Boyebi oyo ekokómisa yo moninga ya Nzambe
Nzambe azali nguya moko boye te. Azali nde moto oyo azali na bizaleli ya malamu mpenza. Mpe alingi ete tóyeba ye mpe tókóma baninga na ye. (Yoane 17:3; Yakobo 4:8) Yango wana, ayebisi biso makambo na ye ebele mpenza.
Nzambe azali na nkombo
“Mpo bato báyeba ete yo, oyo nkombo na yo ezali Yehova, yo moko nde Oyo-Aleki-Likoló na mabele mobimba.”—NZEMBO 83:18.
Biblia eteyaka ete Yehova azali Nzambe ya solo kaka moko. Ye moto akelá molɔ́ngɔ́ mobimba mpe biloko nyonso. Tosengeli kosambela kaka ye moko.—Emoniseli 4:11.
Yehova azali Nzambe ya bolingo
“Nzambe azali bolingo.”—1 YOANE 4:8.
Yehova amonisi bizaleli na ye mingi na nzela ya Biblia mpe na nzela ya biloko oyo asalá. Bolingo ezali ezaleli na ye ya monene mpenza. Bolingo nde etindaka ye asala makambo nyonso. Soki toyebi Yehova malamu, tokolinga ye mpe mingi.
Yehova alimbisaka
“Yo ozali Nzambe ya bolimbisi.”—NEHEMIA 9:17.
Yehova ayebi ete tozali bato ya kozanga kokoka. Yango wana ‘alimbisaka’ biso. Ntango tosɛngi ye bolimbisi mpe tosali makasi tótika kosala makambo ya mabe, akolimbisa biso mpe akopesa biso etumbu te mpo na masumu ya kala.—Nzembo 103:12, 13.
Yehova ayokaka mabondeli
“Yehova azali pene na baoyo nyonso bazali kobelela ye . . . Akoyoka kolela na bango mpo na kosɛnga lisalisi.”—NZEMBO 145:18, 19.
Tosengeli te kosala milulu moko boye to kosalela bikeko to biloko mosusu mpo na kosambela Yehova. Ayokaka mabondeli na biso ndenge baboti ya bolingo bayokaka bana na bango.