Nkoma ya batángi

Boombo Nayebi te ndenge ya kozongisela bino matɔndi mpo na masolo: “Ntango lolenge nyonso ya boombo ekosila!” (22 Yuni 2002, ebimeli ya lifalanse) Masolo yango esalisaki ngai na koyeba ete bato bakoki kokóma baombo ya biloko mingi, lokola bangi, makaya mpe lokuta. Ngai nazalaki moombo ya masano. Na motema na ngai nayebaki ete ezali mabe, kasi nazalaki kokoka kotika yango te. Likambo ya Richardo oyo bolobeli na masolo yango ebimisaki ngai mai na miso. Likambo yango esalisaki ngai na kondima ete soki moto asali makasi, akoki kolongwa na boombo ya ndenge wana. Natɔndi bino na ndenge bozali kobimisa masolo ya kolendisa ya ndenge wana oyo ezali kolobela makambo mpenza ya bomoi.

M. W., États-Unis

Bosato Natɔndi bino mpo na lisolo: “Bokonzi moko endimi bonsomi ya mangomba na eleko oyo bonsomi ezalaki te.” (22 Yuni 2002, ebimeli ya Lifalanse) Nasepelaki mingi ntango natángaki lisolo ya Sigismond oyo akɔtelaki bato oyo bandimaka Bosato te ntango bazalaki kobimisa makanisi na bango mpe ndenge oyo Église unitarienne endimamaki na mibeko ya Leta. Nasepelaki mpe lisusu mingi na ndenge oyo Francis Dávid abimisaki bilembeteli ya makasi mpo na kokweisa liteya ya Bosato. Likambo yango etindaki ngai nakanisa lisusu mpiko oyo ntoma Paulo azalaki na yango. Mbala mingi, masolo oyo elobelaka makambo ya kala esepelisaka ngai mpenza te, kasi nazali komeka koluka koyeba makambo mingi mpe kosepela na nyonso oyo “moombo ya sembo mpe ya mayele” azali kopesa biso na kati ya bazulunalo na biso. (Matai 24:​45-47) Lisolo oyo bokomi yango mpenza malamu mpe ezali mozindo. Esepelisaki ngai mingi.

M. C., États-Unis

Natángaki lisolo na bino oyo ezali mpenza malamu mingi, oyo ezali komonisa ete liteya ya Bosato ezali ya solo te. Na mikolo oyo, biso tozali kotalela liteya ya Bosato na lingomba na biso. Kobanda kala, ngai nandimaka ete liteya ya Bosato ezali liteya ya lokuta. Nasɛngi bino bótindela ngai Lamuká! oyo 15 mpo nákabola yango.

A. O., Allemagne

Matiti Napesi bino matɔndi mpo na lisolo: “Matiti​—⁠ezali kaka langi ya mai pondu te oyo ozali konyata!” (8 Yuni 2002, ebimeli ya Lifalanse) Nakangi sikoyo ntina ya likambo oyo ete Yehova Nzambe asalá matiti mpo ebatelaka biloko nyonso ya bomoi awa na mabelé. Ndenge moto moko ya mayele oyo ayekolaka banzete alobaki yango, matiti ezali “lokola esika ya kobomba biloko mpo bato bakufa na nzala te.” Yehova azali Moyemi Monene, yango esalisaki ngai nákanga ntina ya bizaleli oyo ya Yehova: bolingo, bwanya, boyengebene mpe nguya, bizaleli oyo matiti ezali komonisa yango polele.

K. O., Japon

Ya mwana moko Nazali na mbula 9 mpe nazali na kelasi ya minei na eteyelo ya ebandeli. Nalingi kotɔnda bino mpo na masolo kitoko oyo bobimisaka na bazulunalo na bino. Masolo oyo elobelaki “Bafɛti oyo bato bameseni na yango mingi: ebombaka makama nini?” (8 Ɔkɔtɔbɛ 2001, ebimeli ya Lifalanse) esalisaki ngai mingi. Napesaki molakisi ya biso ya Lingelesi zulunalo yango moko. Asalelaki makambo oyo ezali na mwa motó ya likambo moke ya lisolo: “Kowelana ya mangomba” mpe apesaki yango devuare na kelasi. Asepelaki mingi na mateya ya polele oyo ezalaki na masolo yango. Natɔndi bino mpo na nyonso oyo bozali kokoma mpo na kolendisa biso mpe kobatela biso.

N. R., Italie

Matɔndi Nasepelaka mingi ndenge bokomaka masolo etali makambo mosusu ya sikisiki, lokola oyo elobelaka banyama. Na libota na biso, nazali kaka ngai moko Motatoli ya Yehova mpe ata moto moko te ya libota na biso amekaka ata kotánga mikanda na biso. Bakanisaka ete elobelaka kaka makambo ya lingomba. Nzokande, masolo wana ezalaka mpenza kitoko mpo na kotánga mpe emonisaka Mozalisi na ndenge oyo ata bato oyo bazali Batatoli te bakoki kotánga yango. Matɔndi mingi mpo na mosala ya malamu mpenza oyo bozali kosala mpe bazulunalo ya kitoko oyo bozali kobimisa.

T. C., États-Unis