Mituna oyo bilenge batunaka
Mpo na nini kokende na makita ya lisangá?
OSEPELAKA KOYANGANA NA MAKITA YA LISANGÁ?
ƐƐ → KOBÁ KOSALA BONGO
TE → OKOSALA NINI MPO NA YANGO?
BIBLIA epesi bakristo etinda báyanganaka elongo mpo na kosambela. (Baebre 10:25) Kasi okosala nini soki makita esepelisaka yo te? Bongo soki ekómelaka yo obanda kokanisakanisa makambo oyo okokaki kosala soki ozalaki esika mosusu? Mpo na kobongola ezaleli yango, salelá likanisi moko to mingi na kati ya makanisi oyo elandi.
1. YANGANÁKÁ NA MAKITA NYONSO
Vɛrsɛ oyo ekosalisa yo: “Bato mosusu na kati na bino babandi koboya kosangana; bósala boye.”—Baebre 10:25, Bible na lingala ya lelo oyo.
Mpo na nini kosala mbala na mbala likambo moko oyo osepelaka na yango te? Mpo soki osali bongo, okobanda kosepela na yango! Kanisá naino: Soki osalaka lisano moko mbala na mbala te, okanisi ete okoyeba yango malamu to okosepela mpenza na yango? Ezali mpe bongo mpo na makita ya lisangá. Soki ozali kokende mbala na mbala na makita ekosepelisa yo mpe okokóma na boninga makasi na Nzambe. Yango ekosala ete ozangisaka te!—Matai 5:3.
Likanisi: Nsima ya makita nyonso, yebisá ata ndeko moko oyo asalaki lisolo makambo oyo esepelisi yo na lisolo na ye. Komá litomba moko ozwi mpo oyanganaki na makita. Mpe lokola makambo mingi oyo elobamaka na makita etali mosala na biso ya kosakola, zalá na mokano ya kobongisa lolenge ya koyebisa bato kondima na yo. Yango ekosalisa yo omona ete makambo oyo elobamaka na makita ezali na ntina mpo na yo.
“Banda bomwana, bateyaki ngai ete kokende makita ezali te likambo ya kosalaka soki nalingi. Ata ntango nazalaki naino mwana, likanisi ya kozangisa makita eyelá ngai ata mokolo moko te. Natikalá na ezaleli yango tii lelo.”—Kelsey.
Likambo ya ntina: Bato oyo bazangisaka makita te basepelaka na yango mingi koleka mpe epesaka bango matomba mingi!
2. LANDÁKÁ NA LIKEBI
Vɛrsɛ oyo ekosalisa yo: “Bókeba na ndenge bozali koyoka.”—Luka 8:18.
Bato ya mayele balobi ete na nsuka ya mokolo, moto abosanaka makambo mingi (60%) oyo ayokaki. Soki mbongo na yo nde ezalaki kosila ndenge wana, na ntembe te olingaki kosala nyonso mpo obatela yango, boye te?
Likanisi: Fandá esika moko na baboti na yo na bisika ya liboso, epai okolanda mpenza na likebi. Komáká makambo ya ntina. Atako moto na moto azali na ndenge na ye ya koyekola, kokoma makambo ya ntina ekosalisa yo olanda molobi na likebi; mpe esalisaka mingi na kozongela mateya yango na nsima.
“Liboso, nakokaki te kotya likebi na makita, kasi nakómá kotya likebi. Nasalaka makasi nabosana te ntina oyo nazali wana. Ezali te kaka lokola bato oyo bakendeke na bandako-nzambe. Nakendeke na makita mpo na kosambela Nzambe mpe koyekola, elingi koloba mpo nazonga na likambo moko oyo nakosalela na bomoi na ngai.”—Kathleen.
Mpo na kosukisa: Kokende na makita mpe kotya likebi te, ezali lokola okei na fɛti kasi olei te.
3. PESÁKÁ MABƆKƆ
Vɛrsɛ oyo ekosalisa yo: “Moto ayekolaka epai ya moto mosusu kaka ndenge ebende epelisaka ebende mosusu.”—Masese 27:17, Biblia Good News Translation.
Atako ozali elenge, ozali na ntina mingi na makita ya lisangá. Komona te ete koyangana na yo na makita mpe kopesa biyano ezali na ntina te; kokanisa mpe te ete kopesa eyano moko na lisolo ya mituna mpe biyano to kozala elongo na bandeko ya lisangá ezali mpamba.
Likanisi: Zalá na mokano ya kopesa ata eyano moko na lisolo ya mituna mpe biyano. Pesáká mabɔkɔ mpo na kotya bopɛto to kosala misala mosusu nyonso oyo esengeli, ezala liboso ya makita, ntango ezali kosalema, to mpe na nsima. Lukáká kosolola na moto oyo ozwaka mabaku mingi te ya kosolola na ye.
“Ntango nazalaki na mbula soki 15, nabandaki kopesa mabɔkɔ mpo na kotambwisa mikro mpe kobongisa estrade na makita. Kozala na mikumba wana esalisaki ngai namimona ete nazali na ntina, mpe etindaki ngai nayaka makita mpe nakómaka na ngonga. Yango esalaki ngai nasepela lisusu mingi na mateya ya Biblia mpe na makambo ya losambo.”—Miles.
Mpo na kosukisa: Kofanda kaka mpamba te—salá mwa eloko! Kosala mwa eloko epesaka esengo mingi koleka kotala kaka na miso.
Okokuta masolo mosusu na “Mituna oyo bilenge batunaka” na Internet, na adrɛsi oyo: www.pr2711.com
[Etanda/Bililingi na lokasa 13]
TÓBENGISI YO!
Okosepela
● Koyekola solo na ntina na Nzambe?
● Kokóma moto malamu?
● Kozwa baninga ya malamu mpenza?
Makita ya Batatoli ya Yehova ekoki kosalisa yo osala makambo nyonso wana, mpe makambo mingi mosusu! Batatoli ya Yehova bayanganaka mbala mibale na pɔsɔ na Bandako ya Bokonzi mpo na losambo. Bakɔngɔlaka mabonza te, mpe bayambaka moto nyonso malamu.
Kozangisa te! Bandako ya Bokonzi ezali te lokola banda ko-nzambe mosusu oyo okɔtá. Na makita ya Batatoli ya Yehova, balobelaka mingi mateya ya Biblia, mpe okoyekola ndenge oyo Liloba ya Nzambe ekoki kosalisa yo ozala na bomoi ya malamu mpenza!—Kolimbola Mibeko 31:12; Yisaya 48:17.
Sai—Mbala ya liboso oyo nakɔtaki na Ndako ya Bokonzi moko, nakamwaki mpo ezalaki ata na ekeko moko te, moto moko te alataki lokola sango, mpe moto moko te asɛngaki ngai napesa mbongo. Moto nyonso ayambaki ngai, mpe namiyokaki malamu. Makambo oyo balobelaki na makita ezalaki mpasi te mpo na kokanga ntina, mpe ezalaki na molɔngɔ. Yango nde solo oyo nazalaki koluka banda kala!
Deyanira—Nazalaki na mbula 14 ntango nakendaki mpo na mbala ya liboso na makita ya Batatoli ya Yehova. Bato nyonso bayambaki ngai mbala moko. Emonanaki ete basepelaki mpenza ndenge nayaki wana, mpe basepelaki na ngai mingi. Makambo malamu oyo namonaki na mbala wana ya liboso, esalaki ngai nabanga te koya lisusu!
[Etanda/Bililingi na lokasa 14]
Luká koyeba masolo oyo ekoselama na makita ya lisangá ya mbala ekoya. Poná lisolo oyo esepelisi yo mpe . . .
KATÁ MPE SALÁ FOTOKOPI
Tondisá makambo oyo elandi liboso ya kokende na makita ya lisangá.
Nkombo ya lisolo:
․․․․․
⇩
Oyo nakosepela koyeba na lisolo yango:
․․․․․
Tondisá makambo oyo elandi nsima ya koyoka lisolo yango.
Makambo oyo nayekoli:
․․․․․
⇩
Makambo oyo nakoki koyebisa molobi ete nasepelaki na yango na lisolo na ye:
․․․․․