Ndenge nini okoki kozongisa kimya na basusu?

BIBLIA elobi mpo na bato ete: “Bato nyonso basali lisumu mpe bakómaka na nkembo ya Nzambe te.” (Baroma 3:23) Lokola bato koleka miliare nsambo oyo bazali na mokili bazali bato ya kozanga kokoka, matata ezangaka te. Ndenge nini tokoki kozongisa kimya soki matata ebimi?

Biblia epesi toli ya malamu. Elobeli Mozalisi na biso oyo nkombo na ye ezali Yehova ete azali “Nzambe ya kimya.” (Baebre 13:20; Nzembo 83:18) Nzambe alingi ete bana na ye oyo bazali awa na mabele báfanda na kimya. Mpe na likambo yango ye moko azali ndakisa. Ntango mobali mpe mwasi ya liboso basalaki lisumu epai ya Nzambe, babebisaki boyokani na bango na ye; mbala moko Nzambe azwaki bibongiseli mpo na kozongisa boyokani na bato oyo akelaki. (2 Bakorinti 5:19) Tótalela makambo misato oyo okoki kosala mpo na kozongisa kimya na basusu.

Limbisáká na motema moko

Biblia elobi nini? “Bókoba kokanga motema moto na moto na makambo ya mosusu mpe kolimbisana na motema moko soki moko na bino azali na likambo ná mosusu. Kaka ndenge Yehova alimbisaki bino na motema moko, bino mpe bósala bongo.”​—Bakolose 3:13.

Mokakatano ezali wapi? Ntango mosusu “likambo” oyo basali yo ezali mpenza mabe mpe omoni ete osengeli kokata boyokani na moto oyo asali yo mabe. Okoki mpe mbala mosusu kokanisa ete esengeli nde moto oyo asali yo mabe asɛnga bolimbisi liboso. Kasi, soki moto yango ayebi te ete asalaki mabe, to akanisi ete yo nde ozali na foti, matata na bino ekosila te.

Okoki kosala nini? Landá toli ya Biblia oyo esɛngi kolimbisa na motema moko, mingimingi soki likambo yango ezali moke. Kobosana te ete soki Nzambe atángaka mabunga na biso nyonso, tokoki te kotɛlɛma liboso na ye. (Nzembo 130:3) Biblia elobi ete “Yehova azali na motema mawa mpe na ngɔlu, ayokaka nkanda noki te mpe atondi na motema boboto. Mpo ye moko ayebi malamu ndenge oyo tosalemá, azali kobosana te ete tozali putulu.”​—Nzembo 103:8, 14.

Talelá mpe toli oyo ya Biblia: “Mayele ya kososola oyo moto azali na yango ekitisaka mpenza nkanda na ye, mpe kitoko na ye ezali ete alimbisaka likambo oyo ebuki mibeko.” (Masese 19:11) Mayele ya kososola esalisaka biso tótalela likambo na mozindo mpo na koyeba ntina oyo etindi moto aloba to asala likambo boye to boye. Na yango, omituna boye, ‘Moto yango alɛmbaki, azalaki maladi, to mitungisi elekaki ye motó?’ Koyeba makanisi ya moto, ndenge azali koyoka mpe makambo oyo azali kokutana na yango, ekoki kokitisa nkanda na yo mpe ekosalisa yo olimbisa mabunga na ye.

Bósolola

Biblia elobi nini? “Soki ndeko na yo asali lisumu, kende komonisa ye libunga na ye, yo ná ye kaka. Soki ayokeli yo, ozongisi ndeko na yo na nzela ya malamu.”​—Matai 18:15.

Mokakatano ezali wapi? Makambo lokola kobanga, nkanda mpe nsɔni ekoki kopekisa yo okutana na moto oyo asali yo mabe mpo bósilisa likambo. Ntango mosusu tokoki koluka koyebisa basusu likambo yango mpo bákɔtela biso, kasi kosala bongo ezali lokola kobwaka mafuta na mɔtɔ.

Okoki kosala nini? Soki likambo yango ezali monene mpe okanisi ete okokoka te kolekisa yango, kende kokutana na moto yango mpo bósolola. Meká kosala boye mpo na kosilisa likambo yango:

(1) Kolekisa ntango te: Kozongisa makambo lobi te. Soki osali bongo, likambo ekokóma nde monene. Luká kosalela toli ya Yesu oyo elobi ete: “Soki omemi likabo na yo na etumbelo mpe kuna okanisi ete ndeko na yo azali na likambo ná yo, tiká likabo na yo kuna liboso ya etumbelo, mpe kende; liboso yokaná yo na ndeko na yo, mpe na nsima, ntango okozonga, pesá likabo na yo.”​—Matai 5:23, 24.

(2) Bózala kaka bino mibale: Boyá ezaleli kolobaloba likambo yango epai ya bato mosusu. “Sambá likambo na yo na moninga na yo, mpe kobimisa te lisolo ya nkuku ya moto mosusu.”​—Masese 25:9.

(3) Bósolola na kimya: Boyá ezaleli ya koluka koyeba nani azali na foti. Mokano na yo esengeli kozala ya kozongisa kimya, kasi te ya komilongisa. Meká kosalela liloba “ngai” na esika ya “yo.” Na esika oyebisa moto ete “Yo, oyokisi ngai mpasi!” ekozala malamu nde oloba: “Ngai, nayoki mpasi mpo . . .” Biblia emonisi likambo yango boye: “Tólanda makambo oyo etyaka kimya mpe makambo oyo elendisaka biso.”​—Baroma 14:19.

Zalá motema molai

Biblia elobi nini? “Bózongisela moto mabe na mabe te. . . . Kasi, ‘soki monguna na yo azali na nzala, pesá ye eloko alya; soki azali na mposa ya mai, pesá ye mai amɛla.’”​—Baroma 12:17, 20.

Mokakatano ezali wapi? Soki na ebandeli, moto oyo okei kokutana na ye aboyi bózongisa kimya, mbala mosusu okoki komona ete otika.

Okoki kosala nini? Zalá motema molai. Bato nyonso basilikaka ndenge moko te, ndenge moko mpe bato nyonso bazali na makoki ndenge moko te. Esɛngaka bato mosusu ntango mingi mpo nkanda na bango ekita; bamosusu bazali naino koyekola ndenge ya komonisa bizaleli ya Nzambe. Kobá komonisela bango boboto mpe bolingo. Biblia elobi ete: “Kotika mabe elonga yo te, kasi saláká malamu mpo na kolonga mabe.”​—Baroma 12:21.

Mpo na kozongisa kimya na basusu, tosengeli kozala na komikitisa, mayele ya kososola, motema molai mpe bolingo. Kasi, ebongi mpenza kosala nyonso mpo na kozala kimya na basusu!

OSILÁ KOMITUNA?

● Nini ekoki kosalisa yo olimbisa moto na motema moko?​—Bakolose 3:13.

● Nini ekoki kosalisa yo okende kokutana na moto oyo bozwani matata mpo bósolola?​—Matai 5:23, 24.

● Okoki kosala nini soki milende na yo mpo na kozongisa kimya esimbi te?​—Baroma 12:17-21.

[Likanisi ya paragrafe na lokasa 11]

“Mayele ya kososola oyo moto azali na yango ekitisaka mpenza nkanda na ye, mpe kitoko na ye ezali ete alimbisaka likambo oyo ebuki mibeko.”​—MASESE 19:11