22. Mpo na ntango ezali koya Yehova asakoli nini mpo na (a) baoyo babongoli motema? (b) bato mabe?

²² Yehova amonisi bokeseni oyo ekozala kati na baoyo babongoli motema mpe baoyo batingami na banzela na bango ya mabe, mpe alobi boye: ‘Ngai nakosala mbuma ya bibɛbu. Kimya! Kimya! epai ya moto ya mosika mpe ya penepene . . . mpe nakobikisa ye. Nde bato mabe bazali lokola mai-na-monana mazali kotombwatombwa, bayebi kofanda na kimya te, mai na yango ekobwaka bosɔtɔ mpe pɔtɔpɔtɔ likoló. Nzambe na ngai alobi ete, Mpo na bato mabe kimya ezali te.’—Yisaya 57:19-21.

24. (a) Nani nde azalaka na kimya ya Nzambe, mpe yango ebimisaka nini? (b) Banani bakoki te kozala na kimya, mpe ekosukela bango ndenge nini?

²⁴ Boye Bayuda bapesaki mpenza mbeka ya mbuma ya bibɛbu ya esengo mingi ntango bazongaki na mboka na bango, wana bayembaki mpo na kosanzola Yehova! Bazali solo na esengo ya kozala na kimya ya Nzambe, bázala “mosika” (mosika na Yuda, wana bazalaki kozela kozonga) to bázala “penepene” (wana bazongi na mboka na bango). Nzokande, makambo ezalaka mpenza bongo te mpo na bato mabe! Moto nyonso oyo aboyi etumbu ya Yehova, moto mabe, ezala azali nani to azali wapi, akozwa kimya ya solo te. Bazali kopunzwapunzwa lokola mai ya mbu oyo efandaka kimya te, bazali ntango nyonso kobimisa mbuma ya bibɛbu te, kasi nde “bosɔtɔ mpe pɔtɔpɔtɔ,” makambo nyonso ya mbindo.