Molunge makasi na mokili mobimba​—Biblia elobi nini?

Na sanza ya 07/2022, molunge ezalaki makasi na ndenge oyo esalemá naino te na mokili mobimba. Talá oyo balapolo emonisi:

• “Mpo na mbala ya mibale na sanza oyo, bakonzi ya ekólo Chine bazali kokebisa bato ete molunge ekozala makasi mpenza na bingumba pene na 70.”​—25/07/2022, shɛni ya TV CNN.

• “Lokola na mpoto mobimba molunge ekómi makasi mingi, yango esali ete mɔtɔ ya zamba epela na ndenge ya nsɔmɔ mpenza na bikólo mingi.”​—17/07/2022, zulunalo The Guardian.

• “Na mokolo ya lomingo, molunge ezalaki makasi na ndenge oyo esalemá naino te na bingumba mingi na États-Unis. Molunge yango ezalaki na bingumba oyo ezalaka na ɛsti, na bisika mosusu na sudi mpe na etúká oyo babengaka Midwest.”​—24/07/2022, zulunalo The New York Times.

Tokoloba nini mpo na makambo oyo? Mabele ekozala lisusu te esika malamu mpo na kofanda? Biblia elobi nini?

Biblia esakolaki ete molunge makasi boye ekozala?

Ɛɛ. Molunge makasi oyo ezali na mokili mobimba ekokani na makambo oyo Biblia elobaki ete ekosalema na mikolo na biso. Na ndakisa, Yesu asakolaki ete tokomona “makambo ya nsɔmɔ,” to “bilembo minɛnɛ.” (Luka 21:11; Biblia Haut fleuve) Lokola molunge ekómi makasi, bato mingi bazali kobanga ete makambo oyo bato bazali kosala ebebisa lisusu mokili mpe ekóma mpasi kofanda na mabele.

Bato bakofanda lisusu te na mabele?

Te. Nzambe asalaki mabele mpo bato báfanda wana libela na libela. (Nzembo 115:16; Mosakoli 1:4) Akotika te ete bato bábebisa mabele. Kutu, ‘akobebisa baoyo bazali kobebisa mabele,’ kaka ndenge asakolaki yango.​—Emoniseli 11:18.

Talá makambo mibale kati na makambo mingi oyo Nzambe akosala mpo mabele:

• “Esobe mpe etúká oyo ezangá mai ekosepela, mpe mokili patatalu oyo ekauká ekozala na esengo mpe ekobimisa bafololo lokola safra.” (Yisaya 35:1) Nzambe akotika te ete mabele mobimba ekauká makasi mpe eloko moko te ezala na likoki ya kofanda na kati. Kasi akobongisa bisika na yango oyo ebebá.

• “Otyeli mabele likebi na yo, mpo opesa yango biloko ebele; ozali kokómisa yango na bozwi mingi mpenza.” (Nzembo 65:9) Nzambe akokómisa mabele paradiso.

Mpo na koyeba makambo mosusu oyo etali ndenge oyo kobeba ya klima ezali kokokisa bisakweli ya Biblia, tángá lisolo “Les changements climatiques et notre avenir : qu’en dit la Bible?”

Mpo na koyeba makambo mosusu oyo etali esakweli ya Biblia oyo emonisi ete klima ekobonga, tángá lisolo “Qui sauvera la terre?”