Engebene Biblia
Nzambe azalaka bisika nyonso?
BATO balobaka mpenza solo ntango balobaka ete Nzambe azali na nguya nyonso mpe ayebi makambo nyonso. Nzokande, ntango bato mosusu balukaka kolimbola bonene ya Nzambe, babakisaka likambo ya misato—balobaka ete Nzambe azalaka mpe bisika nyonso mbala moko.
Biblia eteyaka mpenza ete Nzambe azali na nguya nyonso mpe ayebi makambo nyonso. (Genese 17:1; Baebele 4:13; Emoniseli 11:17) Nzambe azali mpenza na nguya ezangi nsuka, mpe ayebi makambo nyonso na ndenge oyo ete eloko moko te ekoki kobombama liboso na ye. Kasi, Nzambe azalaka bisika nyonso, to azali nde moto oyo azali na esika mpenza oyo afandaka?
Nzambe azalaka wapi?
Na bavɛrsɛ mingi ya Biblia, balobi ete “likoló” ezali “efandelo” ya Nzambe to esika oyo afandaka. (1 Mikonzi 8:39, 43, 49; 2 Ntango 6:33, 39) Nzokande, lisolo moko ya Biblia elobeli bonene ya Yehova Nzambe na maloba oyo: “Solo Nzambe akofanda esika moko na bato na kati ya mokili? Talá, lola mpe likoló ekoki kozingela yo te.”—2 Ntango 6:18.
Biblia elobi ete: “Nzambe azali Elimo.” (Yoane 4:24) Yango wana, afandaka na esika ya elimo, oyo ezali kati na molɔ́ngɔ́ te. Ntango Biblia elobaka ete “likoló” ezali esika Nzambe afandaka, ezali mpo na komonisa ete esika yango ezali likoló mpenza koleka esika oyo biso bato tofandaka. Likambo eleki ntina, Biblia eteyaka ete esika Nzambe afandaka, atako ekeseni mpenza na molɔ́ngɔ́, kasi ezali mpenza esika moko ya solosolo.—Yobo 2:1-2.
Nzambe azali moto
Yesu alobelaki esika oyo Yehova afandaka ntango alobaki na bayekoli na ye ete: “Na ndako ya Tata na ngai bisika ya kofanda ezali mingi. . . . Nazali kokende kobongisela bino esika.” (Yoane 14:2) Yesu akendaki wapi? Nsukansuka, “akɔtaki . . . na kati ya likoló mpenza, mpo na komonana sikoyo liboso ya Nzambe mpenza mpo na biso.” (Baebele 9:24) Lisolo oyo eteyi biso makambo ya ntina mibale mpo na Yehova Nzambe. Ya liboso, azali na esika mpenza oyo afandaka, mpe ya mibale, azali moto, kasi azali te nguya moko boye oyo bakoki kolimbola yango te, oyo ezalaka bisika nyonso.
Ezali mpo na yango nde Yesu ateyaki bayekoli na ye bábondelaka boye: “Tata na biso na likoló”; basengelaki kosalaka mabondeli na bango epai ya moto, Yehova, oyo azali na esika oyo afandaka, elingi koloba esika ya elimo oyo Biblia ebengi yango “likoló.” (Matai 6:9; 12:50) Liteya yango eyokanaki na lolenge oyo bateyaki libota ya Nzambe bábondelaka, bambula koleka 1 500 liboso. Makomami ya libosoliboso oyo epemamaki na Nzambe ezali na libondeli oyo: “Talá na nse longwa na ndako na yo ya bulɛɛ na likoló, mpe pambolá bato na yo.”—Deteronome 26:15.
Elimo santu ya Nzambe esalaka na bisika nyonso
Atako Biblia elobaka ntango nyonso ete Nzambe azali na esika na ye mpenza oyo afandaka, mbala mingi elobaka mpe ete elimo santu na ye ezali bisika nyonso. Mokomi ya nzembo Davidi atunaki boye: “Epai wapi nakoki kokende mpo nazala mosika na elimo na yo, mpe epai wapi nakoki kokima mpo nazala mosika na elongi na yo?” (Nzembo 139:7, NW ) Lokola bato mosusu bazali kokanga ntina ya bavɛrsɛ ya ndenge wana malamu te, bazali kokanisa ete Nzambe azalaka bisika nyonso. Kasi, soki totaleli bavɛrsɛ oyo ezali liboso mpe nsima ya vɛrsɛ yango mpe bavɛrsɛ mosusu, tokomona polele ete, Yehova akoki kotinda elimo santu na ye—to nguya na ye oyo esalaka mosala—longwa na esika oyo afandaka, tii ata na esika nini na molɔ́ngɔ́.
Kaka ndenge tata akoki kosembola lobɔkɔ na ye mpo na kobɔndisa bana na ye to kosalisa bango, ndenge moko mpe Yehova akoki kosembola lobɔkɔ na ye—to elimo santu—na esika nyonso na molɔ́ngɔ́ to na bisika oyo emonanaka te mpo na kokokisa mokano na ye. Yango wana mokomi ya nzembo alobaki: “Soko nakamati mapapu na ntɔngɔntɔngɔ, mpe napumbwi bobele na nsuka na mai-na-monana, kuna lobɔkɔ na yo ekokamba ngai, lobɔkɔ na yo na mobali ekosimba ngai.”—Nzembo 139:9, 10.
Okoki kozala moninga ya Nzambe
Lokola Yehova Nzambe azali na komikitisa mpe na bolingo, atiki ete bálimbola malamu bomoto na ye mpe esika afandaka na elobeli ya bato. Na ndenge yango mpe na ndenge mosusu, ezali lokola nde ‘amikitisaka mpo na kotala, epai na lola mpe kati na nse.’ (Nzembo 113:6) Atako bongo, moto akoki te koyeba makambo nyonso ya bomoto ya Nzambe.
Yehova aleki na nkembo, aleki monene, mpe aleki kokamwisa na boye ete maloba oyo bato basalelaka ekokoka te kolimbola malamumalamu lolenge na ye. Na yango, atako Makomami elobaka ete likoló epai afandaka ezali mpenza esika moko ya solosolo, biso bato tokoki te koyeba malamumalamu ndenge esika yango ya elimo ezalaka.—Nzembo 139:6.
Atako bongo, koyeba makambo mwa mingi oyo etali ndenge mpenza Yehova azalaka, kokanga ntina ete azali nguya moko boye te oyo bakoki kolimbola yango te, oyo ezalaka kati na biloko nyonso na molɔ́ngɔ́, ezalaka libɔndisi monene. Azali nde moto, oyo azali na esika mpenza afandaka mpe azali na bizaleli na ye, mingimingi bolingo mpe boboto. Koyeba makambo yango epesi moto nyonso libaku oyo eleki monene—libaku ya kozala ntango nyonso moninga ya Moyangeli ya molɔ́ngɔ́ mobimba oyo azali Mozwi-ya-Nguya-Nyonso.—Yakobo 4:8.