Kosunga bandeko oyo bakutani na makama na 2021​—Bandeko na biso basundolami te

Na mobu ya mosala 2021,a bato bazalaki kaka konyokwama na maladi mabe ya Coronavirus. Ndenge lisolo “Kosunga bandeko na mokili mobimba na ntango ya maladi mabe oyo” emonisaki yango, tosaleli bamilio ya badolareb mpe totye bakomite koleka 950 mpo na kosunga bandeko oyo bakutani na makama.

Nzokande, wana Coronavirus ezalaki konyokola bato, makama oyo ebimi yango moko mpe oyo bato babimisi ezwaki mpe bandeko na biso na bisika ndenge na ndenge. Mpo na kosunga bandeko oyo bakutanaki na makama koleka 200 oyo esalemaki, Komite ya bakambi ya Lisangani ya Mikóló-Bakambi endimaki kobimisa dolar milio 8, longola oyo ebimaki mpo na Coronavirus. Talá ndenge makabo na bino esalisaki na makama mibale oyo esalemaki mikolo eleki.

Ngomba Nyiragongo esanzi mɔtɔ

Na mokolo ya 22/05/2021, Ngomba Nyiragonga, volka moko oyo ezalaka na Republique Democratique du Congo, ebandaki kosanza mɔtɔ. Mai ya mɔtɔ ya volka yango ebebisaki bandako, biteyelo mpe esika moko oyo babombaka mai. Kasi likama ezalaki kaka mai ya mɔtɔ ya volka te. Mikolo ebele na nsima, putulu mabe ya oyo eutaki na volka yango ezalaki kokende na engumba Goma mpe koningana ya mabele ya mikemike esalemaki. Basɛngaki katikati ya bato ya engumba yango bákima mboka. Bato ebele mpenza bakimaki engumba mpe bamosusu bakendaki na Rwanda.

Na kati ya bato yango, ezalaki na Batatoli ya Yehova soki 5 000. Bandako ya bamosusu ebebaki na mɔtɔ ya volka; ya bamosusu, miyibi bakɔtelaki yango ntango bango bakimaki. Bakomite ya kosunga bato oyo bakutani na makama ya Rwanda mpe ya Congo esalaki elongo mpo kosunga bandeko. Filiale ya Congo (Kinshasa) elobi boye mpo na mosala ya komite moko: “Atako makambo ezalaki malamu te na engumba yango mpe liboso kutu básɛnga bato bákima mboka, komite yango ebandaki kokabolela bandeko bilei, mai, bisika ya kolala, mpe bilamba.” Na mboka moko epai bandeko koleka 2 000 bakimaki, komite moko ya kosunga etyaki bahema, epesaki bandeko bamaske, mpe elimbolelaki bango oyo basengeli kosala mpo bázwa maladi ya Coronavirus mpe kolera te.

Na sanza misato banda likama yango esalemaki, bandeko bakabolaki tone koleka 6 ya loso, tone 6 ya fufu ya masango, tone 3 ya mafuta ya kolambela, mpe tone 3 ya mai. Mpo na kosalela mbongo na mayele, biro ya filiale esɛngaki ete básomba bilei ebele kaka na ekólo na esika ya kosomba yango ntalo mingi na mboka mopaya.

Ndeko mwasi moko oyo volka ebebisaki ndako na ye ya sika alobi boye: “Tolɛmbaki mpenza nzoto mpe tozalaki na mpasi na motema.” Kasi na nsima libota na ye ezwaki lisungi mpe bilendiseli. Sikoyo alobi boye: “Yehova asalisi biso tózala na oyo tosengeli na yango. Tomoni ete Yehova amemi mokumba na biso mpe akómiseli biso yango pɛpɛlɛ.”

Nkita ya ekólo Vénézuela ekwei

Ekólo Vénézuela ezali na mikakatano monene ya nkita esali bambula ebele. Bandeko na ekólo yango bazali konyokwama mpo bomoi ekómi mpasi, bilei ezali te mpe mobulu ebakisami mingi. Atako bongo, ebongiseli ya Yehova esundoli bango te.

Na mobu ya mosala oyo eleki, tosalelaki dolare koleka milio moko ná ndambo mpo na kosomba mpe komema bilei mpe sabuni na mabota oyo ezalaki na mposa ya lisalisi. Biro ya filiale ya Vénézuela elobi boye: “Komema 130 tone ya biloko ya kolya na ekólo mobimba sanza nyonso mpe kokabolela yango bandeko nyonso oyo bazali na bosɛnga ezali pɛtɛɛ te.” Mpo bilei yango ebeba te, mbala mingi bandeko basombaka bilei oyo ekobeba noki te. Biro ya filiale ebakisi boye: “Tosombaka bilei mingi ebele na mbala moko mpe na eleko oyo ezali komonana mingi, mpo ezalaka ntalo mingi te. Na nsima, totindaka yango na banzela oyo ezali ntalo mingi te.”

Leonel, ndeko mobali oyo azali na komite moko ya kosunga bandeko na Vénézuela alingaka mosala yango. Alobi boye: “Mosala ya kosunga bandeko ezali malamu mingi. Mokumba yango epesi ngai makasi mingi banda mwasi na ngai akufá na Coronavirus. Nazangaka makambo ya kosala te mpe namonaka ete nazali na ntina mpo na bandeko oyo bazali na bosɛnga. Namoni mpenza ndenge oyo Yehova akokisi elaka na ye ete asundolaka bato na ye te.”

Ndeko moko oyo azwaki lisungi, asalá kala na komite ya kosunga bandeko. Alobi boye: “Mbala oyo ngai nde nazalaki na mposa ya lisungi. Tozwaki kaka biloko ya mosuni te. Bandeko basalisaki mpe ngai ná mwasi na ngai mpo tózala motema ya kokita. Batyelaki biso likebi, babɔndisaki biso, mpe balendisaki biso.”

Makama mosusu ebimaka kozanga bato bázwa mpenza likebisi. Atako bongo, mbala mingi ebongiseli ya Yehova ezalaka na likoki ya kozwa mpe kopesa bandeko lisungi nokinoki, mpo na makabo oyo bopesaka mpo na mosala na mokili mobimba. Ndenge mosusu ya kopesa makabo elimbolami na donate.jw.org. Tosepelaka mingi na elimo na bino ya bokabi.