ປະຖົມມະການ
11 ໃນສະໄໝນັ້ນຜູ້ຄົນເວົ້າພາສາດຽວກັນໝົດ ແລະໃຊ້ຄຳສັບຄືກັນ. 2 ຕອນທີ່ເຂົາເຈົ້າເດີນທາງໄປທິດຕາເວັນອອກ ເມື່ອມາຮອດທົ່ງພຽງແຫ່ງໜຶ່ງໃນແຜ່ນດິນຊີນາ+ ເຂົາເຈົ້າກໍພາກັນອາໄສຢູ່ຫັ້ນ. 3 ເຂົາເຈົ້າລົມກັນວ່າ: “ໄປ໋! ໄປ໋! ເຮົາມາເຮັດດິນຈີ່ນຳກັນ.” ເຂົາເຈົ້າໃຊ້ດິນຈີ່ແທນກ້ອນຫີນ ແລະໃຊ້ຢາງໝາກຕອຍຈາກທຳມະຊາດແທນປູນເພື່ອເຮັດໃຫ້ດິນຈີ່ຕິດກັນ. 4 ແລ້ວເຂົາເຈົ້າກໍເວົ້າວ່າ: “ໃຫ້ເຮົາມາສ້າງເມືອງໜຶ່ງຂຶ້ນມາ ແລ້ວສ້າງຫໍໃຫຍ່ໃຫ້ສູງເທົ່າຟ້າ ເພື່ອພວກເຮົາຈະກາຍເປັນຄົນມີຊື່ສຽງແລະບໍ່ຕ້ອງຢາຍກັນຢູ່ທົ່ວໂລກ.”+
5 ພະເຢໂຫວາເຫັນເມືອງແລະຫໍທີ່ຜູ້ຄົນສ້າງຂຶ້ນ 6 ແລະພະເຢໂຫວາກໍເວົ້າວ່າ: “ເບິ່ງແມ້! ຍ້ອນຜູ້ຄົນມາຢູ່ບ່ອນດຽວກັນ ແລະເວົ້າພາສາດຽວກັນ+ ເຂົາເຈົ້າກໍເລີຍເຮັດແບບນີ້. ຖ້າເປັນແນວນີ້ ເຂົາເຈົ້າຢາກເຮັດຫຍັງກໍຈະເຮັດໄດ້. 7 ໃຫ້ພວກເຮົາ+ເຮັດໃຫ້ຜູ້ຄົນເວົ້າພາສາຕ່າງກັນ ເພື່ອເຂົາເຈົ້າຈະບໍ່ເຂົ້າໃຈກັນ.” 8 ພະເຢໂຫວາເລີຍເຮັດໃຫ້ເຂົາເຈົ້າກະຈັດກະຈາຍກັນໄປທົ່ວໂລກ+ ແລ້ວເຂົາເຈົ້າກໍເຊົາສ້າງເມືອງນັ້ນ. 9 ດັ່ງນັ້ນ ເມືອງນີ້ຈຶ່ງໄດ້ຊື່ວ່າບາເບນ*+ ຍ້ອນພະເຢໂຫວາເຮັດໃຫ້ຜູ້ຄົນເວົ້າພາສາຕ່າງກັນ ແລະພະເຢໂຫວາເຮັດໃຫ້ເຂົາເຈົ້າກະຈັດກະຈາຍກັນໄປທົ່ວໂລກ.
10 ນີ້ແມ່ນປະຫວັດຂອງເຊມ.+
ຫຼັງຈາກນ້ຳຖ້ວມໂລກຜ່ານໄປ 2 ປີ ເຊມມີອາຍຸ 100 ປີ ແລະລາວມີລູກຊາຍຊື່ອາປັກຊາດ.+ 11 ຫຼັງຈາກອາປັກຊາດເກີດແລ້ວ ເຊມມີຊີວິດຢູ່ຕໍ່ໄປອີກ 500 ປີ. ລາວມີລູກຊາຍແລະລູກສາວອີກຫຼາຍຄົນ.+
12 ຕອນທີ່ອາປັກຊາດອາຍຸ 35 ປີ ລາວມີລູກຊາຍຊື່ເຊລາ.+ 13 ຫຼັງຈາກເຊລາເກີດແລ້ວ ອາປັກຊາດມີຊີວິດຢູ່ຕໍ່ໄປອີກ 403 ປີ. ລາວມີລູກຊາຍແລະລູກສາວອີກຫຼາຍຄົນ.
14 ຕອນທີ່ເຊລາອາຍຸ 30 ປີ ລາວມີລູກຊາຍຊື່ເອເບ.+ 15 ຫຼັງຈາກເອເບເກີດແລ້ວ ເຊລາມີຊີວິດຢູ່ຕໍ່ໄປອີກ 403 ປີ. ລາວມີລູກຊາຍແລະລູກສາວອີກຫຼາຍຄົນ.
16 ຕອນທີ່ເອເບອາຍຸ 34 ປີ ລາວມີລູກຊາຍຊື່ເປເລັກ.+ 17 ຫຼັງຈາກເປເລັກເກີດແລ້ວ ເອເບມີຊີວິດຢູ່ຕໍ່ໄປອີກ 430 ປີ. ລາວມີລູກຊາຍແລະລູກສາວອີກຫຼາຍຄົນ.
18 ຕອນທີ່ເປເລັກອາຍຸ 30 ປີ ລາວມີລູກຊາຍຊື່ເຣອູ.+ 19 ຫຼັງຈາກເຣອູເກີດແລ້ວ ເປເລັກມີຊີວິດຢູ່ຕໍ່ໄປອີກ 209 ປີ. ລາວມີລູກຊາຍແລະລູກສາວອີກຫຼາຍຄົນ.
20 ຕອນທີ່ເຣອູອາຍຸ 32 ປີ ລາວມີລູກຊາຍຊື່ເສຣຸກ. 21 ຫຼັງຈາກເສຣຸກເກີດແລ້ວ ເຣອູມີຊີວິດຢູ່ຕໍ່ໄປອີກ 207 ປີ. ລາວມີລູກຊາຍແລະລູກສາວອີກຫຼາຍຄົນ.
22 ຕອນທີ່ເສຣຸກອາຍຸ 30 ປີ ລາວມີລູກຊາຍຊື່ນາໂຮ. 23 ຫຼັງຈາກນາໂຮເກີດແລ້ວ ເສຣຸກມີຊີວິດຢູ່ຕໍ່ໄປອີກ 200 ປີ. ລາວມີລູກຊາຍແລະລູກສາວອີກຫຼາຍຄົນ.
24 ຕອນທີ່ນາໂຮອາຍຸ 29 ປີ ລາວມີລູກຊາຍຊື່ເຕຣາ.+ 25 ຫຼັງຈາກເຕຣາເກີດແລ້ວ ນາໂຮມີຊີວິດຢູ່ຕໍ່ໄປອີກ 119 ປີ. ລາວມີລູກຊາຍແລະລູກສາວອີກຫຼາຍຄົນ.
26 ຕອນທີ່ເຕຣາອາຍຸ 70 ປີ ລາວມີລູກຊາຍຊື່ອັບຣາມ+ ນາໂຮ+ ແລະຮາຣານ.
27 ນີ້ແມ່ນປະຫວັດຂອງເຕຣາ.
ເຕຣາມີລູກຊາຍຊື່ອັບຣາມ ນາໂຮ ແລະຮາຣານ. ຮາຣານມີລູກຊາຍຊື່ໂລດ.+ 28 ຮາຣານຕາຍຕອນທີ່ເຕຣາພໍ່ຂອງລາວຍັງມີຊີວິດຢູ່. ລາວຕາຍໃນບ້ານເກີດຢູ່ເມືອງອູເຣ+ຂອງພວກການເດອາ.+ 29 ອັບຣາມແລະນາໂຮກໍໄດ້ເອົາເມຍ. ເມຍຂອງອັບຣາມຊື່ຊາຣາຍ+ ແລະເມຍຂອງນາໂຮຊື່ມີລະກາ+ເຊິ່ງເປັນລູກສາວຂອງຮາຣານ. ຮາຣານມີລູກສາວອີກຄົນໜຶ່ງຊື່ອິສະກາ. 30 ຕອນນັ້ນຊາຣາຍເປັນໝັນ.+ ລາວບໍ່ມີລູກ.
31 ເຕຣາອອກຈາກເມືອງອູເຣຂອງພວກການເດອາ ແລະໄປຢູ່ໃນແຜ່ນດິນການາອານ.+ ລາວພາອັບຣາມລູກຊາຍຂອງລາວ ແລະໂລດຫຼານຊາຍໄປນຳ.+ ໂລດເປັນລູກຊາຍຂອງຮາຣານ. ເຕຣາຍັງໄດ້ພາຊາຣາຍລູກໃພ້ຂອງລາວໄປນຳ. ຊາຣາຍເປັນເມຍຂອງອັບຣາມ. ເຂົາເຈົ້າໄປຮອດຮາຣານ+ແລະອາໄສຢູ່ທີ່ນັ້ນ. 32 ເຕຣາຕາຍຢູ່ເມືອງຮາຣານຕອນອາຍຸ 205 ປີ.