Yesu ná bayekoli na ye balali mikolo misato na Betania banda bautaki na Yeriko. Sikoyo, na ntɔngɔ ya mokolo ya yambo, mwa 10 Nisana, bakei na Yerusaleme. Yesu ayoki nzala. Yango wana, ntango amoni nzete ya figi, apusani pene na yango. Kasi ezali na mbuma?

Tozali pene na nsuka ya sanza ya misato; kasi figi ebotaka na sanza ya motoba. Atako bongo, nzete yango etondi na nkasa, mpe nkasa yango ebimi liboso mpenza. Mbala mosusu, Yesu akanisi ete figi ebandi kobota. Kasi, ntango apusani pene, akuti ata mbuma moko te. Nkasa emonisi lokola nde nzete yango ezali na mbuma, nzokande ezali te. Na nsima, Yesu alobi: “Moto alya mbuma na yo lisusu te, libela na libela.” (Marko 11:14) Mbala moko, nzete yango ebandi kokauka; ndimbola ya likambo yango ekoyebana lobi na ntɔngɔ.

Eumeli te, Yesu ná bayekoli na ye bakómi na Yerusaleme. Akei na tempelo, oyo atalaki yango lobi nsima ya midi. Lelo, asuki kaka na kotala te; asali ndenge asalaki mbula misato liboso, na Elekeli ya mobu 30 T.B. (Yoane 2:14-16) Na mbala oyo, Yesu abengani “baoyo bazali kotɛka mpe kosomba na tempelo.” Abaloli mpe “bamesa ya bato oyo basenzaka mbongo mpe bibonga ya baoyo bazali kotɛka bibenga.” (Marko 11:15) Apesi nzela ata na moto moko te oyo azali komema biloko na ye na ngámbo mosusu ya engumba akatisa na lopango ya tempelo.

Mpo na nini Yesu abengani bato oyo bazali kosenza mbongo mpe kotɛka banyama na tempelo? Alobi: “Ekomamá nde te ete: ‘Ndako na ngai ekobengama ndako ya mabondeli mpo na bikólo nyonso’? Kasi bino bokómisi yango mobenga ya miyibi.” (Marko 11:17) Abengi bato wana miyibi mpo bazali kotɛkɛla bato oyo bazali kosomba banyama ya kopesa mbeka na ntalo makasi. Yesu amoni ete kosala bongo ezali moyibi to kobɔtɔla bato biloko.

Ntango banganga-nzambe bakonzi, bakomeli, mpe bakambi bayoki likambo Yesu asali, basali lisusu nyonso mpo báboma ye. Kasi, bakutani na mokakatano moko. Bazali koyeba ndenge ya kosala te mpo na koboma Yesu, mpo bato ebele mpenza bazali koya koyoka ye.

Ezala Bayuda to baprozelite, elingi koloba bato ya bikólo mosusu oyo bakɔtaki na lingomba ya Bayuda, bayei na fɛti ya Elekeli. Kati na bango, ezali na Bagrɛki oyo bayei kosambela na fɛti yango. Bakei epai ya Filipe, mbala mosusu mpo azalaki na nkombo ya Bagrɛki, mpe basɛngi ye bákutana na Yesu. Filipe amoni ete kokutana na Yesu ndenge wana ekoki mbala mosusu kozala malamu mpenza te, yango wana ayebisi Andre likambo yango. Bango mibale bakei koyebisa Yesu likambo yango, mpe emonani ete Yesu azali naino na tempelo.

Yesu ayebi ete akokufa nsima ya mikolo moke, yango wana ezali ntango te ya kokokisa mposa ya bato oyo balingi koyeba makambo to koluka koyebana. Ayanoli bayekoli mibale wana na ndakisa moko, alobi: “Ngonga ekoki mpo Mwana ya moto azwa nkembo. Ya solo mpenza nazali koloba na bino ete: Soki mbuma ya blé ekwei na mabele te mpe ekufi te, ekotikala kaka mbuma moko; kasi soki ekufi, na ntango wana nde ekobota mbuma mingi.”​—Yoane 12:23, 24.

Mbuma ya blé moko ezali na valɛrɛ mingi te. Kasi, soki baloni yango na mabele mpe “ekufi,” ekoki kobima mpe ekokóma nzete ya monene oyo ekobota mbuma mingi. Ndenge moko mpe, Yesu azali moto ya kokoka kaka moko. Kasi, lokola atikali sembo epai ya Nzambe tii na liwa, bato mingi oyo bazali na ezaleli ya komipimela lokola ye bakozwa bomoi ya seko. Yango wana, Yesu alobi: “Moto oyo alingi molimo na ye azali kobebisa yango, kasi moto oyo ayini molimo na ye na mokili oyo akobatela yango mpo na bomoi ya seko.”​—Yoane 12:25.

Yesu azali kokanisa kaka makambo na ye moko te, mpo alobi: “Soki moto alingi kosalela ngai, alanda ngai, mpe epai ngai nazali, mosaleli na ngai mpe akozala. Soki moto alingi kosalela ngai, Tata akokumisa ye.” (Yoane 12:26) Akozwa libonza ya malamu! Bato oyo Tata ya Kristo apesi lokumu bakoyangela elongo na ye na Bokonzi ya Nzambe.

Lokola Yesu azali kokanisa mpasi makasi mpe liwa ya nsɔmɔ oyo ezali kozela ye, alobi: “Sikoyo molimo na ngai etungisami, mpe nakoloba nini? Tata, bikisá ngai naleka ngonga oyo.” Kasi Yesu aboyi te kokokisa mokano ya Nzambe. Abakisi: “Atako bongo, ezali mpo na yango nde nakómi na ngonga oyo.” (Yoane 12:27) Yesu andimi makambo nyonso oyo ezali na mokano ya Nzambe, ezala kokufa liwa ya mbeka.

Na tempelo, mokolo ya yambo, mwa 10 Nisana, Yesu alobi ete etikali moke akufa. Lokola azali komitungisa mpo na nsɔni oyo liwa yango ekobwaka na nkombo ya Nzambe, alobi: “Tata, pesá nkombo na yo nkembo.” Mongongo moko makasi euti na likoló ezongiseli ye ete: “Nasili kopesa yango nkembo mpe nakopesa yango nkembo lisusu.”​—Yoane 12:27, 28.

Bato oyo bazali wana bazwi mobulu na makanisi. Basusu bakanisi ete bayoki lokito ya nkake. Basusu balobi: “Anzelu moko alobi na ye.” (Yoane 12:29) Nzokande, bauti koyoka mongongo ya Yehova! Mpe ezali mbala ya liboso te bato báyoka mongongo ya Nzambe, ntango azali kolobela Yesu.

Mbula misato na ndambo liboso, na batisimo ya Yesu, Yoane Mobatisi ayokaki mongongo ya Nzambe ezali kolobela Yesu: “Oyo azali Mwana na ngai ya bolingo, oyo nandimi.” Nsima ya Elekeli ya mobu 32 T.B., Yesu abongwanaki na miso ya Yakobo, Yoane, mpe Petro. Bango misato mpe bayokaki Nzambe azali koloba: “Oyo azali Mwana na ngai ya bolingo, oyo nandimi; bóyoka ye.” (Matai 3:17; 17:5) Kasi, na mbala oyo ya misato, Yehova alobi na ndenge oyo bato mingi bayoki!

Yesu alobi: “Mongongo oyo ebimi mpo na ngai te, kasi mpo na bino.” (Yoane 12:30) Ezali elembo oyo emonisi ete azali mpenza Mwana ya Nzambe, Masiya oyo alakamaki.

Longola yango, lokola Yesu atikali sembo bomoi na ye mobimba, yango ezali ndakisa oyo bato basengeli kolanda mpe emonisi ete Satana Zabolo, mokonzi ya mokili, asengeli kobomama. Yesu alobi: “Sikoyo kosambisama ya mokili oyo ezali kosalema; sikoyo mokonzi ya mokili oyo akobwakama libándá.” Na esika ete liwa ya Yesu emonisa ete alongi te, yango ekozala nde elonga. Na ndenge nini? Alimboli: “Kasi ngai, soki natombolami na mabele, nakobenda bato ya ndenge nyonso epai na ngai.” (Yoane 12:31, 32) Na nzela ya liwa ya Yesu likoló ya nzete, akobenda bato mosusu epai na ye mpe akofungolela bango nzela ya bomoi ya seko.

Ntango ebele ya bato bayoki maloba Yesu alobi mpo na “kotombolama,” balobi: “Toyokaki na Mibeko ete Kristo akoumela libela na libela; kasi ndenge nini ozali koloba ete Mwana ya moto asengeli kotombolama? Mwana ya moto yango nde nani?” (Yoane 12:34) Atako bamoni bilembeteli wana nyonso, bayoki mpe mongongo ya Nzambe, mingi na bango bazali kondima te ete Yesu azali mpenza Mwana ya moto, Masiya oyo alakamaki.

Ndenge Yesu alobaki liboso, alobi lisusu ete azali “pole.” (Yoane 8:12; 9:5) Alobi na ebele ya bato: “Pole ekozala elongo na bino mpo na mwa ntango moke lisusu. Bótambola ntango bozali na pole, mpo molili elonga bino te. . . . Wana bozali na pole, bómonisa kondima na kati ya pole yango, mpo bókóma bana ya pole.” (Yoane 12:35, 36) Na nsima, Yesu alongwe wana, mpo mokolo ya 10 Nisana ezali te mokolo oyo asengeli kokufa. Na mokolo ya 14 Nisana na Elekeli, nde asengeli “kotombolama,” elingi koloba kobakama na nzete.​—Bagalatia 3:13.

Soki totali malamu, tokomona ete na boumeli ya mosala ya Yesu, Bayuda bandimelaki ye te. Yango ekokisaki esakweli oyo Yisaya asakolaki ete miso ya bato yango ekokufa mpe mitema na bango ekokóma makasi, yango wana bakolinga kobongwana te mpe bakobika te. (Yisaya 6:10; Yoane 12:40) Ya solo, lokola Bayuda mingi bazali motó makasi, baboyi kondima bilembeteli oyo emonisi ete Yesu azali Mobikisi na bango oyo alakamaki mpe nzela ya bomoi.

Nikodeme, Yozefe moto ya Arimatea, mpe bankumu mosusu mingi “bandimelaki” Yesu. Kasi, bakomonisa ete bazali na kondima to bakozonga nsima, mpo bazali kobanga ete bábengana bango na Sinagoga to mpo ‘bazali kolinga nkembo ya bato’?​—Yoane 12:42, 43.

Yesu alimboli oyo moto asengeli kosala soki andimeli ye: “Moto oyo andimeli ngai, andimeli kaka ngai moko te, kasi andimeli mpe oyo atindaki ngai; mpe moto oyo azali komona ngai azali mpe komona oyo atindaki ngai.” Mateya ya solo oyo Nzambe ateyaki Yesu mpe oyo Yesu azali kosakola ezali na ntina mingi, yango wana alobi: “Moto oyo azali kotyola ngai mpe azali koyamba maloba na ngai te azali na oyo akosambisa ye. Liloba oyo nalobi nde ekosambisa ye na mokolo ya nsuka.”​—Yoane 12:44, 45, 48.

Na nsima, Yesu asukisi: “Nalobaki na ndenge na ngai moko te, kasi Tata moto atindaki ngai apesaki ngai mitindo mpo na makambo nasengeli koyebisa mpe oyo nasengeli koloba. Lisusu, nayebi ete mitindo na ye elakisi bomoi ya seko.” (Yoane 12:49, 50) Yesu ayebi ete etikali moke asopa makila na ye, apesa yango mbeka, mpo na bato oyo bakondimela ye.​—Baroma 5:8, 9.