Nzambe atyelaka yo likebi
BIBLIA ezali na batoli oyo eleki malamu mpo na biso, mpamba te euti epai ya Nzambe. Ezali te buku mpo na koyeba makambo ya minganga, kasi na nzela ya batoli na yango oyo ebongi, ekoki kosalisa yo olonga mikakatano, kobulungana na makanisi, mpasi na motema, mpe mikakatano ya sante mpe ya makanisi.
Oyo eleki ntina, Biblia eyebisi biso ete Mozalisi na biso, Yehova Nzambe,a ayebi makanisi mpe mayoki na biso malamu koleka moto nyonso. Azali na mposa makasi ya kosalisa biso tólonga mikakatano oyo tozali kokutana na yango. Tiká, tótalela bavɛrsɛ mibale ya kobɔndisa:
“Yehova azali pene na baoyo motema ebukani; Mpe abikisaka baoyo elimo etutami.”—NZEMBO 34:18.
“Ngai, Yehova Nzambe na yo, nazali kosimba lobɔkɔ na yo ya mobali, ngai Moto nazali koloba na yo ete: ‘Kobanga te. Ngai moko nakosalisa yo.’”—YISAYA 41:13.
Ndenge nini Yehova akoki kosalisa biso tóyika mpiko ntango tozali kobɛla na makanisi? Ndenge okomona yango na lisolo oyo elandi, Yehova amonisi ete atyelaka biso mpenza likebi na lolenge mingi.
a Yehova ezali nkombo ya Nzambe.—Nzembo 83:18.