“Nakotambola zingazinga ya etumbelo na yo, ɛ Yehova”

“NAKOSUKOLA mabɔkɔ na ngai kati na bosembo, mpe nakotambola zingazinga ya etumbelo na yo, ɛ Yehova.” (Nzembo 26:6, NW ) Davidi, mokonzi ya kala, alobaki maloba yango mpo na komonisa ete amipesaki mpenza mpo na kosalela Yehova. Kasi, mpo na nini asengelaki “kotambola zingazinga” ya etumbelo ya Yehova mpe yango elimboli nini?

Mpo na Davidi, esika mpenza ya losambo ya Yehova ezalaki epai oyo hema, na etumbelo na yango ya motako, ezalaki. Ntango Davidi azalaki mokonzi, hema yango ezalaki na Gibona, na nɔrdi ya Yelusaleme. (1 Mikonzi 3:4) Etumbelo ya mbeka ezalaki na molai ya mɛtrɛ 2,2 na ngámbo mokomoko; ezalaki moke mpenza soki tokokanisi yango na etumbelo ya monene oyo batongaki na kati ya lopango ya tempelo ya Salomo.a Atako bongo, Davidi azalaki kosepela na hema mpe na etumbelo na yango mingi. Hema yango ezalaki esika monene ya losambo ya pɛto na Yisalaele.—Nzembo 26:8.

Bambeka ya kotumba, bambeka ya kimya mpe bambeka ya ekweli ezalaki kopesama na etumbelo; mpe mbula na mbula, na Mokolo ya Mbɔndi, bazalaki kotumba bambeka mpo na ekólo Yisalaele mobimba. Etumbelo na bambeka na yango ezali na ndimbola monene mpo na baklisto lelo oyo. Ntoma Paulo alobaki ete etumbelo elimboli mposa ya Nzambe, mpo na yango andimaki mbeka oyo ebongi mpo bato básikwama. Paulo alobaki ete: “Mpe na mokano yango tosili kobulisama mpo na kotombwa na nzoto na Yesu Klisto lokola mbeka mbala moko mpo na libela.”—Baebele 10:5-10.

Banganga bazalaki na momeseno ya kosukola mabɔkɔ na bango na mai mpo na komipɛtola liboso ya kosala mosala na etumbelo. Yango wana, Mokonzi Davidi asukolaki mabɔkɔ na ye “kati na bosembo” liboso ya ‘kotambola zingazinga ya etumbelo.’ Asalaki ‘na motema malamu mpe na bosembo.’ (1 Mikonzi 9:4) Soki asukolaki mabɔkɔ na ye bongo te, mbɛlɛ ‘kotambola’ na ye ‘zingazinga ya etumbelo,’ elingi koloba losambo na ye elingaki kondimama te. Ya solo, Davidi azalaki Molevi te, yango wana azalaki na lotomo ya kosala mosala ya bonganga na etumbelo te. Atako azalaki mokonzi, Davidi azalaki ata na ndingisa ya kokɔta na kati ya lopango ya hema te. Atako bongo, lokola azalaki Moyisalaele ya sembo, azalaki kotosa Mibeko ya Mose mpe mbala na mbala azalaki komema mbeka na ye na etumbelo. Atambolaki zingazinga ya etumbelo, yango elimboli ete atyaki losambo ya pɛto na esika ya liboso na bomoi na ye.

Lelo oyo, tokoki kolanda ndakisa ya Davidi? Ɛɛ. Biso mpe tokoki kosukola mabɔkɔ na biso kati na bosembo mpe kotambola zingazinga ya etumbelo ya Nzambe, soki tozali kosala misala oyo emonisi ete tozali na kondima kati na mbeka ya Yesu mpe tozali kosalela Yehova na motema na biso mobimba “na mabɔkɔ na mabe te mpe motema pɛto.”—Nzembo 24:4.

[Maloba na nse ya lokasa]

[Elilingi na lokasa 23]

Etumbelo elimboli mposa ya Yehova, na nzela na yango nde andimi mbeka oyo ebongi mpo bato básikwama.