OKOKI KOLONGA KOTUNGISAMA
Kotungisama ekosila!
Batoli ya bwanya oyo ezali na Biblia ekoki kosalisa biso tótika kotungisama mingi mpo na makambo ezangi ntina. Mpo na koloba solo, biso bato tokokoka te kolongola makambo nyonso oyo etungisaka biso. Kasi Nzambe oyo akelá biso akoki kosala yango. Kutu atyá moto moko mpo asalisa biso. Moto yango ezali Yesu Kristo. Mosika te, akosala makambo ya kitoko na mabele mobimba, koleka kutu ndenge asalaki ntango ayaki awa na mabele. Na ndakisa:
YESU AMONISAKI ETE AKOBIKISA BATO YA MALADI.
“Bamemelaki ye baoyo nyonso bazalaki . . . konyokwama na maladi . . . ndenge na ndenge . . . mpe abikisaki bango.”—MATAI 4:24.
YESU AKOPESA BATO NYONSO BANDAKO MPE BILEI.
“[Bato oyo Kristo akoyangela] bakotonga bandako mpe bakofanda kuna; mpe ya solo, bakolona bilanga ya vinyo mpe bakolya mbuma na yango. Bakotonga mpo moto mosusu afandaka kuna te; bakolona mpo moto mosusu alya te.”—YISAYA 65:21, 22.
BOKONZI YA YESU EKOZONGISA KIMYA NA MABELE MOBIMBA.
“Na mikolo na ye, moyengebene akokola lokola matiti ya sika, mpe kimya ekokóma mingi kino sanza ekozala lisusu te. Mpe akozala na bato oyo ye akoyangela banda na mbu kino na mbu mpe banda na Ebale kino na nsuka ya mabele. . . . Banguna na ye bakolɛmbɔla putulu.”—NZEMBO 72:7-9.
YESU AKOLONGOLA KOZANGA BOSEMBO.
“Akoyokela moto oyo azangá ná mobola mawa, mpe akobikisa milimo ya babola. Akosikola molimo na bango na monyoko mpe na mobulu.”—NZEMBO 72:13, 14.
YESU AKOLONGOLA KUTU MPASI MPE LIWA.
“Liwa ekozala lisusu te, ná lilaka ná koganga ná mpasi ekozala lisusu mpe te.”—EMONISELI 21:4.