Engebene Biblia
Yesu azalaki mpenza Mwana ya Nzambe?
NTOMA Petelo atyaki ntembe ata moke te ntango alobaki na Yesu ete: “Ozali Klisto, Mwana ya Nzambe ya bomoi.” (Matai 16:16) Wana ezali kaka vɛrsɛ moko kati na bavɛrsɛ mingi ya Biblia oyo emonisi ete Yesu azali Mwana ya Nzambe; kasi bato oyo basambelaka balimbolaka likambo yango moto na moto na ndenge na ye.
Bato mingi oyo bandimaka ete Yesu Klisto azali Nzambe bayebaka te kolimbola mpo na nini babengaka ye Mwana ya Nzambe. Soki tokanisi malamu, akoki te kozala mbala moko Nzambe mpe Mwana ya Nzambe. Bato mosusu bakanisaka ete Yesu azalaki moto moko ya lokumu na ntango ya kala, moto ya mayele, ntango mosusu mosakoli ya solo ya Nzambe, kasi esuki kaka bongo. Biblia eteyaka mpenza nini? Yo mpe okanisaka bongo?
Mwana ya liboso ya Nzambe
Biblia emonisi ete ezalaki na eleko oyo Nzambe azalaki ye moko. Na bolingo na ye, azwaki ekateli ya kosala bikelamu mosusu mpo bázala mpe na bomoi, yango wana akómaki Tata, kasi te ndenge bato bakómaka batata. Yehova asalelaki nguya na ye ya kozalisa, oyo ezali na nsuka te, mpo na kosala ekelamu moko ya bomoi, ekelamu ya elimo mpe ya mayele, “ebandeli ya bozalisi ya Nzambe,” oyo ayebani lelo na nkombo Yesu Klisto. (Emoniseli 3:14; Masese 8:22) Lokola Nzambe ye moko azalisaki Yesu ntango azalaki ye moko, azali na lotomo ya kobengama “mwana mobotami-se-moko” mpe “mwana ya liboso na bozalisi nyonso.”—Yoane 1:14; Bakolose 1:15.
Na bongo, emonani polele ete Yesu oyo azali ebandeli ya bozalisi ya Nzambe, akokaki te kozala Mozalisi, “Nzambe kaka moko.” (1 Timote 1:17) Kasi, Yehova nde apesaki Mwana na ye mikumba mingi. Na ndakisa, na nzela ya Yesu, Nzambe akelaki “biloko mosusu nyonso,” ata mpe baanzelu. Baanzelu yango babengami “bana ya Nzambe” mpamba te Yehova nde apesaki bango bomoi.—Bakolose 1:16; Yobo 1:6; 38:7.
Nsima ya kobongisa mabelé mpo ekóma esika ya kofanda mpo na bato, emonani ete ezali epai ya Mwana na ye ya liboso nde Nzambe alobaki boye: “Tiká tózalisa moto na lolenge na biso.” (Genese 1:26 NW; Masese 8:22-31) Na yango, ezali na nzela ya ekelamu ya elimo oyo na nsima akómaki Yesu, nde Yehova akelaki Adama moto ya liboso, oyo azalaki mpe mwana ya Nzambe.—Luka 3:38.
Yesu akómi Mwana ya Nzambe na nzoto ya mosuni
Ntoma Yoane ayebisi biso ete na ntango oyo etyamaki, Mwana ya Nzambe ya elimo “akómaki mosuni mpe afandaki na kati na biso.” (Yoane 1:14) Mpo na kobongola nzoto ya Yesu ya elimo ekóma nzoto ya mosuni, Nzambe alongolaki bomoi na ye na likoló na ndenge ya likamwisi mpe atyaki yango na libumu ya Malia, elenge mwasi Moyuda oyo ayebaki naino mibali te. Na ndenge wana nde Yesu atikalaki kaka Mwana ya Nzambe atako akómaki moto. Lisusu, lokola Nzambe nde apesaki ye bomoi, kasi moto mosusu te, Yesu abotamaki moto ya kokoka, kozanga lisumu. Anzelu Gabriele alobaki na Malia ete: “Oyo akobotama akobengama mosantu, Mwana ya Nzambe.”—Luka 1:35; Baebele 7:26.
Tata ye moko andimaki Yesu lokola mwana na ye ntango azalaki na nzoto ya mosuni. Na batisimo ya Yesu, Yoane Mobatisi alobaki ete likoló efungwamaki mpe ayokaki mongongo moko euti na likoló oyo elobaki ete: “Oyo azali Mwana na ngai, molingami, oyo nandimi.” (Matai 3:16, 17) Tokoki kokamwa te soki Yoane ayebisaki bayekoli na ye ete: “Namonaki yango, mpe natatoli ete oyo azali Mwana ya Nzambe.”—Yoane 1:34.
Na mosala na ye ya kosakola awa na mabelé, Yesu alingaki te komimonisa polele ete azali Masiya, Mwana ya Nzambe. (Malako 8:29, 30) Mbala mingi, azalaki kotika bato bango moko báyeba ye na nzela ya mateya na ye oyo bazalaki koyoka, na ndenge ya bomoi na ye mpe na bikamwiseli oyo mbala mingi azalaki kosala na miso ya bato nyonso. Na ndakisa, abikisaki “baoyo nyonso bazalaki koyoka nzoto malamu te, banyokwami na bamaladi mpe na minyoko ya ndenge na ndenge.” (Matai 4:24, 25; 7:28, 29; 12:15) Bato bakufá miso, bato bakufá matoi, batɛngumi mpe bato ya maladi, bango nyonso bazalaki koya epai ya Yesu mpe azalaki kobikisa bango. Asekwisaki mpe ata bato oyo bakufaki! (Matai 11:4-6) Bayekoli na Yesu bamonaki ye azali kosala makamwisi, lokola kotambola likoló ya mai mpe kopekisa mopɛpɛ mpe mbonge ntango mai etombokaki makasi. Elembeteli wana monene ya kokamwa etindaki bayekoli báloba ete: “Ozali mpenza Mwana ya Nzambe.”—Matai 14:24-33.
Ndenge oyo okoki kozwa matomba mpo na Mwana ya Nzambe
Mpo na nini Nzambe alongolaki Mwana na ye mobotami-se-moko na likoló mpo aya na mabelé, mpe nsukansuka akufa liwa ya nsɔmɔ? “Mpo moto nyonso oyo azali komonisa kondima na kati na ye abomama te kasi azala na bomoi ya seko.” (Yoane 3:16) Ya solo, Yesu akokaki “kopesa molimo na ye lisiko na esika ya bato mingi” kaka soki akufi. (Matai 20:28) Ezali solo ete bandá mokili ebandá, moto moko te amonisá bolingo mingi koleka oyo ya Yehova mpe ya Mwana na ye ya liboso.—Baloma 8:32.
Nsima ya liwa na ye, Yesu “atángamaki Mwana ya Nzambe” na ndenge ya ntina mingi mpe ya nguya, “na nzela ya lisekwa na bakufi,” azongisamaki na bomoi lokola Mwana ya Nzambe ya elimo. (Baloma 1:4;1 Petelo 3:18) Nsima ya kozela na motema mobimba pembeni ya Tata na ye bikeke soki 19, Yesu akómaki Mokonzi ya Bokonzi ya Nzambe: boyangeli ya likoló oyo mosika te ekoyangela mabelé mobimba.—Nzembo 2:7, 8; Danyele 7:13, 14.
Okosepela ete Mwana ya Nzambe, oyo azali na nguya andima yo? Soki ezali bongo, tolendisi yo oyekola mateya na ye mpe osalela yango na bomoi na yo. Yesu ye moko alobaki boye: “Oyo elakisi bomoi ya seko, báyekola koyeba yo, Nzambe kaka moko ya solosolo, mpe moto oyo yo otindaki, Yesu Klisto.” (Yoane 17:3) Ya solo, komonisa kondima epai ya Mwana ya Nzambe ezali na ntina mingi.—Yoane 3:18; 14:6; 1 Timote 6:19.
OSILÁ KOMITUNA?
◼ Mpo na nini Yesu abengami Mwana mobotami-se-moko ya Nzambe?—Yoane 1:3, 14; Emoniseli 3:14.
◼ Mpo na nini okoki kondima ete Yesu azali Mwana ya Nzambe?—Matai 3:16, 17.
◼ Matomba nini okoki kozwa soki ondimi ete Yesu azali Mwana ya Nzambe?—Yoane 3:16; Yoane 14:6; 17:3.
[Bililingi na lokasa 12]
Mateya ya bwanya oyo Yesu ateyaki mpe makamwisi minene oyo asalaki emonisi ete akesanaki na bato nyonso