Ndenge nini kimya ekokɔta na mokili?

Eyano ya Biblia

Bato bakolonga te kotya kimya awa na mokili; kimya ekokɔta nde na nzela ya Bokonzi ya Nzambe, guvɛrnema moko oyo ezali na likoló, oyo mokonzi na yango ezali Kristo Yesu. Talá elikya oyo Biblia epesi biso mpo na likambo yango.

1. Nzambe ‘akosilisa bitumba tii na nsuka ya mabele,’ mpo na kokokisa elaka oyo apesaki ya kotya “kimya na mabele na bato oyo ye andimi.”​—Nzembo 46:9; Luka 2:14.

2. Bokonzi ya Nzambe ezali na likoló, kasi ekoyangela mabele mobimba. (Danyele 7:14) Lokola ekozala guvɛrnema kaka moko na mokili mobimba, ekolongola bolingo ya ekólo, mpo yango nde ebimisaka mabe mingi.

3. Yesu, Mokonzi ya Bokonzi ya Nzambe, abengami “Nkumu ya Kimya,” mpe akosala ete ‘kimya ezala na nsuka te.’​—Yisaya 9:6, 7.

4. Bato oyo balingi kotika bitumba te bakokɔta na Bokonzi ya Nzambe te mpo “molimo [ya Nzambe] eyinaka mpenza moto oyo alingaka mobulu.”​—Nzembo 11:5; Masese 2:22.

5. Nzambe azali koteya basaleli na ye ndenge ya kofanda na kimya. Mpo na mosala oyo mateya yango ezali kosala, Biblia elobi ye: “Bakotula mipanga na bango mpo ekóma bitimweli ya mabele mpe makɔnga na bango mpo ekóma makwangola ya kokata matiti. Ekólo moko ekotombola mopanga te mpo na kobunda na ekólo mosusu, bakoyekola mpe etumba lisusu te.”​—Yisaya 2:3, 4.

Kobanda sikoyo, Nzambe azali kolakisa bamilio ya Batatoli ya Yehova na mokili mobimba ndenge ya kozala bato oyo batyaka kimya. (Matai 5:9) Atako tozali bato ya bikólo ekeseni mpe tofandi na mikili koleka 230, toboyaka kosimba mandoki mpo na kobundisa basusu.