Ndenge nini kobɔkɔla bana mpo bázala na bizaleli malamu?

Zulunalo The Gazette ya Montréal, na Canada, elobaki boye: “Bana bayekolaka kopesa nzoto kilo mpe komipekisa, ntango baboti bazali kolinga bango mpe bazali kopesa bango disipilini.” Yango elimboli nini? Constance Lalinec, moto na mayele ya pisikoloji na Montréal, alobi ete ezali na ntina mingi ete baboti bápekisa mwana makambo mosusu oyo asengeli kosala te.

Lokola mosala ya Lalinec esɛngaka azalaka esika moko na bana na baboti, alobi ete “soki baboti bazali kotika te ete mwana amona mabe ya likambo ye asali, bazali kopekisa ye koyekola makambo mingi mosusu.” Kotika mwana asala nyonso oyo ye alingi ekoki mpenza kobebisa ye.

Banda kala, toli ya Biblia oyo etali kobɔkɔla bana ezali malamu mpenza mpe ebongi koleka toli nyonso mosusu. Elobi boye: “Tiká ete liloba na bino lizala, Ɛɛ! Ɛɛ! mpe Te! Te!” (Matai 5:37) Ntango bozali kotya mibeko kozanga kolekisa ndelo mpe bózali kosala ete bana bákanga ntina na yango, bósala ete bákakatana te na kotosa yango mpe basengeli kotosaka yango ntango nyonso. Bósuka kaka na koloba te, kasi bósalela mpenza makambo oyo bolobi. Yango ekosalisa bana báyeba mpenza ete mibeko ya baboti mpe makambo oyo bazali kosɛnga, ezali koteya bango ete: ‘Okobuka oyo ozali kolona.’ (Bagalatia 6:7; Baloma 2:6) Ntango baboti bazali kopesa disipilini oyo ebongi na bolingo nyonso, bazali na mokano ete bana báyekola kotosa mibeko, bándimaka mpasi mpe bándimaka ete bamposa na bango mosusu ekokisama nsima. Yango ekosalisa bango bálona bizaleli malamu oyo bazangaki mpo bákóma mikóló oyo babongi mpe oyo bayebi kokokisa mikumba na bango.

Ezali na toli mosusu oyo Nzambe apesi baboti mpo na ndenge ya kopesa bana na bango disipilini na bolingo nyonso. Okokuta yango na mokanda Sɛkɛlɛ́ ya bolamu na libota. Okoki kozwa mokanda yango ya nkasa 192, soki otondisi eteni ya lokasa oyo mpe otindi yango na adrɛsi oyo etyami awa to oyo ebongi na yo na lokasa 5 ya zulunalo oyo.