Okoki kozwa esengo ya solosolo!

EMONANI ete na mokili mobimba, bato mingi bakanisaka ete mpo na kozala na esengo, esengeli kozala na motuka ya ntalo, na mbongo mingi, na mosala ya mbongo mingi, na ndako ya monene, na bamasini oyo ezali kobima sika, mpe kozala kitoko to makasi. Kasi, makambo oyo tolobeli awa epesaka mpenza esengo?

Zulunalo moko (Time) elobi ete “bato mingi bayekoli likambo ya kozala na esengo, na elikya, na makanisi malamu mpe na nzoto kolɔngɔnɔ.” Makambo oyo bato yango bamonaki, ezali kokamwisa mpenza. Bato nyonso oyo bayekolaki likambo yango bamoni solo ete, bato oyo bakanisaka ete mbongo, lokumu to kitoko epesaka esengo, bazali komikosa. Kutu, bazali nde kokɔtisa bomoi na bango na nzela oyo ekomemela bango mitungisi mpe maladi ya makanisi.

Na États-Unis, bato ebele bakómi na bozwi koleka ndenge ezalaki liboso. Zulunalo moko (Time) elobi mpo na bato yango boye: “Kasi yango epesi biso esengo ata moke te koleka oyo tozalaki na yango.” Na ntembe te, tokoki mpe koloba bongo mpo na bato ya mikili mosusu. Ata na Chine, epai bato mingi bazali kokóma na bozwi noki, ezali mawa komona ete, bato mingi bazali na esengo te. Zulunalo moko oyo ebimaka mbala minei na mbula (Access Asia) elobi ete “bilenge ya mbula 15 kino 34 oyo bazali kokufa bazali nde komiboma.” Moko ya makambo oyo ezali kotinda bilenge wana bámiboma ezali ete bazali kotya bango mpanzi likoló mpo bázwa misala oyo ekopesa bango mbongo mingi.

Emonani ete bomɛngo esilisaka mitungisi ya bomoi te; kutu ebakisaka yango nde kobakisa. Ankɛti oyo basalaki na iniversite moko emonisi ete: “Makambo oyo tosalaka mokolo na mokolo nde ekómi komemela biso mitungisi mpe mobulu na makanisi.” Van Wishard, moto moko ya mayele, alobaki ete “bakompanyi ya asiransi ekómi kobimisa mbongo mingi nde mpo na kosalisa bato oyo bazali na maladi ya motó mpe ya makanisi.”

Ata bana mike mpe bazali konyokwama ndenge mokili ezali kobongwana nokinoki. Van Wishard abakisi ete mikolo oyo, babimisi babuku oyo ezali kopesa bana ya mbula 8 toli “mpo báyeba makambo oyo emonisaka ete moto azali na maladi ya makanisi.” Mokanda moko elobi ete na mikili mingi ya Mpoto, na mbula moko, bana mingi (23 %) bazali kobɛla maladi ya makanisi. Longola yango, “bankisi ya maladi ya makanisi oyo ezali kosombama mingi ezali nde ya bana oyo bakɔti naino kelasi te.”

Bato bakómi kobanga mingi, kaka te mpo na mikakatano ya nkita, kasi mpe mpo na makambo mabe oyo ekoki kobima na mikolo ezali koya mpo bato mosusu bamipesi na politiki mpe na mangomba na ndenge ya mabe. Nini ekoki kosalisa bango bátika kobanga?

Eleki mbula soki nkóto mibale, Yesu Klisto apesaki toli oyo ekoki kosalisa moto azala na bomoi ya malamu mpe amitungisa mingi te. Toli yango ezali na liteya ya moke kasi ya ntina mingi. Alobaki ete: “Esengo na baoyo bayebi bobola na bango ya elimo.” (Matai 5:⁠3) Ya solo, Yesu azalaki kolendisa bato oyo bazalaki koyoka ye báluka koyeba malamu Mozalisi mpe mokano na ye mpo na bato, yango nde likambo oyo eleki ntina na bomoi ya moto.

Ndenge tokomona yango na masolo oyo elandi, liteya yango ekosalisa biso tóyeba likambo oyo ezali mpenza na ntina mpo tókóma na esengo mingi mpe na bomoi oyo ezali na ntina. Koyeba liteya yango ekosalisa mpe biso tózala na elikya ya sololosolo mpo na mikolo ezali koya.

[Likanisi ya paragrafe na lokasa 3]

Bozwi epesaka mpenza esengo?