1 ເທຊະໂລນິກ
2 ພີ່ນ້ອງເອີຍ ພວກເຈົ້າກໍຮູ້ວ່າການທີ່ພວກເຮົາໄປຫາພວກເຈົ້ານັ້ນເກີດຜົນດີແທ້ໆ. 2 ເຖິງວ່າຕອນທຳອິດ ພວກເຮົາຕ້ອງທົນທຸກແລະຖືກດູຖູກຢຽດຫຍາມໃນເມືອງຟີລິບປອຍແບບທີ່ພວກເຈົ້າຮູ້ ແຕ່ພວກເຮົາກໍລວບລວມຄວາມກ້າດ້ວຍຄວາມຊ່ວຍເຫຼືອຈາກພະເຈົ້າຂອງພວກເຮົາ ແລ້ວໄປບອກຂ່າວດີຂອງພະອົງກັບພວກເຈົ້າທັງໆທີ່ເຈິການຕໍ່ຕ້ານຢ່າງໜັກ.* 3 ຄຳແນະນຳທີ່ພວກເຮົາໃຫ້ພວກເຈົ້ານັ້ນບໍ່ໄດ້ມາຈາກຄວາມຄິດຜິດໆຫຼືເຈຕະນາທີ່ບໍ່ບໍລິສຸດ ແລະບໍ່ໄດ້ເປັນການຫຼອກລວງ 4 ແຕ່ພະເຈົ້າພໍໃຈທີ່ຈະຝາກຂ່າວດີໄວ້ກັບພວກເຮົາ ພວກເຮົາຈຶ່ງປະກາດຂ່າວດີນີ້ບໍ່ແມ່ນເພື່ອເອົາໃຈມະນຸດ ແຕ່ເພື່ອເຮັດໃຫ້ພະເຈົ້າພໍໃຈ ພະອົງເປັນຜູ້ກວດສອບຫົວໃຈພວກເຮົາ.
5 ທີ່ຈິງ ພວກເຈົ້າກໍຮູ້ວ່າພວກເຮົາບໍ່ເຄີຍໃຊ້ຄຳເວົ້າປະຈົບປະແຈງຫຼືທຳທ່າເຮັດເປັນຄົນດີເພື່ອໂລບຢາກໄດ້ບາງຢ່າງ. ພະເຈົ້າເປັນພະຍານເລື່ອງນີ້ໄດ້! 6 ແລະພວກເຮົາບໍ່ຢາກໄດ້ຮັບການຍົກຍ້ອງຈາກມະນຸດ ບໍ່ວ່າຈາກພວກເຈົ້າຫຼືຈາກຄົນອື່ນ. ພວກເຮົາເປັນອັກຄະສາວົກ*ຂອງພະຄລິດ ທີ່ຈິງ ພວກເຮົາຈະເຮັດໃຫ້ຕົວເອງເປັນພາລະໃຫ້ພວກເຈົ້າຕ້ອງເສຍຄ່າໃຊ້ຈ່າຍຫຼາຍກໍໄດ້. 7 ແຕ່ເມື່ອຢູ່ກັບພວກເຈົ້າ ພວກເຮົາປະຕິບັດຕໍ່ພວກເຈົ້າດ້ວຍຄວາມອ່ອນໂຍນຄືແມ່ລູກອ່ອນທະນຸຖະໜອມລູກຂອງຕົວເອງ. 8 ພວກເຮົາຮັກພວກເຈົ້າແທ້ໆ ພວກເຮົາຈຶ່ງບໍ່ໄດ້ໃຫ້ພຽງຂ່າວດີຂອງພະເຈົ້າກັບພວກເຈົ້າເທົ່ານັ້ນ ແຕ່ຕັ້ງໃຈຈະໃຫ້ຊີວິດຂອງພວກເຮົານຳ ເພາະພວກເຈົ້າເປັນທີ່ຮັກຂອງພວກເຮົາຫຼາຍ.
9 ພີ່ນ້ອງເອີຍ ພວກເຈົ້າຄືຊິຈື່ໄດ້ວ່າຕອນທີ່ປະກາດຂ່າວດີຂອງພະເຈົ້າແກ່ພວກເຈົ້າ ພວກເຮົາເຮັດວຽກໜັກແລະເມື່ອຍຫຼາຍ ພວກເຮົາເຮັດວຽກທັງເວັນທັງຄືນເພື່ອຈະບໍ່ເປັນພາລະຂອງຜູ້ໃດ. 10 ພວກເຈົ້າແລະພະເຈົ້າເປັນພະຍານຢືນຢັນໄດ້ວ່າ ຕອນທີ່ພວກເຮົາຊ່ວຍພວກເຈົ້າທີ່ເປັນຜູ້ເຊື່ອຖື ພວກເຮົາສັດຊື່ແລະເຮັດທຸກສິ່ງແບບຖືກຕ້ອງບໍ່ມີບ່ອນຕິ. 11 ແລະພວກເຈົ້າກໍຮູ້ດີວ່າ ພວກເຮົາເຕືອນພວກເຈົ້າທຸກຄົນຢູ່ເລື້ອຍໆ ລວມທັງປອບໃຈແລະແນະນຳພວກເຈົ້າຄືກັບທີ່ພໍ່ເຮັດຕໍ່ລູກ 12 ເພື່ອໃຫ້ພວກເຈົ້າໃຊ້ຊີວິດໃນແບບທີ່ພະເຈົ້າພໍໃຈ ພະອົງເອີ້ນພວກເຈົ້າໃຫ້ມີສ່ວນຮ່ວມໃນການປົກຄອງ*ຂອງພະອົງແລະໄດ້ຮັບກຽດຈາກພະອົງ.
13 ນີ້ເປັນເຫດຜົນທີ່ພວກເຮົາຂອບໃຈພະເຈົ້າມາຕະຫຼອດ ເພາະເມື່ອພວກເຈົ້າໄດ້ຍິນຄຳສອນຂອງພະເຈົ້າຈາກພວກເຮົາ ພວກເຈົ້າຍອມຮັບຄຳສອນນັ້ນໄວ້ຄືກັບເປັນຄຳສອນຂອງພະເຈົ້າແທ້ໆ ບໍ່ແມ່ນຂອງມະນຸດ ແລະຄຳສອນນັ້ນກຳລັງເກີດຜົນກັບພວກເຈົ້າທີ່ເປັນຜູ້ເຊື່ອຖື. 14 ພີ່ນ້ອງເອີຍ ພວກເຈົ້າຮຽນແບບຕົວຢ່າງປະຊາຄົມຄລິດສະຕຽນຫຼາຍແຫ່ງໃນແຂວງຢູດາຍເຊິ່ງກໍເປັນປະຊາຄົມຂອງພະເຈົ້າຄືກັນ ເພາະພວກເຈົ້າທົນທຸກດ້ວຍນ້ຳມືຂອງຄົນຮ່ວມຊາດຄືກັບທີ່ພວກເຂົາທົນທຸກດ້ວຍນ້ຳມືຂອງພວກຢິວ 15 ເຊິ່ງໄດ້ປະຫານແມ່ນແຕ່ພະເຢຊູຜູ້ເປັນນາຍກັບພວກຜູ້ພະຍາກອນ ແລະຂົ່ມເຫງພວກເຮົານຳອີກ. ພວກເຂົາເຮັດໃຫ້ພະເຈົ້າບໍ່ພໍໃຈ ຊ້ຳບໍ່ໜຳຍັງກີດກັນຄົນອື່ນບໍ່ໃຫ້ຮັບສິ່ງທີ່ເປັນປະໂຫຍດ 16 ພວກເຂົາພະຍາຍາມຂັດຂວາງພວກເຮົາບໍ່ໃຫ້ປະກາດແລະບໍ່ໃຫ້ພວກເຮົາຊ່ວຍຄົນຕ່າງຊາດໃຫ້ໄດ້ຮັບຄວາມລອດ. ການເຮັດແບບນີ້ເຮັດໃຫ້ບາບຂອງພວກເຂົາເພີ່ມຂຶ້ນເລື້ອຍໆ. ພະເຈົ້າຈະສະແດງຄວາມໃຈຮ້າຍຕໍ່ພວກເຂົາຢ່າງແນ່ນອນ.
17 ພີ່ນ້ອງເອີຍ ຕອນທີ່ພວກເຮົາຢູ່ຫ່າງຈາກພວກເຈົ້າໄລຍະໜຶ່ງ (ພຽງຮ່າງກາຍເທົ່ານັ້ນ ບໍ່ແມ່ນໃຈ) ພວກເຮົາຢາກເຫັນໜ້າພວກເຈົ້າຫຼາຍແທ້ໆ ແລະພວກເຮົາພະຍາຍາມເປັນພິເສດເພື່ອຈະໄປພົບພວກເຈົ້າໃຫ້ໄດ້. 18 ພວກເຮົາຢາກໄປຫາພວກເຈົ້າ ໂດຍສະເພາະຂ້ອຍໂປໂລ ພະຍາຍາມບໍ່ແມ່ນເທື່ອດຽວແຕ່ເຖິງ 2 ເທື່ອແລ້ວ ແຕ່ກໍຖືກຊາຕານຂັດຂວາງ. 19 ສິ່ງໃດຈະເປັນຄວາມຫວັງ ຄວາມຍິນດີ ຫຼືມົງກຸດທີ່ເຮັດໃຫ້ພວກເຮົາພາກພູມໃຈເມື່ອຢູ່ຕໍ່ໜ້າພະເຢຊູຜູ້ເປັນນາຍຂອງພວກເຮົາໃນເວລາການປະທັບ*ຂອງເພິ່ນ? ບໍ່ແມ່ນພວກເຈົ້າບໍ? 20 ພວກເຈົ້ານັ້ນແຫຼະທີ່ເຮັດໃຫ້ພວກເຮົາພູມໃຈແລະຍິນດີ.