Na ntongo mpenza, na mokolo na lomingo, Marie Madeleine mpe Marie, mama na Yakobo, elongo na Salomé, na Yoana, mpe basi mosusu bamemi malasi mabongisami mpo na kopakola na nzoto na Yesu. Na nzela, bakómi kolobana ete: “Nani akolongwela biso libangá na monoko na liyita?” Kasi ekómi bango na liyita, bamoni ete koningana na mabelé esalamaki mpe libangá lilongolamaki na anzelu na Jéhovah. Bakengeli basili kokende mpe liyita litikali mpámba! Matai 27:57 kino 28:2; Malako 15:42 kino 16:4; Luka 23:50 kino 24:3, 10; Yoane 19:14, Yn. 19:31 kino 20:1; 12:42; Levitike 23:5-7; Deteronome 21:22, 23; Nzembo 34:20; Zakaria 12:10, MN.

Mokapo 128

Yesu azali na bomoi!

KOMONÁKÁ ete liyita na Yesu litikali mpámba, Marie Madeleine akimi mbango mpo na koyebisa yango epai na Petelo mpe Yoane. Kasi emonani lokola ete basi mosusu batikali wana pene na liyita. Nsima mwa moke, anzelu moko abimi mpe abéngi bango ete baingela kati na yango.

Na kati, basi bamoni anzelu mosusu, mpe moko na bango mibale alobi na bango ete: “Bobanga te, mpamba te nayebi ete bozali koluka Yesu oyo abomamaki na nzeté. Azali awa te, mpo ete asili kosekwa lokola elobaki ye. Yaka kotala esika elalaki ye. Mpe bokenda mbango koloba na bayekoli na ye ete asili kosekwa.” Bongo, na bobangi mpe na esengo monene, basi yango bakimi mbango lokola.

Bobele na ntango wana, Marie akuti Petelo na Yoane mpe alobi na bango ete: “Basili kolongola Nkolo na liyita mpe toyebi te soko batii ye wapi.” Nokinoki, bantóma wana mibale bakei na lombango. Yoane oyo azali na mbango mingi—mpo ete na ntembe te azali elenge—akómi liboso na liyita, wana basi basilaki kolongwa na esika yango; moto te azali zingazinga. Kokótisáká motó kati na liyita, Yoane atali na kati mpe amoni bilamba, kasi atikali bobele na libándá.

Petelo, ye oyo auti kokóma, akóti mbala moko. Amoni bilamba bilali wana, mpe elamba oyo balingáki motó na Yesu, elingámi na esika mosusu. Sikawa, Yoane mpe akóti kati na liyita, mpe andimi oyo Marie alobaki. Kasi ezala Petelo to Yoane, moko te asosoli ete Yesu asekwi, atako ayebisaki bango mbala na mbala ete akosekwa. Na kokakatana, mibali yango mibale bazongi epai na bango, mpe batiki Marie oyo azongi lisusu na liyita.

Na ntango yango, basi mosusu bakei na lombángo mpenza mpo na koyebisa bayekoli ete Yesu asili kosekwa, lokola baanzelu batindaki bango. Wana ezali bango kopota mbango, Yesu azwani na bango mpe alobi na bango ete: “Mbote na bino!” Bakwei na makolo na ye, mpe bakumisi ye. Yesu alobi na bango ete: “Bobanga te! Bokenda koyebisa bandeko na ngai ete bakenda na Galilai; mpe bakomona ngai kuna.”

Mwa liboso, na ntango mabelé maninganaki mpe ntango baanzelu babimaki, basoda oyo bazalaki kokengela babangaki mingi mpenza mpe bakómaki lokola bakufi. Ntango bobángi bosilaki, bakendaki na engumba mpe bayebisaki epai na banganga minene, makambo manso malekaki. Nsima wana “mikoló” na Bayuda basalaki likita, ekateli moko ekamatami: esengeli kobómba likambo yango na kopesá basoda misolo. Bapesi bango etinda oyo: “Boloba ete: ‘Bayekoli na ye bayei koyiba ye na butu wana ezalaki biso kolala.’”

Kasi, lokola basoda Baloma bakoki kozwa etumbu ya liwa mpo ete balalaki na esika na kokengela, banganga balaki bango ete: “Soki likambo oyo [ete bolalaki mpongi] ekokóma na matoi na guvernere, biso tokobongisa likambo mpe bino bokozwa mpasi te.” Lokola kanyáka epesami ezali mosolo mingi, basoda balandi malako wana. Mpe nsango oyo na lokuta ete bayibi nzoto na Yesu, epalangani mingi mpenza epai na Bayuda.

Marie Madeleine oyo atikali na liyita, abandi kolela. Yesu akoki mpenza kozala wapi? Angumbami liboso mpo na kotala kati na liyita, mpe amoni baanzelu mibale balati bilamba na mpembe, babimi lisusu! Moko afandi na motó mpe mosusu na makolo esika nzoto na Yesu elalaki. Balobi na ye ete, “Mwasi, ozali kolela mpo na nini?”

Marie azongisi ete: “Balongoli Nkolo na ngai mpe nayebi te soko batii ye wapi.” Mpe atalaki nsima amoni moto mosusu oyo atuni ye bobele motuna yango, ete: “Mwasi, ozali kolela nini?” Kasi moto wana abakisi ete: “Ozali koluka nani?”

Kokanisáká ete ezali mobateli na elanga oyo liyita lizali kati na yango, alobi na ye ete: “Nkolo, soko osili kolongola ye, yebisa ngai esika otii ye mpe nakomema ye.”

Bongo, moto wana abengi ye ete: “Marie!” Nokinoki, mpo na motindo oyo ameseni koloba na ye, asosoli ete ezali Yesu, mpe angangi ete “Rabbouni!” (oyo elimboli “Moteyi!”). Na esengo eleki ndelo, akwei na makolo na ye koyamba ye. Kasi Yesu alobi na ye ete: “Tika kokangama na ngai. Mpamba te naino nabuti epai na Tata te. Nde kenda epai na bandeko na ngai mpe loba na bango ete: ‘Nazali kobuta epai na Tata na ngai mpe Tata na bino, epai na Nzambe na ngai mpe Nzambe na bino.’”

Tala sikawa Marie azali kokima mbango epai kuna bantoma mpe bayekoli bayangani. Abakisi litatoli na ye likoló na oyo basi mosusu bauti kopesa, ete bamoni Yesu asekwi. Atako bongo, lokola bandimaki basi mosusu te, emonani ete mibali yango bandimi mpe Marie te. Matai 28:3-15; Malako 16:5-8; Luka 24:4-12; Yoane 20:2-18.

▪ Marie Madeleine asali nini, nsima wana bakuti ete liyita litikali mpámba, mpe nini ekómeli basi mosusu?

▪ Petelo mpe Yoane basali nini wana bakuti ete liyita litikali mpámba?

▪ Basi mosusu bakutani na nani wana ezali bango kokende koyebisa bayekoli ete Yesu asekwi?

▪ Nini ekómeli basoda oyo bazalaki kokengela, mpe banganga basalaki nini wana basoda bakei koyebisa bango?

▪ Nini esalemi wana Marie Madeleine azali bobele ye moko, mpe bayekoli basali nini wana basi bayebisi bango makambo bauti komona?

BAYEKOLI bazali naino na kolemba. Bayebi te likambo nini basengeli kokanisa mpo na liyita oyo litikali mpamba; epai mosusu bazali mpe kondima litatoli na basi te. Na yango, na mpokwa mpenza ya mokolo wana na lomingo, Keleopa mpe moyekoli mosusu batiki Yelusaleme mpo na kokende na Emau, etúka moko penepene na bakilometele soko 11.

Na nzela, wana ezali bango kosolola na ntina na makambo oyo mauti koleka na mokolo wana, mopaya moko abelemi na bango, kotambola na bango nzela moko. Atuni bango ete: “Oyo makambo nini mazali bino kosolola awa na mobembo?”

Bayekoli batelemi, na elongi na mawa, mpe Keleopa ayanoli: “Lokola nde ozali mopaya, ofandi mosika na Yelusaleme, mpe ozangi koyeba makambo mabimi mikolo oyo?” Moto yango atuni ete, “Makambo nini?”

Bayanoli ete: “Makambo na ntina na Yesu na Nazarete. Banganga minene na mikonzi na biso bakabaki ye mpo na ekweli na kufa, nzokande tozalaki na elikya ete ye moto alingaki kosikola Yisraele.”

Keleopa mpe moninga na ye bayebisi makambo ya kokamwisa oyo masalemaki na mokolo yango​—komonana na baanzelu mpe liyita litikali mpamba—​kasi bandimi ete bazali mpenza kososola ndimbola ya makambo yango te. Mopaya apameli bango: “Bino bazoba! Bato na goigoi na mitema mpo na kondima makambo nyonso malobaki basakoli! Ekokaki na Klisto koyoka mpasi oyo mpe kokota na nkembo na ye te?” Mpe alimbolaki bango makambo kati na makomi na bulee na ntina na Klisto.

Nsuka na yango, babelemi na Emau, mpe moto yango asali lokola ete alingi koleka na ye. Na mposa ya koyoka makambo mingi lisusu, bayekoli babondeli ye ete: “Umela awa na biso mpo ete moi ekiti mpe butu elingi koinda.” Na bongo moto yango afandi na bango mpo na kolya. Atondi Nzambe, abuki limpa mpe abandi kokabela bango yango; ezali na ntango wana nde bayebaki nani moto yango: Yesu kati na nzoto ya moto na mosuni. Kasi na ntango wana alimwe.

Sikawa basosoli mpo na nini moto yango ayebaki makambo mingi! Balobi ete: “Wana ezalaki ye kosolola na biso na nzela mpe kofungola makomi mpo na biso, mitema na biso mizalaki na móto kati na biso te?” Baumeli te, batelemi mpe bazongi nokinoki na Yelusaleme, epai kuna bakuti bantoma mpe elongo na baoyo bayangani na bango esika moko. Liboso ete Keleopa mpe moninga na ye bakoka kofungola monoko, bamosusu, na móto nyonso, bayebisi bango ete: “Nkolo asekwi solo mpe amonani na Simona!” Na nsima, mibali mibale wana babandi koyebisa ndenge nini Yesu abimelaki bango mpe. Yango ekoki mbala minei oyo Yesu abimeli bayekoli bakeseni se na mokolo moko oyo.

Atako bikuke bikangami malamu mpo ete bayekoli bazali kobanga Bayuda, Yesu abimi pwasa mpo na mbala ya mitano. Atelemi na katikati na bango mpe alobi: “Tika kimya ezala na bino!” Bayekoli babangi, kokanisaka ete bamoni elimo moko. Na yango, kolimbolaka bango ete ezali emononeli te, Yesu alobi na bango: “Mpo na nini bobulungani kati na mitema na bino? Bozali na ntembe na mitema na bino mpo na nini? Botala maboko na ngai mpe makolo na ngai: ezali ngai mpenza; bosimba ngai mpe botala, mpamba te elimo azalaka na misuni te mpe na mikuwa te, lokola bozali komona ngai na yango.” Atako bongo, bazali bobele na nkaka mpo na kondima.

Mpo na kosalisa bango na kososola ete azali mpenza Yesu, atuni bango: “Bozali na mwa eloko na kolya awa?” Nsima na kondima eteni moko na mbisi ya kotumba mpe kolya yango, abandi koteya bango, kolobaka ete: “Oyo ezali makambo ngai nasololaki na bino, naino ezalaki ngai na bino esika moko [liboso ya liwa na ngai] ete: ekoki na makambo nyonso masili kokomama kati na mibeko na Moïse, na Basakoli, na Nzembo na ntina na ngai makokisama.”

Kokobaka lokola ete azali kotambwisa boyekoli na Biblia, Yesu ateyi bango likambo oyo: “Esili kokomama boye ete Klisto akozwa mpasi, mpe akosekwa na bakufi na mokolo na misato, mpe ete kobongolama na mitema mpo na kolimbisama na masumu, ekosakolama na nkombo na ye na mabota nyonso​—kobanda na Yelusaleme, bino bosengeli kozala batatoli na makambo oyo.”