Evolisyo

Lisolo ya Biblia oyo elobeli bozalisi endimi nde likanisi oyo ete molɔ́ngɔ́ ebimá na kopanzana ya etando?

Biblia elobi kaka ete: “Na ebandeli Nzambe azalisaki likoló mpe mabele.” (Ebandeli 1:1) Elobeli mpenza te ndenge oyo Nzambe akelaki biloko nyonso. Na yango, ata soki etando epanzanaki lokola bɔmbi mpo mokili ebima, likanisi yango eboyi te oyo Biblia elobi. Kutu, Ebandeli 1:1 ekoki koyanola na motuna oyo: Nani asalaki ete etando yango epanzana?

Ezali solo ete bato mingi ya siansi bakanisaka ete etando epanzanaki kaka yango moko na pwasa mpe esalaki ete biloko mikemike esangana yango moko mpe na boumeli ya ntango ebimisa minzoto mpe baplanɛti mosusu. Biblia endimaka likanisi wana te kasi elobi ete Nzambe nde asalaki molɔ́ngɔ́, ata soki asalelaki kopanzana ya etando to lolenge mosusu ya kokela.

“Na ebandeli Nzambe azalisaki likoló mpe mabele.”​—Ebandeli 1:1.

Biblia endimi ete bikelamu ya bomoi ebongwanaka nsima ya bambula?

Ɛɛ. Biblia elobi ete Nzambe akelaki bikelamu ya bomoi “na mitindo na yango.” (Ebandeli 1:11, 12, 21, 24, 25) Mbongwana ekoki mpe kosalema na kati ya bikelamu ya motindo boye to boye? Ɛɛ. Kasi, yango emonisi nde ete evolisyo ekoki kobimisa mitindo ya sika? Te.

Tózwa ndakisa moko: Na 1970, bato ya mayele bayekolaki ndɛkɛ babengi pinson oyo ezalaka na bisanga ya Galápagos. Bamonaki ete kobongwana ya klima esalaki ete bandɛkɛ yango ya minɔkɔ ya mwa milai eumela na bomoi. Ezali mpo na yango nde bamosusu balobaki ete endimisaki liteya ya evolisyo. Kasi yango endimisaki mpenza liteya ya evolisyo to ezalaki kaka mwa mbongwana? Nsima ya bambula, ba-pinson ya minɔkɔ mikuse ekómaki ebele. Yango etindaki Jeffrey Schwartz, profesɛrɛ moko ya antropoloji aloba ete atako mbongwana oyo esalemaka na kati ya mitindo ya bikelamu ekoki kosalisa bikelamu yango ekoba kozala na bomoi ata ntango makambo ebongwani, “ebimisaka ekelamu ya sika te.”

Biblia endimaka liteya ya evolisyo?

Biblia elobi ete ‘[Nzambe] azalisaki biloko nyonso.’ (Emoniseli 4:11) ‘Apemaki’ te tii ntango asilisaki kokela. (Ebandeli 2:2) Emonani polele ete Nzambe akelaki te mwa ekelamu moko boye mpe na nsima apemaki to akangaki mabɔkɔ mpe mwa ekelamu yango ekómaki kobongwana na boumeli ya bamilio ya bambula mpo na kobimisa mitindo ndenge na ndenge ya mbisi, makako mpe bato.a Likanisi yango, oyo babengaka mbongwana ya monene, endimaka te mosala ya Mozalisi, oyo Biblia elobi ete “asalaki likoló ná mabele, mbu mpe eloko nyonso oyo ezali na kati na yango.”​—Kobima 20:11; Emoniseli 10:6.

“Yehova, ɛɛ Nzambe na biso, obongi kozwa nkembo mpe lokumu mpe nguya, mpo yo ozalisaki biloko nyonso.”​—Emoniseli 4:11.

Mpo na koyeba makambo mosusu: Biblia elobi ete “bizaleli na ye [Nzambe] oyo emonanaka te ezali komonana polelepolele banda na kozalisama ya mokili, mpo emonanaka na nzela ya biloko oyo asalá.” (Baroma 1:20) Koyekola makambo etali Nzambe ekoki kosala ete bomoi ezala na ntina, mpo azali na mokano moko ya malamu mpo na baoyo nyonso balukaka ye na motema moko. (Mosakoli 12:13; Baebre 11:6) Mpo na koyeba makambo mosusu, kɔtá na site www.pr2711.com to sololá na Batatoli ya Yehova. Fungolá esika bakomi MATEYA YA BIBLIA > BIYANO NA MITUNA YA BIBLIA.