Mpo moto azala na esengo esengeli kaka abala?

Biblia eteyaka nde ete mpo moto azala na esengo, esengeli kaka abala? Soki okanisi malamu te, ekoki komonana lokola ete Liloba ya Nzambe endimi likanisi wana. Ndenge nini?

Na kotalela lisolo oyo ezali na mokanda ya Ebandeli, Nzambe amonaki ete ezalaki “malamu te” mpo Adama, mobali ya liboso, azala ye moko. Yango wana, Nzambe asalaki Eva mpo azala moto “oyo abongi na ye.” (Ebandeli 2:18) Maloba “oyo abongi na ye” elimboli eloko oyo esalaka ete eloko mosusu ezala mobimba. Maloba ya vɛrsɛ yango ekoki kotinda biso tókanisa ete mpo moto azala mobimba, esengeli abala. Longola yango, masolo mingi ya Biblia emonisaka ete libala ememaka mapamboli mpe esengo. Lisolo ya Ruta ezali moko ya bandakisa yango.

Kasi, masolo yango elingi nde koteya biso ete lelo oyo mpo mokristo azala na esengo ya solosolo, azanga eloko te, mpe azala mobimba, esengeli kaka abala to abota? Ezali bongo te. Yesu Kristo azalaki moto oyo azangaki eloko te mpe azalaki mobimba koleka bato nyonso. Nzokande, atikalaki monzemba tii liwa na ye. Yesu, moto oyo alekaki bato nyonso na bwanya awa na mabele, amonisaki mpe bizaleli ya Yehova, “Nzambe ya esengo.” (1 Timote 1:11; Yoane 14:9) Yesu amonisaki likambo oyo esalaka ete moto azala na esengo to apambolama na mokili oyo. (Matai 5:1-12) Alobelaki libala te na liste yango.

Boye, Biblia ezali nde bongolabongola na likambo yango? Ezali bongo te. Tosengeli kotalela libala ndenge ebongisamaki na mokano ya Yehova. Atako Nzambe abongisaki libala mpo epesa moto esengo, azala na moto ya koyebisaka makambo na ye ya motema, mpe azwa libɔndisi, na bantango mosusu ebongiseli yango ezalaki mpe na ntina mpo na kokokisa makambo mosusu oyo etali mokano ya Nzambe. Na ndakisa, mokano ya Nzambe mpo na Adama ná Eva ezalaki ete ‘bábota mpe bákóma mingi mpe bátondisa mabele.’ (Ebandeli 1:28) Ezala Adama to Eva, moko te kati na bango akokaki kokokisa mokano wana ya Nzambe ye moko. Mokomoko azalaki na mposa ya moninga, mpe mokomoko akómisaki moninga na ye mobimba na ndenge moko ya kokamwa.

Ndenge moko mpe, Yehova azalaki na mikano ya ntina mingi oyo etalaki libala mpe bomoi ya libota ntango azalaki kosalela ekólo Yisraele mpo na kokokisa yango. Alingaki ete ekólo yango ebota bana mingi mpo bikólo ya banguna elonga bango te. Akanaki mpe ete libota ya Yuda ebimisa Masiya, oyo akobikisa bato ya sembo na lisumu mpe liwa. (Ebandeli 49:10) Na yango, basi ya sembo na Yisraele bazalaki kotalela kobala mpe kobota lokola libaku moko malamu, mpe kozanga kobala to kobota ezalaki likambo ya nsɔni mpe mawa mpo na bango.

Kasi ezali boni lelo oyo? Mobeko oyo Nzambe apesaki kala ya “kotondisa mabele” esɛngi nde bakristo na makasi bábala mpe bábota na mokili oyo esili kotonda na bato? Te. (Matai 19:10-12) Nzambe azali lisusu na mposa te ya kobatela molɔngɔ ya bankɔkɔ ya Masiya to kobatela ekólo oyo ekobimisa Mobikisi oyo akobotama kuna. Kasi, ndenge nini bakristo basengeli kotalela libala mpe bonzemba?

Na ntembe te, kobala to kotikala monzemba, ezali makabo ya Nzambe. Ndenge toyebi yango, moto moko akoki kosepela na likabo oyo moto mosusu akoki kosepela na yango te. Libala ezali ebongiseli moko mosantu oyo ekoki kosala ete moto alingama, azwa moninga mpe asala libota moko ya malamu. Atako bongo, Biblia emonisi mpe ete baoyo bazali kobala na mokili oyo ya kozanga kokoka bakokutana na mikakatano, to “bolɔzi na kati ya mosuni na bango.” Mpo na oyo etali bonzemba, Yehova atalelaka yango te lokola likambo ya nsɔni to mawa. Kutu, Liloba na ye elobi ete bonzemba ezali na matomba mosusu oyo libala ezali na yango te.​—1 Bakorinti 7:28, 32-35.

Na yango, Biblia ezali na bokatikati ntango ezali kolobela libala mpe bonzemba. Yehova, mobandisi ya libala mpe ya libota alingi ete basaleli na ye nyonso bázala na esengo mpe bázanga eloko te, ezala bazali minzemba to babalá.