ປະຖົມມະການ
16 ອັບຣາມແລະຊາຣາຍຍັງບໍ່ມີລູກເທື່ອ+ ແຕ່ຊາຣາຍມີຄົນຮັບໃຊ້ຊື່ຮາກາເຊິ່ງເປັນຄົນເອຢິບ.+ 2 ຊາຣາຍຈຶ່ງເວົ້າກັບອັບຣາມວ່າ: “ອ້າຍ ພະເຢໂຫວາບໍ່ໄດ້ໃຫ້ນ້ອງມີລູກ. ຂໍອ້າຍໄປນອນນຳຄົນຮັບໃຊ້ຂອງນ້ອງ ລາວອາດຈະມີລູກໃຫ້ນ້ອງກໍໄດ້.”+ ອັບຣາມກໍເຮັດຕາມທີ່ຊາຣາຍບອກ. 3 ຫຼັງຈາກອັບຣາມຢູ່ໃນແຜ່ນດິນການາອານໄດ້ 10 ປີ ຊາຣາຍໄດ້ຍົກຄົນຮັບໃຊ້ຊື່ຮາກາ ເຊິ່ງເປັນຄົນເອຢິບໃຫ້ເປັນເມຍຂອງອັບຣາມ. 4 ດັ່ງນັ້ນ ອັບຣາມຈຶ່ງໄປນອນນຳຮາກາ ແລະຮາກາກໍຖືພາ. ເມື່ອຮູ້ວ່າໂຕເອງຖືພາ ຮາກາກໍເລີ່ມດູຖູກຊາຣາຍ.
5 ຊາຣາຍເລີຍໄປເວົ້າກັບອັບຣາມວ່າ: “ນ້ອງທຸກໃຈຍ້ອນອ້າຍນີ້ແຫຼະ. ນ້ອງເອົາຄົນຮັບໃຊ້ໃຫ້ອ້າຍ ແຕ່ເມື່ອລາວຮູ້ວ່າໂຕເອງຖືພາ ລາວກໍເລີ່ມດູຖູກນ້ອງ. ຂໍໃຫ້ພະເຢໂຫວາຕັດສິນພວກເຮົາວ່າເປັນຄວາມຜິດຂອງອ້າຍຫຼືຂອງນ້ອງ.” 6 ອັບຣາມຈຶ່ງເວົ້າກັບຊາຣາຍວ່າ: “ນ້ອງເປັນນາຍລາວ ແນວໃດດີກໍໃຫ້ເຮັດໂລດ.” ແລ້ວຊາຣາຍກໍເຮັດໃຫ້ຮາກາອັບອາຍຈົນລາວໜີໄປ.
7 ຕໍ່ມາ ທູດສະຫວັນຂອງພະເຢໂຫວາກໍມາຫາຮາກາຢູ່ບ່ອນນ້ຳອອກບໍ່ໃນບ່ອນກັນດານທາງໄປຊູເຣ.+ 8 ແລ້ວທູດສະຫວັນເວົ້າວ່າ: “ຮາກາ ສາວໃຊ້ຂອງຊາຣາຍເອີ້ຍ ເຈົ້າມາແຕ່ໃສແລະຊິໄປໃສ?” ຮາກາຕອບວ່າ: “ຂ້ອຍກຳລັງໜີຈາກຊາຣາຍນາຍຂອງຂ້ອຍ.” 9 ທູດສະຫວັນຂອງພະເຢໂຫວາບອກລາວວ່າ: “ໃຫ້ກັບໄປຫານາຍຂອງເຈົ້າ ແລະຖ່ອມໂຕ ເຊື່ອຟັງໃນສິ່ງທີ່ລາວບອກ.” 10 ແລ້ວທູດສະຫວັນຂອງພະເຢໂຫວາເວົ້າອີກວ່າ: “ເຮົາຈະໃຫ້ເຈົ້າມີລູກມີຫຼານຫຼາຍຈົນນັບບໍ່ໄດ້.”+ 11 ທູດສະຫວັນຂອງພະເຢໂຫວາຍັງເວົ້າຕື່ມວ່າ: “ເຈົ້າກຳລັງຖືພາແລະຈະເກີດລູກຊາຍ. ໃຫ້ເຈົ້າຕັ້ງຊື່ລູກວ່າອິດຊະມາເອນ* ຍ້ອນພະເຢໂຫວາໄດ້ຍິນຄວາມທຸກຂອງເຈົ້າ. 12 ລູກຊາຍຄົນນີ້ຈະມີນິດໄສຄືລາປ່າ.* ລາວຈະຕໍ່ສູ້ທຸກຄົນແລະທຸກຄົນຈະຕໍ່ສູ້ລາວ. ລາວຈະຢູ່ຕ່າງຫາກຈາກພວກອ້າຍນ້ອງຂອງລາວ.”*
13 ແລ້ວຮາກາກໍຮ້ອງຊື່ພະເຢໂຫວາຜູ້ທີ່ກຳລັງເວົ້າກັບລາວວ່າ: “ພະເຈົ້າຜູ້ທີ່ເຫັນລູກ.”+ ລາວເວົ້າຕື່ມອີກວ່າ: “ຂ້ອຍໄດ້ເຫັນເພິ່ນຜູ້ທີ່ເຫັນຂ້ອຍແລ້ວ.” 14 ນ້ຳສ້າງທີ່ຢູ່ບ່ອນນັ້ນຈຶ່ງຖືກເອີ້ນວ່າເບເອລາຄາຍຣອຍ.* (ນ້ຳສ້າງນັ້ນຢູ່ລະຫວ່າງກາເດັດກັບເບເຣັດ.) 15 ຕໍ່ມາ ຮາກາກໍເກີດລູກຊາຍໃຫ້ອັບຣາມ ແລະອັບຣາມຕັ້ງຊື່ໃຫ້ລູກວ່າອິດຊະມາເອນ.+ 16 ຕອນທີ່ຮາກາເກີດອິດຊະມາເອນ ອັບຣາມອາຍຸ 86 ປີ.