ເອຊາຢາ
62 ຍ້ອນເຮົາຮັກຊີໂອນ ເຮົາຈະບໍ່ມິດຢູ່+
ແລະຍ້ອນເຮົາຮັກເຢຣູຊາເລັມ ເຮົາຈະບໍ່ຢູ່ຊື່ໆ.
ເຮົາຈະໃຫ້ຄວາມຖືກຕ້ອງຂອງເມືອງນີ້ສ່ອງແສງຄືກັບແສງທີ່ເຈີດຈ້າ+
ແລະໃຫ້ຄວາມລອດຂອງເມືອງນີ້ສ່ອງແສງຄືກັບກະບອງໄຟທີ່ມີໄຟລຸກຢູ່.+
2 “ຜູ້ຍິງເອີ້ຍ ຊາດຕ່າງໆຈະເຫັນຄວາມຖືກຕ້ອງຂອງເຈົ້າ+
ແລະພວກກະສັດຈະເຫັນສະຫງ່າລາສີຂອງເຈົ້າ.+
ເຈົ້າຈະໄດ້ຊື່ໃໝ່+
ເຊິ່ງເປັນຊື່ທີ່ພະເຢໂຫວາຈະຕັ້ງໃຫ້.
3 ເຈົ້າຈະເປັນມົງກຸດທີ່ງາມໆໃນມືຂອງພະເຢໂຫວາ
ແລະເປັນຜ້າຄຽນຫົວຂອງກະສັດທີ່ຢູ່ໃນມືຂອງພະເຈົ້າ.
4 ເຈົ້າຈະບໍ່ຖືກເອີ້ນວ່າຜູ້ຍິງທີ່ຖືກຖິ້ມອີກຕໍ່ໄປ+
ແລະແຜ່ນດິນຂອງເຈົ້າຈະບໍ່ຖືກເອີ້ນວ່າແຜ່ນດິນທີ່ຮ້າງເປົ່າອີກແລ້ວ.+
ແຕ່ເຈົ້າຈະຖືກເອີ້ນວ່າ ‘ຄົນທີ່ເຮົາພໍໃຈ’+
ແລະແຜ່ນດິນຂອງເຈົ້າຈະຖືກເອີ້ນວ່າ ‘ຄົນທີ່ແຕ່ງດອງແລ້ວ’
ຍ້ອນພະເຢໂຫວາຈະພໍໃຈເຈົ້າ
ແລະແຜ່ນດິນຂອງເຈົ້າຈະເປັນຄືກັບຄົນທີ່ແຕ່ງດອງແລ້ວ.
5 ຄົນຢູ່ເມືອງນີ້ຈະແຕ່ງດອງກັບເຈົ້າ
ຄືກັບທີ່ຜູ້ບ່າວແຕ່ງດອງກັບຜູ້ສາວບໍລິສຸດ.
ພະເຈົ້າຂອງເຈົ້າຈະພໍໃຈເຈົ້າ+
ຄືກັບທີ່ເຈົ້າບ່າວພໍໃຈເຈົ້າສາວ.
6 ເຢຣູຊາເລັມເອີ້ຍ ເຮົາໃຫ້ມີຄົນຍາມຢູ່ເທິງກຳແພງຂອງເຈົ້າແລ້ວ.
ເຂົາເຈົ້າຈະບໍ່ມິດເລີຍໝົດມື້ໝົດຄືນ.
ພວກເຈົ້າທີ່ສັນລະເສີນພະເຢໂຫວາ
ຢ່າຢຸດຢ່າເຊົາ.
7 ໃຫ້ອະທິດຖານຫາເພິ່ນຕໍ່ໆໄປຈົນກວ່າເພິ່ນຈະເຮັດໃຫ້ເມືອງເຢຣູຊາເລັມໝັ້ນຄົງ
ແລະຈົນກວ່າເພິ່ນຈະເຮັດໃຫ້ຄົນທີ່ຢູ່ທົ່ວໂລກສັນລະເສີນເມືອງນີ້.”+
8 ພະເຢໂຫວາໄດ້ສັນຍາໂດຍຍົກມືເບື້ອງຂວາຂອງເພິ່ນຂຶ້ນ. ເພິ່ນຍົກແຂນທີ່ແຂງແຮງຂຶ້ນແລະເວົ້າວ່າ:
“ເຮົາຈະບໍ່ເອົາເຂົ້າທີ່ເປັນອາຫານຂອງພວກເຈົ້າໃຫ້ສັດຕູອີກຕໍ່ໄປ
ແລະຈະບໍ່ໃຫ້ຄົນຕ່າງຊາດກິນເຫຼົ້າແວງໃໝ່ຂອງພວກເຈົ້າທີ່ພວກເຈົ້າເຮັດດ້ວຍຄວາມອິດເມື່ອຍ.+
9 ຜູ້ທີ່ກ່ຽວເຂົ້າຈະໄດ້ກິນເຂົ້າ ແລະເຂົາເຈົ້າຈະສັນລະເສີນພະເຢໂຫວາ
ຜູ້ທີ່ເກັບໝາກລະແຊັງກໍຈະໄດ້ກິນເຫຼົ້າແວງຢູ່ເດີ່ນທີ່ບໍລິສຸດຂອງເຮົາ.”+
10 ອອກມາ ໃຫ້ອອກມາທາງປະຕູ.
ໃຫ້ເຮັດຫົນທາງໃຫ້ແປນສຳລັບປະຊາຊົນ.+
ໃຫ້ສ້າງເສັ້ນທາງຫຼັກ
ແລະເອົາກ້ອນຫີນອອກໃຫ້ໝົດ.+
ໃຫ້ປັກທຸງ*ເພື່ອໃຫ້ປະເທດຕ່າງໆເຫັນ.+
11 ພະເຢໂຫວາປະກາດໄປຈົນຮອດສຸດຂອບໂລກວ່າ:
“ໃຫ້ເວົ້າກັບຊີໂອນວ່າ
‘ເຈົ້າຈະໄດ້ຮັບການຊ່ວຍໃຫ້ລອດໃນໄວໆນີ້.+
ເພິ່ນເອົາລາງວັນມານຳ
ແລະເອົາຄ່າຈ້າງມາພ້ອມ.’”+