LITEYA 38

Zwá bomoi na valɛrɛ

Ya Papye

Bomoi etondi na makambo ebele ya kitoko. Tokoki kosepela na makambo mosusu ya bomoi ata ntango tozali na mikakatano. Ndenge nini tokoki komonisa Yehova ete tozali kozwa na valɛrɛ bomoi, likabo oyo apesá biso? Wapi ntina ya libosoliboso oyo tosengeli kosala yango?

1. Mpo na nini tosengeli kozwa bomoi na valɛrɛ?

Tosengeli kozwa bomoi na valɛrɛ mpo ezali likabo oyo Tata na biso ya bolingo, Yehova, apesá biso. Azali “liziba ya bomoi,” elingi koloba, ye nde asalá bomoi. (Nzembo 36:9) Biblia elobi ete: “Apesaka bato nyonso mpema, bomoi mpe biloko nyonso.” (Misala 17:25, 28) Yehova apesi biso nyonso oyo tozali na yango mposa mpo tózala na bomoi. Asali mpe ete tósepela na bomoi.—Tángá Misala 14:17.

2. Ndenge nini tokoki komonisa Yehova ete tozwaka na valɛrɛ bomoi, likabo oyo apesá biso?

Banda na libumu ya mama, Yehova azalaki kozwa bomoi na yo na motuya mingi. Biblia elobeli libondeli moko oyo Davidi asalaki; alobaki na Yehova ete: “Miso na yo emonaki ndenge nazalaki naino liki.” (Nzembo 139:16) Yehova azwaka bomoi na yo na valɛrɛ mingi. (Tángá Matai 10:29-31.) Yehova ayokaka mpasi na motema soki moto amibomi to abomi moto mosusu.a (Kobima 20:13) Ayokaka mpe mpasi soki totye bomoi na biso na likama kaka mpamba to tosali eloko te mpo na kobatela bomoi ya basusu. Soki tozali kobatela bomoi na biso mpe ya basusu, tokomonisa ete tozali na botɔndi mpo na bomoi, likabo kitoko oyo Yehova apesá biso.

KƆTÁ NA MOZINDO

Luká koyeba makambo oyo okoki kosala mpo na komonisa Yehova ete ozwaka likabo ya bomoi na motuya mingi.

3. Batelá nzoto na yo malamu

Ntango mokristo amipesi na Yehova, apesaka bomoi na ye mobimba epai na ye. Na maloba mosusu, apesi nzoto na ye mbeka epai ya Nzambe. Tángá Baroma 12:1, 2, mpe na nsima yanolá na mituna oyo:

Nini esengeli kotinda yo obatela nzoto na yo malamu?
Ndenge nini okoki kosala yango?

Mwasi moko oyo azali na zemi azali kosolola na monganga.

4. Kebá na makama mpe liwa

Biblia elendisi biso ete tóboya makambo oyo ekoki kotya bomoi na likama. Talá VIDEO mpo na koyeba makambo oyo okoki kosala mpo na komibatela.

VIDEO: Zalá ekɛngɛ mpo na komibatela (8:34)

Tángá Masese 22:3, mpe na nsima lobelá ndenge oyo yo ná basusu bokoki komibatela . . .

na ndako.
na esika ya mosala.
ntango bozali kosala masano.
ntango bazali komema bino to bozali kokumba bato mosusu na motuka, tukutuku, velo, to bwato.

Mobali moko na kati ya motuka azali kokanga mokaba ya komibatela.

5. Zwá na valɛrɛ bomoi ya mwana oyo azali na libumu

Mwasi moko azali na zemi asimbi libumu na ye.

Davidi alobaki ete Yehova alandelaka mpenza makambo nyonso oyo esalemaka ntango mwana azali kokola na libumu ya mama. Tángá Nzembo 139:13-17, mpe na nsima yanolá na motuna oyo:

Na miso ya Yehova, bomoi ebandaka ntango mwana azali na libumu ya mama to ntango abotami?

Mibeko oyo Yehova apesaki bana ya Yisraele ezalaki kobatela mwasi ya zemi mpe mwana oyo azali na libumu na ye. Tángá Kobima 21:22, 23, mpe na nsima yanolá na mituna oyo:

Ndenge nini Yehova azalaki kotalela moto oyo abomi na nko te mwana oyo azali naino na libumu?
Yehova ayokaka ndenge nini ntango moto moko asali yango na nko?b
Ndenge oyo Yehova atalelaka likambo yango, esali yo nini?

Talá VIDEO.

VIDEO: Tópesa bomoi valɛrɛ ndenge Nzambe apesaka yango (5:00)

Makambo mosusu ekoki kosala ete ata mwasi oyo azwaka bomoi na valɛrɛ amona ete asengeli kaka kolongola zemi. Tángá Yisaya 41:10, mpe na nsima yanolá na mituna oyo:

Soki bazali kotya mwasi moko mbamba alongola zemi, asengeli kosɛnga lisalisi epai ya nani? Mpo na nini?

SOKI MOTO ALOBI NA YO: “Soki mwasi amoni ete azali na likoki te ya kobɔkɔla mwana, akoki kolongola zemi, ezali mpenza mabe te.”

Nini endimisi yo ete Yehova azwaka na valɛrɛ bomoi ya mama mpe ya mwana oyo azali na libumu na ye?

NA MOKUSE

Biblia eteyi biso ete tólinga mpe tóbatela bomoi, likabo oyo Yehova apesá biso, yango elingi koloba bomoi na biso mpe oyo ya basusu.

Bozongeli

Mpo na nini bomoi ya bato ezali na valɛrɛ mingi na miso ya Yehova?
Yehova ayokaka ndenge nini ntango moto abomi moto mosusu na nko?
Mpo na nini ozali na botɔndi mpo na bomoi, likabo oyo Yehova apesá biso?

Dati bosilisi liteya oyo:

Oyo okoki kosala

Luká koyeba likambo oyo okoki kosala mpo na kobatela bokolɔngɔnɔ ya nzoto.

Makambo mosusu:

Your other goal

MAKANISI MOSUSU

Ndenge nini tokoki kopesa Yehova matɔndi mpo na bomoi, likabo oyo apesá biso?

Loyembo 141—Bomoi ezali likamwisi (2:41)

Zwá eyano na motuna oyo: Nzambe akoki kolimbisa mwasi oyo alongolá zemi?

“Biblia elobi nini mpo na likambo etali kolongola zemi?” (Lisolo oyo ezali na Internet)

Koyeba ndenge oyo Yehova atalelaka bomoi esengeli kotinda yo opona masano ya malamu.

“‘Masano oyo etyaka bomoi na likama’—Osengeli kosala yango?” (Lamuká! ya 08/10/2000)

Talá ndenge Biblia ekoki kosalisa moto oyo azali na makanisi ya komiboma.

“Nazali na mposa ya kokufa—Biblia ekoki kosalisa ngai ntango nazali na makanisi ya komiboma?” (Lisolo oyo ezali na Internet)

a Yehova atyelaka bato oyo bazoki na motema likebi mingi. (Nzembo 34:18) Ayebaka malamu mpasi oyo etindaka moto akóma na makanisi ya komiboma, mpe alingaka kosalisa ye. Mpo na koyeba ndenge oyo Yehova asalisaka moto azwa makasi mpe alonga makanisi ya komiboma, tángá lisolo “Nazali na mposa ya kokufa—Biblia ekoki kosalisa ngai ntango nazali na makanisi ya komiboma?” oyo ezali na eteni “Makanisi mosusu” ya liteya oyo.

b Baoyo balongolá zemi basengeli te komipesa foti koleka ndelo, mpo Yehova akoki kolimbisa bango. Mpo na koyeba makambo mosusu, talá lisolo “Biblia elobi nini mpo na likambo etali kolongola zemi?” oyo ezali na eteni “Makanisi mosusu” ya liteya oyo.