ເອເຊກຽນ
31 ໃນວັນທີ 1 ເດືອນທີ 3 ຂອງປີທີ 11* ພະເຢໂຫວາເວົ້າກັບຂ້ອຍອີກວ່າ: 2 “ລູກມະນຸດເອີ້ຍ ໃຫ້ເຈົ້າເວົ້າກັບກະສັດເອຢິບແລະກອງທັບຂອງລາວວ່າ+
‘ໃຜຈະຍິ່ງໃຫຍ່ທຽບກັບເຈົ້າໄດ້?
3 ມີຄົນອັດຊີເຣຍຜູ້ໜຶ່ງເປັນຄືກັບຕົ້ນຊີດ້າ*ຢູ່ເລບານອນ.
ມັນສູງ ງ່າງາມ ແລະໃບດົກ.
ປາຍຂອງມັນສູງຮອດຂີ້ເຝື້ອ.
4 ມັນໃຫຍ່ຍ້ອນໄດ້ນ້ຳຫຼາຍແລະມັນສູງຍ້ອນໄດ້ນ້ຳຈາກພື້ນດິນ.
ມີຫ້ວຍໄຫຼອ້ອມມັນ
ແລະມີຄອງລະບາຍນ້ຳໃສ່ຕົ້ນໄມ້ທຸກຕົ້ນຢູ່ຫັ້ນ
5 ມັນຈຶ່ງສູງກວ່າຕົ້ນໄມ້ທຸກຕົ້ນທີ່ຢູ່ໃນທົ່ງ.
ມັນແຕກງ່າຫຼາຍແລະງ່າຂອງມັນກໍແຜ່ອອກໄປ
ຍ້ອນມັນໄດ້ນ້ຳຫຼາຍ.
6 ນົກທຸກໂຕມາເຮັດຮັງຢູ່ງ່າຂອງມັນ
ສັດປ່າທຸກໂຕກໍອອກລູກຢູ່ກ້ອງງ່າຂອງມັນ
ແລະທຸກຊາດທີ່ຍິ່ງໃຫຍ່ກໍມາອາໄສຢູ່ກ້ອງຮົ່ມຂອງມັນ.
7 ມັນໃຫຍ່ແລະງາມ. ງ່າຂອງມັນແຜ່ອອກໄປ
ແລະຮາກຂອງມັນກໍຢັ່ງລົງໄປຮອດບ່ອນທີ່ມີນ້ຳຫຼາຍ.
8 ບໍ່ມີຕົ້ນຊີດ້າຕົ້ນໃດໃນສວນຂອງພະເຈົ້າ+ທຽບກັບມັນໄດ້.
ບໍ່ມີຕົ້ນຈູນິເປີ້*ຕົ້ນໃດມີງ່າຄືກັບງ່າຂອງມັນ
ແລະບໍ່ມີຕົ້ນແພນ*ຕົ້ນໃດທີ່ມີງ່າຄືກັບງ່າຂອງມັນຄືກັນ.
ບໍ່ມີຕົ້ນໄມ້ຕົ້ນໃດໃນສວນຂອງພະເຈົ້າງາມສ່ຳກັບມັນ.
9 ເຮົາເຮັດໃຫ້ມັນງາມ ມີໃບດົກ
ແລະຕົ້ນໄມ້ຕົ້ນອື່ນໆໃນສວນເອເດັນຂອງພະເຈົ້າທ່ຽງແທ້ກໍອິດສາມັນ.’
10 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ: ‘ມັນ*ສູງຫຼາຍແລະປາຍຂອງມັນສູງຈົນຮອດຂີ້ເຝື້ອ ຍ້ອນມັນສູງແບບນີ້ມັນຈຶ່ງຈອງຫອງ. 11 ເຮົາຈະເຮັດໃຫ້ມັນຕົກຢູ່ໃນມືຂອງຜູ້ປົກຄອງທີ່ມີອຳນາດປົກຄອງຊາດຕ່າງໆ.+ ລາວຈະຈັດການມັນ ແລະເຮົາຈະບໍ່ຍອມຮັບມັນຍ້ອນມັນຊົ່ວຫຼາຍ. 12 ຄົນຕ່າງຊາດຈາກຊາດທີ່ໂຫດຫ້ຽມທີ່ສຸດຈະບັກມັນລົງແລະຈະປະມັນໄວ້ຢູ່ເທິງພູ. ໃບຂອງມັນຈະຫຼົ່ນລົງໃສ່ຮ່ອມພູທຸກບ່ອນ ແລະງ່າຂອງມັນຈະຟູຢູ່ຕາມຫ້ວຍທຸກສາຍ.+ ທຸກຊາດໃນໂລກຈະໜີຈາກຮົ່ມຂອງມັນແລະປະຖິ້ມມັນ. 13 ນົກທຸກໂຕຈະຈັບຢູ່ເທິງຕົ້ນຂອງມັນທີ່ລົ້ມລົງແລ້ວ ແລະສັດປ່າທຸກໂຕໃນທົ່ງຈະຢຽບຢູ່ງ່າຂອງມັນ.+ 14 ຕັ້ງແຕ່ຕອນນັ້ນ ຈະບໍ່ມີຕົ້ນໄມ້ທີ່ຢູ່ໃກ້ນ້ຳສູງຈົນຮອດຂີ້ເຝື້ອອີກຕໍ່ໄປ ຍ້ອນຕົ້ນໄມ້ທຸກຕົ້ນຈະຕາຍໝົດ. ພວກມັນຈະຖືກຝັງຢູ່ດິນຄືກັບຄົນຕາຍ.’*
15 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ: ‘ໃນມື້ທີ່ມັນລົງໄປໃນບ່ອນຝັງສົບ* ເຮົາຈະເຮັດໃຫ້ມີຄວາມໂສກເສົ້າ. ເຮົາຈະຕັນນ້ຳທີ່ຢູ່ພື້ນດິນແລະກັ້ນແມ່ນ້ຳໄວ້ເພື່ອບໍ່ໃຫ້ນ້ຳທີ່ຫຼາຍໆນັ້ນໄຫຼອອກມາ. ເຮົາຈະເຮັດໃຫ້ເລບານອນມືດຍ້ອນມັນ ແລະຕົ້ນໄມ້ທຸກຕົ້ນໃນທົ່ງຈະຫ່ຽວແຫ້ງ. 16 ຕອນທີ່ເຮົາເອົາມັນລົງໄປໃນບ່ອນຝັງສົບ*ນຳກັນກັບຄົນທີ່ຕາຍ* ມັນຈະລົ້ມລົງສຽງດັງໆ ເຊິ່ງຈະເຮັດໃຫ້ຊາດຕ່າງໆຢ້ານຈົນໂຕສັ່ນ. ຢູ່ພື້ນດິນນັ້ນ ຕົ້ນໄມ້ທຸກຕົ້ນໃນສວນເອເດັນ+ ຕົ້ນໄມ້ທີ່ງາມແລະດີທີ່ສຸດໃນເລບານອນ ແລະຕົ້ນໄມ້ທີ່ໄດ້ນ້ຳຫຼາຍຈະໄດ້ຮັບການປອບໂຍນ. 17 ຕົ້ນໄມ້ເຫຼົ່ານີ້ລົງໄປໃນບ່ອນຝັງສົບ*ກັບລາວ*ແລ້ວ. ມັນໄປຢູ່ກັບພວກທີ່ຖືກຂ້າດ້ວຍດາບ+ ແລະໄປຢູ່ກັບພວກທີ່ສະໜັບສະໜູນລາວທີ່ເຄີຍຢູ່ກ້ອງຮົ່ມຂອງລາວໃນທ່າມກາງຊາດຕ່າງໆ.’+
18 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ: ‘ໃນສວນເອເດັນບໍ່ມີຕົ້ນໄມ້ຕົ້ນໃດທີ່ໃຫຍ່ແລະງາມຄືກັບເຈົ້າ.+ ແຕ່ເຈົ້າຈະຕາຍ*ແທ້ໆນຳກັນກັບຕົ້ນໄມ້ທຸກຕົ້ນໃນສວນເອເດັນ. ເຈົ້າຈະນອນຢູ່ກັບພວກທີ່ບໍ່ໄດ້ຮັບສິນຕັດ*ແລະພວກທີ່ຖືກຂ້າດ້ວຍດາບ. ນີ້ແມ່ນສິ່ງທີ່ຈະເກີດຂຶ້ນກັບຟາໂຣ*ແລະກອງທັບທັງໝົດຂອງລາວ.’”