Kosalela biblia mpo na kopesa biyano

NTANGO bato batunaka biso mituna mpo na bindimeli na biso, bizaleli na biso, likanisi na biso na makambo oyo ezali kosalema na mokili, mpe elikya na biso mpo na mikolo ezali koya, tosalaka makasi mpo na kosalela Biblia mpo tópesa bango biyano. Mpo na nini? Mpamba te Biblia ezali Liloba ya Nzambe. Bindimeli na biso euti mpenza na Biblia. Lolenge ya bomoi na biso euti na Biblia. Yango nde ezali kosala ete tótalela na lolenge boye to boye makambo oyo ezali kosalema na mokili. Bisakweli oyo epemami oyo ezali na kati ya Biblia nde esimbi mpenza elikya na biso mpo na mikolo ezali koya.​—2 Tim. 3:16, 17.

Toyebi malamu mpenza mokumba oyo tozali na yango, mokumba oyo ekangani na nkombo na biso: tozali Batatoli ya Yehova. (Yis. 43:12, NW) Yango wana biyano na biso eutaka na makanisi ya bato te, kasi eutaka na makambo oyo Yehova alobi na kati ya Liloba na ye oyo epemami. Ya solo, lokola tozali bato, tozalaka mpe na makanisi na biso moko na likambo boye to boye. Kasi totikaka Liloba ya Nzambe etambwisa makanisi na biso, mpamba te tondimi mpenza ete ezali solo. Ya solo, na makambo mingi, Biblia etikeli biso bonsomi ya kopona oyo esepelisi biso. Na esika ete tóndimisa bato na makasi makambo oyo esepelisi biso, mposa na biso ezali ete tóteya bango mitinda oyo ezali na kati ya Makomami. Yango ekosalisa bato oyo bazali koyoka biso bápona bango moko oyo balingi kosala, ndenge biso mpe tosalaka yango. Lokola ntoma Paulo, tozali koluka “kokolisa botosi na nzela ya kondima.”​—Lom. 16:26.

Na Emoniseli 3:14, Yesu Klisto amonisami lokola “Motatoli ya sembo mpe ya solo.” Ndenge nini Yesu azalaki koyanola na mituna mpe azalaki kosala nini ntango akutani na likambo moko? Na bantango mosusu, azalaki kosalela masese oyo ezalaki kotinda bato bákanisa. Na bantango mosusu mpe azalaki kotuna moto yango motuna mpo na koyeba soki akangi ntina ya makomami. Mbala mingi Yesu azalaki kotánga maloba ya makomami, azalaki kozongela yango na maloba mosusu, to azalaki kaka kolobela makanisi na yango. (Mat. 4:3-10; 12:1-8; Luka 10:25-28; 17:32) Na ekeke ya liboso, bazalaki kobomba barulo ya Makomami na kati ya basinagoga. Eloko moko te emonisi ete Yesu azalaki na barulo na ye moko oyo azalaki kobomba; kasi ayebaki Makomami malamu mpenza mpe mbala mingi azalaki kolobela yango ntango azalaki koteya bato. (Luka 24:27, 44-47) Yango wana, akokaki koloba na bosembo mpenza ete makambo oyo azalaki koteya eutaki na ye moko te. Azalaki koloba makambo oyo ayokaki epai ya Tata na ye.​—Yoa. 8:26.

Mposa na biso ezali ete tólanda ndakisa ya Yesu. Na kokesana na Yesu, toyokaka mongongo ya Nzambe te. Kasi Biblia ezali Liloba ya Nzambe. Ntango tozali kopesa biyano oyo euti na Biblia, tozali kosala ete bato bátya likebi na bango epai na biso moko te. Tozali komonisa ete na esika tólobela makanisi ya bato oyo bazangi kokoka, tolingi mpenza komonisa ete Nzambe nde alobaka solo.​—Yoa. 7:18; Lom. 3:4.

Ya solo, mposa na biso ezali kaka te ete tósalela Biblia, kasi tolingi kosalela yango na lolenge oyo ekosalisa mpenza bato oyo bazali koyoka biso. Tolingi ete báyoka biso na makanisi malamu. Na kotalela ezaleli ya moto yango, okoki kotuna boye liboso ya kopesa ye likanisi ya Biblia: “Ondimi ete maloba ya Nzambe nde ezali mpenza na ntina?” To okoki koloba boye: “Oyebi ete Biblia elobeli motuna na yo?” Soki ozali kosolola na moto oyo andimaka Biblia te, mbala mosusu, ekozala malamu kosalela maloba mosusu. Okoki koloba boye: “Tiká nalakisa yo esakweli moko ya kala.” To okoki koloba boye: “Mokanda oyo epalangani mingi koleka mikanda nyonso mosusu na lisolo ya bato elobi ete . . .”

Na bisika mosusu, okoki kaka kozongela vɛrsɛ moko na maloba mosusu. Nzokande, na bisika oyo ebongi, ekozala malamu ofungola Biblia mpe otángela moto yango makambo oyo elobi. Soki ebongi, lakisá moto yango vɛrsɛ wana na kati ya Biblia na ye moko. Soki osaleli Biblia mbala moko ndenge wana, yango esimbaka mpenza mitema ya bato mingi.​—Ebe. 4:12.

Bankulutu baklisto bazali na mokumba monene ya kosalela Biblia ntango bazali kopesa biyano na mituna ya bato. Kati na masɛngami mpo na kozala nkulutu, ezali na likambo oyo emonisi ete ndeko mobali yango asengeli kozala “oyo akangami makasi na liloba ya sembo na oyo etali mayele na ye ya koteya.” (Tito 1:9) Nsima ya koyoka toli ya nkulutu moko, ndeko moko na kati ya lisangá akoki kozwa ekateli moko ya ntina mingi na bomoi na ye. Yango wana ezali na ntina mingi ete toli yango euta mpenza na Makomami! Soki nkulutu azali kopesa ndakisa na likambo oyo, yango ekoki kosala ete bato mingi bábongola lolenge na bango ya koteya.