya motema mpe amonisaka motema mawa.”​—Yak. 5:11.

16. Na kotalela Yisaya 55:7, tóyekolaka makambo nini mpo na Yehova ntango totángaka na Biblia masolo ya bato oyo basalaki mabunga?

¹⁶ Biblia emonisi bolingo ya Yehova mpo na biso na ndenge mosusu. Makomami endimisi biso ete Nzambe na biso akosundola biso te ata soki tosali mabunga. Bayisraele basalelaki Yehova lisumu mbala na mbala; atako bongo, ntango babongolaki motema Nzambe alimbisaki bango. (Tángá Yisaya 55:7.) Bakristo ya siɛklɛ ya liboso mpe bamonaki ndenge Nzambe azalaki kolinga bango. Na litambwisi ya elimo ya Nzambe, ntoma Paulo alendisaki bandeko na ye bakristo ‘bálimbisa mpe bábɔndisa’ moto oyo asalaki lisumu ya monene kasi na nsima abongolaki motema. (2 Ko. 2:6, 7; 1 Ko. 5:1-5) Ezali polele ete Yehova asundolaka te basambeli na ye kaka mpo basali lisumu moko ya monene. Kasi, na bolingo mpenza asalisaka bango, apesaka bango disiplini, mpe asɛngaka bango bázongela boninga elongo na ye. Alaki kosala mpe bongo mpo na basumuki nyonso oyo bazali kobongola motema lelo oyo.​—Yak. 4:8-10.

ZWÁ NA MOTUYA LILOBA YA NZAMBE OYO EZALI “LIKABO YA MALAMU”

17. Mpo na nini Biblia ezali likabo moko ya ntina mingi?

¹⁷ Yehova apesá biso likabo ya kitoko mpenza. Mpo na nini Liloba na ye ezali na ntina mingi? Ndenge tomoni yango, Biblia emonisaka bwanya, bosembo mpe bolingo ya Nzambe. Buku yango emonisi ete Yehova alingi tóyeba ye. Alingi ete tókoma baninga na ye.

18. Ndenge nini tokoki komonisa ete tozali na botɔndi mpo na Biblia “likabo ya malamu” oyo Yehova apesá biso?

¹⁸ Tóbosana te ete Liloba ya Nzambe ezali “likabo ya malamu”. (Yak. 1:17) Tiká ete tókoba komonisa botɔndi mpo na yango. Tokoki kosala bongo soki tozali kotánga mpe komanyola yango. Soki tozali kosala bongo, tokoki komindimisa ete Mobandisi na yango akopambola milende na biso mpe “tokozwa boyebi ya Nzambe.”​—Mas. 2:5.