Zabolo azalaka mpenza ndenge nini?

Eyano ya Biblia

Zabolo azali ekelamu ya elimo to anzelu, elingi koloba ete azali na nzoto oyo tokoki te komona.—Baefese 6:11, 12.

Bato mingi bamonisaka Zabolo asimbi nkanya moko ya monene. Azali lokola ntaba moko oyo azali na maseke mpe na mokila.

Bato mingi bakanisaka ete Zabolo azali ekelamu moko lokola ntaba oyo ezali na maseke, na mokila, mpe na nkanya moko monene. Bato mosusu bakanisaka ete ndenge bamonisaka Zabolo ndenge wana emonisi ete bayemi oyo basalaki yango bazalaki na bomoi esili koleka mbula 1 000. Mpe emonani lokola masapo mpe mimeseno ya kala nde etindaki bayemi yango básala yango.

Biblia emonisi ete Zabolo azalaka ndenge nini?

Biblia ebengi Zabolo na bankombo ndenge na ndenge. Yango esalisi biso tóyeba kaka te soki azali na nzoto nini, kasi mpe bizaleli na ye. Yango oyo mwa bankombo yango:

Anzelu ya pole. Amimonisaka lokola moto oyo akopesa bato eloko ya malamu mpo na kotinda bango bálanda mateya na ye na esika bálanda mateya ya Nzambe.—2 Bakorinti 11:14.
Nkɔsi oyo ezali koganga. Abundisaka mpenza basambeli ya Nzambe.—1 Petro 5:8.
Dragɔ ya monene. Abangisaka, azali na nguya, mpe azali mobebisi.—Emoniseli 12:9.

Bavɛrsɛ ya Biblia oyo elobeli Zabolo

2 Bakorinti 11:14: “Satana ye moko azali kokoba komimonisa lokola anzelu ya pole.”

Ndimbola: Satana asalelaka biloko kitoko mpo na kobenda bato bálanda mateya na ye na esika bálanda oyo ya Nzambe.
Baefese 6:11: “Bólata molato mobimba ya etumba oyo euti na Nzambe mpo bókoka kotɛlɛma ngwi liboso ya mayele mabe ya Zabolo.”

Ndimbola: Zabolo asalelaka mayele mabe mpo na kotinda bato báboya kotosa Nzambe.
Yakobo 4:7: “Bómikitisa liboso ya Nzambe; kasi bótɛmɛla Zabolo, mpe akokima bino.”

Ndimbola: Moto akoki kolonga kotɛmɛla Satana soki azali kotosa Nzambe na esika ya kotosa Zabolo.
1 Petro 5:8: “Monguna na bino, Zabolo, azali kotambola epai na epai lokola nkɔsi oyo ezali koganga mpe koluka kolya moto.”

Ndimbola: Zabolo ayinaka baoyo batosaka Nzambe mpe alingaka kobebisa boyokani na bango ná Nzambe.