Makambo oyo ezali koleka na mokili

“Liboso ete bábimisa ordinatɛrɛ, ezalaki mpasi mpo [bato oyo bayekolaka banzete] báluka na mozindo na mikanda liboso ya kopesa banzete ya sika nkombo; yango wana, bazalaki kopesa banzete mosusu nkombo mbala mibalemibale.” Lelo oyo, emonani ete na bamilio ya banzete oyo eyebani, 477 601 nzete ezali na bankombo ndenge moko.​—SCIENCE, ÉTATS-UNIS.

“Na Chine, kaka bato moke mpamba (6%) nde balobaka ete bazali na bomoi ya esengo.” Na ankɛtɛ moko, bato mosusu (39%) balobaki ete likambo mpenza oyo ekoki kosala ete moto azanga esengo ezali “bomɛngo.”​—CHINA DAILY, CHINE.

“Ankɛtɛ moko . . . oyo esalemi na Russie mpo na koyeba soki makambo ya mobulu oyo esalemaka kuna ezali solo, emonisi ete na ekólo mobimba, bibongiseli oyo etindaka bato bátosa mibeko ebakisaka ‘makambo mingi’ ya lokuta.” Emonani ete bibongiseli yango “elukaka kobomba mabe mpenza oyo esalemi” mpe elekisaka ndelo ntango elobelaka makambo oyo babongisi.​—RIA NOVOSTI, RUSSIE.

“Moyekoli moko kati na bayekoli misato na mboka-mokonzi ya ekólo Allemagne [Berlin] amonaka malamu asala mosala ya kotɛka nzoto [na ndakisa kindumba to kobina mabina oyo elamwisaka mposa ya nzoto] mpo na koluka mbongo ya kofuta kelasi.”​—AGENCE REUTERS, ALLEMAGNE.

Kobongisa nzoto liboso ya kobota

Basite ya Internet oyo bato mingi bakoki kozwa to kotinda bamesaje ezali kosala ete bamama bátinda bamesaje ya kobota na bango na ndenge oyo ezalaki liboso te. Bamama ya kala bazalaki kotinda batelegrame mpo na kopesa nsango ete baboti; kasi lelo oyo, ndenge televizyo moko ya Amerika (ABC) elobi yango, “bamama bakómi kotinda bamesaje ya esengo na nzela ya Internet.” Mbala mingi, batyaka bafɔtɔ oyo bakangi bango ná babebe na bango ntango kaka bauti kobota. Na yango, bamama ya lelo oyo bamibanzabanzaka mpo na monzɛlɛ na bango, basalelaka bankisi ya kobongisa nzoto liboso ya kokenda kobota; mpo na yango, babongisaka elongi, mabɔkɔ mpe makolo na bango. Televizyo yango elobi mpe ete “basi mosusu bakendaka kutu elongo na moto oyo akobongisa bango nsuki na lopitalo.” Mpo na nini? Toni Golen, monganga oyo akambaka misala ya kobotisa na lopitalo moko (Centre médical des diaconesses Beth Israel de Boston) alobi ete ezali mpo bámonana kitoko ntango bakobota.

Mosala ebatelaka nzoto kolɔngɔnɔ

Bato ya mayele balobi ete bato mingi babɛlaka bamaladi oyo esilaka te mpo bafandaka kaka esika moko ntango molai, na ndakisa na mosala, na kelasi to liboso ya televizyo. Zulunalo moko (Vancouver Sun) elobi ete “ntango moto afandi kaka esika moko, mosala ya enzyme (liproprotein lipase) oyo esalaka ete misisa ebenda mafuta oyo etambolaka na makila mpo na kotumba yango, etikaka mosala na yango na mbalakaka.” Zulunalo yango ebakisi ete “mpo na kozala nzoto kolɔngɔnɔ mpe kobengana maladi, tosengeli kosala ngalasisi oyo ekosalisa motema na biso ebɛta malamu, mpe kosalaka yango ntango nyonso, na ndenge oyo ebongi mpo nzoto ezala ntango nyonso makasi.”