ພະບັນຍັດ
16 “ຢ່າລືມວ່າເຈົ້າຕ້ອງສະຫຼອງປັດສະຄາສຳລັບພະເຢໂຫວາພະເຈົ້າຂອງເຈົ້າໃນເດືອນອາບິບ+ ເພາະໃນເດືອນອາບິບນີ້ ພະເຢໂຫວາພະເຈົ້າຂອງເຈົ້າໄດ້ພາເຈົ້າອອກມາຈາກເອຢິບໃນຕອນກາງຄືນ.+ 2 ເຈົ້າຕ້ອງເອົາງົວ ແກະ ແລະແບ້ຈາກຝູງສັດ+ຂອງເຈົ້າມາເປັນເຄື່ອງບູຊາສຳລັບເທດສະການປັດສະຄາໃຫ້ພະເຢໂຫວາພະເຈົ້າຂອງເຈົ້າ+ ໃນບ່ອນທີ່ພະເຢໂຫວາໄດ້ເລືອກໄວ້ສຳລັບຊື່ຂອງເພິ່ນ.+ 3 ຫ້າມເຈົ້າກິນເຂົ້າຈີ່ທີ່ມີເຊື້ອກັບຊີ້ນສັດເຫຼົ່ານັ້ນ.+ ເຈົ້າຕ້ອງກິນເຂົ້າຈີ່ບໍ່ມີເຊື້ອ 7 ມື້ ເຊິ່ງເປັນເຂົ້າຈີ່ແຫ່ງຄວາມທຸກ ຍ້ອນເຈົ້າອອກມາຈາກເອຢິບແບບຟ້າວຟັ່ງ.+ ໃຫ້ເຈົ້າເຮັດແນວນີ້ຕະຫຼອດຊີວິດຂອງເຈົ້າເພື່ອຄິດເຖິງມື້ທີ່ເຈົ້າອອກມາຈາກເອຢິບ.+ 4 ຫ້າມມີແປ້ງທີ່ໃສ່ເຊື້ອຢູ່ໃນເຂດທີ່ເຈົ້າຢູ່ໃນໄລຍະ 7 ມື້ນີ້.+ ຫ້າມຈົ່ງຊີ້ນສັດທີ່ເປັນເຄື່ອງບູຊາໃນຕອນຄ່ຳຂອງມື້ທຳອິດໄວ້ຈົນຮອດເຊົ້າມື້ຕໍ່ໄປ.+ 5 ເມື່ອເຈົ້າໄດ້ຢູ່ໃນເມືອງທີ່ພະເຢໂຫວາພະເຈົ້າຂອງເຈົ້າເອົາໃຫ້ແລ້ວ ຫ້າມເຈົ້າຂ້າສັດທີ່ຈະໃຊ້ເປັນເຄື່ອງບູຊາໃນເທດສະການປັດສະຄາຢູ່ບ່ອນໃດກໍໄດ້ຕາມໃຈ. 6 ແຕ່ເຈົ້າຕ້ອງຂ້າສັດນັ້ນໃນບ່ອນທີ່ພະເຢໂຫວາພະເຈົ້າຂອງເຈົ້າໄດ້ເລືອກໄວ້ສຳລັບຊື່ຂອງເພິ່ນ. ເຈົ້າຕ້ອງເອົາເຄື່ອງບູຊາສຳລັບເທດສະການປັດສະຄາໃຫ້ຫຼັງຈາກຕາເວັນຕົກດິນ+ ເຊິ່ງກົງກັບມື້ທີ່ເຈົ້າອອກມາຈາກເອຢິບ. 7 ເຈົ້າຕ້ອງປີ້ງຊີ້ນແລະກິນຊີ້ນນັ້ນ+ໃນບ່ອນທີ່ພະເຢໂຫວາພະເຈົ້າຂອງເຈົ້າໄດ້ເລືອກໄວ້.+ ເຊົ້າມື້ຕໍ່ໄປ ເຈົ້າຈຶ່ງກັບໄປເຕັ້ນຂອງໂຕເອງໄດ້. 8 ພວກເຈົ້າຕ້ອງກິນເຂົ້າຈີ່ບໍ່ມີເຊື້ອ 6 ມື້ ແລະໃນມື້ທີ 7 ພວກເຈົ້າຕ້ອງຈັດການປະຊຸມພິເສດສຳລັບພະເຢໂຫວາພະເຈົ້າຂອງພວກເຈົ້າ. ຫ້າມພວກເຈົ້າເຮັດວຽກ.+
9 ຫຼັງຈາກມື້ທີ່ເຈົ້າເລີ່ມກ່ຽວເຂົ້າ ໃຫ້ເຈົ້ານັບໄປອີກ 7 ອາທິດ.+ 10 ເມື່ອຄົບແລ້ວ ໃຫ້ເຈົ້າສະຫຼອງເທດສະການເກັບກ່ຽວ*ໃຫ້ພະເຢໂຫວາພະເຈົ້າຂອງເຈົ້າ+ ໂດຍເອົາເຄື່ອງບູຊາທີ່ໃຫ້ດ້ວຍຄວາມສະໝັກໃຈໄປໃຫ້ພະເຢໂຫວາຕາມທີ່ເຈົ້າເອົາໃຫ້ໄດ້ ຍ້ອນເພິ່ນອວຍພອນເຈົ້າ.+ 11 ໃຫ້ເຈົ້າສະຫຼອງຢ່າງມີຄວາມສຸກຕໍ່ໜ້າພະເຢໂຫວາພະເຈົ້າຂອງເຈົ້າ ພ້ອມກັບລູກຊາຍ ລູກສາວ ຄົນເລວີທີ່ຢູ່ໃນເມືອງຂອງເຈົ້າ ຄົນຕ່າງຊາດ ລູກກຳພ້າພໍ່* ແລະແມ່ໝ້າຍທີ່ຢູ່ນຳເຈົ້າ ໃນບ່ອນທີ່ພະເຢໂຫວາພະເຈົ້າຂອງເຈົ້າໄດ້ເລືອກໄວ້ສຳລັບຊື່ຂອງເພິ່ນ.+ 12 ຢ່າລືມວ່າເຈົ້າເຄີຍເປັນທາດຢູ່ໃນເອຢິບ.+ ໃຫ້ເຈົ້າຈື່ຂໍ້ກຳນົດເຫຼົ່ານີ້ແລະເຮັດຕາມ.
13 ຫຼັງຈາກທີ່ເຈົ້າຟາດເຂົ້າແລ້ວ ແລະເຮັດນ້ຳມັນໝາກກອກກັບເຫຼົ້າແວງແລ້ວ ໃຫ້ເຈົ້າສະຫຼອງເທດສະການປຸກຕູບ*+ 7 ມື້. 14 ໃຫ້ເຈົ້າສະຫຼອງເທດສະການນີ້ຢ່າງມ່ວນຊື່ນ+ ກັບລູກຊາຍ ລູກສາວ ທາດຊາຍ ທາດຍິງ ຄົນເລວີ ຄົນຕ່າງຊາດ ລູກກຳພ້າພໍ່ ແລະແມ່ໝ້າຍທີ່ຢູ່ໃນເມືອງຂອງເຈົ້າ. 15 ໃຫ້ເຈົ້າສະຫຼອງເທດສະການນີ້ໃຫ້ພະເຢໂຫວາພະເຈົ້າຂອງເຈົ້າ 7 ມື້+ ໃນບ່ອນທີ່ພະເຢໂຫວາໄດ້ເລືອກໄວ້ ຍ້ອນພະເຢໂຫວາພະເຈົ້າຂອງເຈົ້າໄດ້ອວຍພອນເຈົ້າໃຫ້ໄດ້ຮັບຜົນລະປູກຫຼາຍ ແລະອວຍພອນທຸກສິ່ງທີ່ເຈົ້າເຮັດ.+ ເຈົ້າຈະມີຄວາມສຸກຫຼາຍ.+
16 ໃຫ້ຜູ້ຊາຍທຸກຄົນໄປຢູ່ຕໍ່ໜ້າພະເຢໂຫວາພະເຈົ້າຂອງເຈົ້າໃນບ່ອນທີ່ເພິ່ນເລືອກໄວ້ ປີລະ 3 ເທື່ອຄື: ຕອນເທດສະການກິນເຂົ້າຈີ່ບໍ່ມີເຊື້ອ+ ເທດສະການເກັບກ່ຽວ+ ແລະເທດສະການປຸກຕູບ.+ ເມື່ອໄປຫາພະເຢໂຫວາ ຢ່າໃຫ້ຜູ້ໃດໄປແຕ່ໂຕ. 17 ໃຫ້ແຕ່ລະຄົນມີແນວເອົາໄປໃຫ້ພະເຢໂຫວາພະເຈົ້າຂອງເຈົ້າຕາມທີ່ໃຫ້ໄດ້ ຍ້ອນເພິ່ນອວຍພອນເຈົ້າ.+
18 ເຈົ້າຕ້ອງແຕ່ງຕັ້ງຜູ້ຕັດສິນ+ ແລະຫົວໜ້າສຳລັບແຕ່ລະຕະກູນ ໃນທຸກເມືອງທີ່ພະເຢໂຫວາພະເຈົ້າຂອງເຈົ້າຍົກໃຫ້ເຈົ້າ. ເຂົາເຈົ້າຕ້ອງຕັດສິນປະຊາຊົນຢ່າງຍຸຕິທຳ. 19 ເຈົ້າຕ້ອງເປັນຄົນຍຸຕິທຳ+ ບໍ່ເຂົ້າຂ້າງຜູ້ໃດ+ແລະບໍ່ຮັບສິນບົນ ເພາະສິນບົນເຮັດໃຫ້ຄົນສະຫຼາດຕາບອດ+ ແລະເຮັດໃຫ້ຄົນສັດຊື່ເວົ້າປີ້ນຄວາມ. 20 ເຈົ້າຕ້ອງເປັນຄົນຍຸຕິທຳ.+ ຖ້າເຮັດແນວນັ້ນ ເຈົ້າຈະມີອາຍຸຍືນຍາວແລະໄດ້ຢູ່ໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້າ.
21 ຫ້າມເຈົ້າປູກຕົ້ນໄມ້ເພື່ອໃຊ້ເຮັດເປັນເສົາໄມ້ສັກສິດ+ຢູ່ໃກ້ແທ່ນບູຊາທີ່ເຈົ້າສ້າງໄວ້ໃຫ້ພະເຢໂຫວາພະເຈົ້າຂອງເຈົ້າ.
22 ຫ້າມເຈົ້າເຮັດເສົາຫີນຂຶ້ນມາຂາບໄຫວ້+ຄືກັນ ຍ້ອນພະເຢໂຫວາພະເຈົ້າຂອງເຈົ້າກຽດຊັງສິ່ງນີ້.”