“Soki báyebaka yango!”

NSIMA ya kosilisa eteyelo ya ntei, bilenge mingi bamityelaka mikano ya koluka kozala na biloko mingi; kasi David, ye azalaki na makanisi mosusu. Na sanza ya Sɛtɛmbɛ 2003, ye ná moninga na ye moko, batikaki etúká ya Illinois, na États-Unis, mpe bakendaki kofanda na République dominicaine.a Davey, ndenge baninga na ye mpe bandeko na ye bazalaki kobenga ye, azwaki ekateli ya koyekola monɔkɔ ya Espagnole mpe kokende na lisangá ya Batatoli ya Yehova ya Navas mpo na koteya Biblia elongo na bandeko ya lisangá yango. Bayambaki ye malamu. Juan, nkulutu kaka moko ya lisangá yango, alobi boye: “Davey azalaki kosala makambo nyonso oyo bazalaki kosɛnga ye. Azalaki ntango nyonso komipesa na kosalisa bandeko, mpe bandeko balingaki ye mingi.”

Davey alingaki mboka yango mingi. Akomelaki moninga na ye moko na États-Unis boye: “Nazali na bomoi moko ya malamu mpenza awa. Mosala ya kosakola ezali kosalema malamu! Na porte mokomoko, tozali kosolola miniti soki 20, mpo bato bazali na mposa ya koyoka nyonso oyo tolingi koyebisa bango. Nabandi koyekola Biblia na bato motoba, kasi tozali kaka na mposa ya lisalisi. Na lisangá na biso basakoli ya Bokonzi bazali 30, kasi na likita moko tozalaki bato 103!”

Likambo ya mawa, na mokolo ya 24 sanza ya Aprili 2004, Davey ná elenge mosusu ya lisangá yango, bakufaki na likama moko. Tii na liwa na ye, Davey azalaki kosepela mingi na mosala oyo azalaki kosala mpe alendisaki bilenge mosusu ya mboka na bango báya kosala esika moko na ye. Alobaki na elenge Motatoli moko boye: “Okokóma kotalela makambo na ndenge mosusu.”

Na ndakisa, ye moko Davey akómaki kotalela biloko ya mokili na ndenge mosusu. Tata na ye alobi boye: “Mokolo moko ntango Davey ayaki kotala biso, babengaki ye mpo bákende kosala lisano ya ski (kosakana likoló ya mbula-mpɛmbɛ). Atunaki soki yango ekosɛnga mbongo boni. Ntango bayebisaki ye motuya yango, Davey alobaki ete akoki kobebisa mbongo mingi bongo te kaka mpo na lisano wana, nzokande mbongo wana ekoki kosalisa ye basanza mingi na République dominicaine!”

Molende oyo Davey azalaki na yango esimbaki mitema ya bato mosusu mingi. Na mboka oyo Davey autaki, elenge mwasi moko alobaki ete: “Ntango nayokaki makambo nyonso oyo Davey azalaki kosala mpe esengo oyo azalaki na yango, namonaki ete ngai mpe nakoki kosala lokola ye. Liwa ya Davey etindaki ngai nakanisa oyo bato bakoloba mpo na ngai soki nakufi mpe soki ngai nakozala na bopusi ya malamu na bomoi na bango.”

Lokola baboti mpe bandeko ya Davey bazali Batatoli ya Yehova, bandimi mpenza ete Nzambe akosekwisa Davey na mokili ya sika ya boyengebene oyo ekómi pene. (Yoane 5:28, 29; Emoniseli 21:1-4) Liboso ntango yango ekóma, lokola bayebi ete Davey alekisaki bomoi na ye na mosala oyo eleki malamu​—kosalela Mozalisi na ye—​yango ezali kolendisa bango mingi. (Mosakoli 12:1) Mokolo moko, ntango Davey azalaki kolobela ekateli oyo azwaki ya kokende kosala epai mposa ya basakoli ezali mingi, alobaki ete: “Nalingi ete bilenge nyonso básala mosala oyo mpe báyoka ndenge ngai nazali koyoka. Ezali na likambo moko te oyo eleki kosalela Yehova na nyonso oyo tozali na yango. Soki báyebaka yango!”

[Maloba na nse ya lokasa]