Eyaki na mopɛpɛ

Moto moko azalaki kotambola na balabala moko ya Mumbai, na Inde, ntango mopɛpɛ ebwakaki na makolo na ye lokasa moko oyo ezali na makambo bakomá. Lokasa yango ezalaki nde Nsango ya Bokonzi No 36, oyo ezalaki na motó ya likambo ete “Mbula nkóto ya sika​—⁠Mikolo oyo ezali koya ebombeli yo makambo nini?” Motó ya likambo yango ebendaki likebi na ye. Alokɔtaki lokasa yango mbala moko mpe atángaki yango mobimba. Asepelaki na nsango yango mingi, mpe lokola alingaki koyeba makambo mosusu, asɛngaki Biblia mpe mikanda mosusu.

Lokasa yango, oyo Batatoli ya Yehova nde babimisaki, ezali na makanisi oyo eyeisaka kondima makasi. Ezali kolimbola polele ete mikakatano ya lelo, lokola bamaladi, bobola mpe bitumba, eutaka na “lokoso, kozanga kotyelana motema mpe koluka matomba ya moto ye moko; bizaleli oyo, ezala sianse, tekiniki to bato ya politiki bakoki kolongola yango epai na biso te.” Trakte yango ezali mpe komonisa ete etikali moke, Nzambe akosilisa makambo nyonso ya mabe na mabelé mobimba.

Olingi koyeba makambo mingi oyo Biblia ezali kolaka mpo na mikolo ezali koya? Batatoli ya Yehova bateyaka bamilio ya bato Biblia na bandako na bango na lisalisi ya mikanda oyo elimbolaka Biblia, lokola mwa buku Nzambe azali kosɛnga nini epai na biso? Mwa buku yango ezali kopesa biyano na mituna lokola oyo: Nzambe azali nani? Mokano ya Nzambe mpo na mabelé ezali nini? Bokonzi ya Nzambe ezali nini? Ndenge nini Biblia ekoki kosalisa yo obongisa bomoi na yo ya libota?

Soki olingi ete Batatoli ya Yehova báya kotala yo na ndako mpo na kosalisa yo okanga ntina na makambo oyo etikali moke Nzambe asala, bakosepela mingi mpe bakomonisa yo makambo ebele oyo etali Bokonzi ya Nzambe. Tosɛngi yo otondisa eteni ya lokasa oyo ezali awa na nse mpo bákoka koya kosalisa yo.

□ Bótindela ngai mwa buku Nzambe azali kosɛnga nini epai na biso?

□ Bóya kotala ngai mpo na koyekola na ngai Biblia kozanga kofuta mbongo.