ພະບັນຍັດ
9 “ພວກອິດສະຣາເອນເອີ້ຍ ຂໍໃຫ້ຟັງເດີ້. ມື້ນີ້ພວກເຈົ້າຈະຂ້າມແມ່ນ້ຳຈໍແດນໄປ+ ເພື່ອຈະເຂົ້າໄປຍຶດເອົາແຜ່ນດິນຂອງຊາດຕ່າງໆທີ່ມີຄົນຫຼາຍກວ່າແລະມີກຳລັງຫຼາຍກວ່າພວກເຈົ້າ.+ ເມືອງຕ່າງໆຂອງພວກເຂົາທັງໃຫຍ່ແລະມີກຳແພງ*ອ້ອມເມືອງທີ່ສູງຈົນຮອດຟ້າ.+ 2 ຄົນຢູ່ຫັ້ນທັງໃຫຍ່ທັງສູງແລະເປັນລູກຫຼານຂອງອານາກ.+ ພວກເຈົ້າກໍຮູ້ແລະເຄີຍໄດ້ຍິນຄົນພາກັນເວົ້າວ່າ ‘ຜູ້ໃດຊິໄປຕໍ່ສູ້ກັບພວກລູກຫຼານຂອງອານາກໄດ້?’ 3 ແຕ່ຢ່າລືມວ່າພະເຢໂຫວາພະເຈົ້າຂອງພວກເຈົ້າຈະຂ້າມໄປກ່ອນພວກເຈົ້າ.+ ເພິ່ນເປັນຄືກັບໄຟທີ່ເຜົາຜານ+ແລະເພິ່ນຈະທຳລາຍຊາດຕ່າງໆເຫຼົ່ານັ້ນ. ພະເຢໂຫວາຈະຂັບໄລ່ພວກເຂົາອອກໄປຕໍ່ໜ້າພວກເຈົ້າຢ່າງໄວ ແລະຈະທຳລາຍພວກເຂົາຄືກັບທີ່ເພິ່ນໄດ້ສັນຍາໄວ້.+
4 ເມື່ອພະເຢໂຫວາພະເຈົ້າຂັບໄລ່ພວກເຂົາອອກໄປຕໍ່ໜ້າພວກເຈົ້າແລ້ວ ຢ່າຄິດເອົາເອງວ່າ ‘ພະເຢໂຫວາພາຂ້ອຍມາຍຶດແຜ່ນດິນນີ້ຍ້ອນຄວາມດີຂອງຂ້ອຍ.’+ ແທ້ໆແລ້ວ ພະເຢໂຫວາໄລ່ຊາດຕ່າງໆ+ອອກໄປຕໍ່ໜ້າພວກເຈົ້າກໍຍ້ອນຄວາມຊົ່ວຂອງພວກເຂົາ. 5 ພວກເຈົ້າຈະຍຶດເອົາແຜ່ນດິນຂອງພວກເຂົາໄດ້ ບໍ່ແມ່ນຍ້ອນພວກເຈົ້າເປັນຄົນດີຫຼືມີໃຈສັດຊື່. ແຕ່ພະເຢໂຫວາພະເຈົ້າຂອງພວກເຈົ້າຈະຂັບໄລ່ຊາດຕ່າງໆອອກໄປຕໍ່ໜ້າພວກເຈົ້າ+ ກໍຍ້ອນພວກເຂົາເປັນຄົນຊົ່ວ ແລະຍ້ອນພະເຢໂຫວາເຮັດຕາມຄຳສັນຍາທີ່ໃຫ້ໄວ້ກັບອັບຣາຮາມ+ ອີຊາກ+ ແລະຢາໂຄບ+ທີ່ເປັນປູ່ຍ່າຕານາຍຂອງພວກເຈົ້າ. 6 ຂໍໃຫ້ຮູ້ໄວ້ວ່າພະເຢໂຫວາພະເຈົ້າຊ່ວຍພວກເຈົ້າໃຫ້ຍຶດເອົາແຜ່ນດິນດີໆນີ້ໄດ້ ບໍ່ແມ່ນຍ້ອນພວກເຈົ້າເປັນຄົນດີ ເພາະແທ້ໆແລ້ວພວກເຈົ້າເປັນຄົນຫົວແຂງ.+
7 ຂໍໃຫ້ຈື່ໄວ້ແລະຢ່າລືມເດັດຂາດ ພວກເຈົ້າໄດ້ເຮັດໃຫ້ພະເຢໂຫວາພະເຈົ້າຂອງພວກເຈົ້າໃຈຮ້າຍຢູ່ບ່ອນກັນດານ.+ ພວກເຈົ້າໄດ້ກະບົດຕໍ່ພະເຢໂຫວາ+ຕັ້ງແຕ່ມື້ທີ່ອອກຈາກເອຢິບຈົນຮອດບ່ອນນີ້. 8 ແມ່ນແຕ່ຕອນທີ່ຢູ່ໂຮເຣັບ ພວກເຈົ້າກໍເຮັດໃຫ້ພະເຢໂຫວາໃຈຮ້າຍ ແລະພະເຢໂຫວາກໍໃຈຮ້າຍຫຼາຍຈົນຢາກຈະທຳລາຍພວກເຈົ້າໃຫ້ໝົດໄປເລີຍ.+ 9 ຕອນນັ້ນ ຂ້ອຍຂຶ້ນໄປເທິງພູເພື່ອຈະໄປເອົາແຜ່ນຫີນ 2 ແຜ່ນ+ ເຊິ່ງມີຄຳສັນຍາທີ່ພະເຢໂຫວາເຮັດກັບພວກເຈົ້າ.+ ຂ້ອຍຢູ່ເທິງພູນັ້ນ 40 ມື້ 40 ຄືນ+ແລະບໍ່ໄດ້ກິນເຂົ້າບໍ່ໄດ້ກິນນ້ຳເລີຍ. 10 ແລ້ວພະເຢໂຫວາໄດ້ເອົາແຜ່ນຫີນ 2 ແຜ່ນທີ່ເພິ່ນຂຽນດ້ວຍມືຂອງເພິ່ນເອງໃຫ້ຂ້ອຍ ແລະໃນແຜ່ນຫີນ 2 ແຜ່ນນັ້ນກໍມີຄຳເວົ້າຂອງພະເຢໂຫວາທີ່ເພິ່ນເວົ້າກັບພວກເຈົ້າຈາກໄຟຢູ່ເທິງພູໃນມື້ທີ່ພວກເຈົ້າມາປະຊຸມກັນ.+ 11 ເມື່ອຮອດ 40 ມື້ 40 ຄືນແລ້ວ ພະເຢໂຫວາກໍເອົາແຜ່ນຫີນ 2 ແຜ່ນທີ່ມີຄຳສັນຍາຂອງເພິ່ນໃຫ້ຂ້ອຍ. 12 ພະເຢໂຫວາເວົ້າກັບຂ້ອຍວ່າ ‘ໃຫ້ຟ້າວລົງໄປ ເພາະຄົນທີ່ເຈົ້າພາອອກມາຈາກເອຢິບນັ້ນໄດ້ເຮັດຊົ່ວແລ້ວ.+ ເຂົາເຈົ້າຖິ້ມຄຳສັ່ງຂອງເຮົາໄວຫຼາຍ. ເຂົາເຈົ້າຫຼໍ່ຮູບບູຊາຂຶ້ນມາເພື່ອຂາບໄຫວ້.’+ 13 ພະເຢໂຫວາບອກຂ້ອຍວ່າ ‘ເຮົາເຫັນແລ້ວວ່າຄົນພວກນີ້ເປັນຄົນຫົວແຂງແທ້ໆ.+ 14 ຢ່າຫ້າມເຮົາເລີຍ. ເຮົາຈະທຳລາຍເຂົາເຈົ້າແລະເຮັດໃຫ້ບໍ່ມີຜູ້ໃດໃນໂລກນີ້ຈື່ຊື່ຂອງເຂົາເຈົ້າໄດ້. ເຮົາຈະເຮັດໃຫ້ລູກຫຼານຂອງເຈົ້າກາຍເປັນຊາດທີ່ມີກຳລັງຫຼາຍກວ່າແລະມີຄົນຫຼາຍກວ່າເຂົາເຈົ້າ.’+
15 ຂ້ອຍລົງມາຈາກພູຕອນທີ່ຍັງມີໄຟລຸກຢູ່+ ແລະຖືແຜ່ນຫີນ 2 ແຜ່ນທີ່ມີຄຳສັນຍາລົງມານຳ.+ 16 ແລ້ວຂ້ອຍກໍເຫັນພວກເຈົ້າເຮັດຜິດຕໍ່ພະເຢໂຫວາພະເຈົ້າຂອງພວກເຈົ້າ. ພວກເຈົ້າໄດ້ຫຼໍ່ຮູບງົວນ້ອຍຂຶ້ນມາເພື່ອນະມັດສະການ. ພວກເຈົ້າຖິ້ມຄຳສັ່ງຂອງພະເຢໂຫວາໄວຫຼາຍ.+ 17 ຂ້ອຍກໍເລີຍຖິ້ມແຜ່ນຫີນທັງສອງແຜ່ນລົງພື້ນ ແລ້ວແຜ່ນຫີນກໍແຕກເປັນປ່ຽງໆຕໍ່ໜ້າພວກເຈົ້າ.+ 18 ແລ້ວຂ້ອຍກໍໝູບໜ້າລົງພື້ນຕໍ່ໜ້າພະເຢໂຫວາໃນລະຫວ່າງ 40 ມື້ 40 ຄືນ. ຂ້ອຍບໍ່ໄດ້ກິນເຂົ້າບໍ່ໄດ້ກິນນ້ຳເລີຍ+ຍ້ອນພວກເຈົ້າເຮັດຜິດ ໂດຍເຮັດສິ່ງທີ່ພະເຢໂຫວາເຫັນວ່າຊົ່ວແລະເຮັດໃຫ້ເພິ່ນບໍ່ພໍໃຈ. 19 ຂ້ອຍຢ້ານຫຼາຍ ຍ້ອນພະເຢໂຫວາໃຈຮ້າຍໃຫ້ພວກເຈົ້າແຮງ.+ ເພິ່ນເກືອບຊິທຳລາຍພວກເຈົ້າໃຫ້ໝົດໄປແລ້ວ ແຕ່ຍັງດີທີ່ເທື່ອນັ້ນພະເຢໂຫວາຍັງຟັງຂ້ອຍຢູ່.+
20 ພະເຢໂຫວາກໍໃຈຮ້າຍໃຫ້ອາໂຣນແຮງແລະຢາກຈະທຳລາຍລາວ.+ ແຕ່ຕອນນັ້ນ ຂ້ອຍໄດ້ອ້ອນວອນເພື່ອລາວຄືກັນ. 21 ແລ້ວຂ້ອຍກໍເອົາຮູບງົວນ້ອຍ+ທີ່ເປັນສິ່ງຊົ່ວຮ້າຍທີ່ພວກເຈົ້າເຮັດຂຶ້ນມານັ້ນໄປເຜົາໄຟ. ຂ້ອຍບົດມັນຈົນມຸ່ນແລ້ວເອົາໄປໂຮຍໃສ່ນ້ຳຫ້ວຍທີ່ໄຫຼມາແຕ່ພູ.+
22 ຕໍ່ມາ ພວກເຈົ້າກໍເຮັດໃຫ້ພະເຢໂຫວາໃຈຮ້າຍອີກຕອນຢູ່ຕາເບຣາ+ ຢູ່ມາສາ+ ແລະຢູ່ກິບໂຣດຮັດຕາວາ.+ 23 ຕອນທີ່ພະເຢໂຫວາໃຫ້ພວກເຈົ້າອອກຈາກກາເດັດບາເນອາ+ ເພິ່ນສັ່ງພວກເຈົ້າວ່າ ‘ໃຫ້ຂຶ້ນໄປແລະຍຶດເອົາແຜ່ນດິນທີ່ເຮົາຊິເອົາໃຫ້ພວກເຈົ້າ.’ ພວກເຈົ້າກໍຂັດຄຳສັ່ງຂອງພະເຢໂຫວາພະເຈົ້າຂອງພວກເຈົ້າອີກ.+ ພວກເຈົ້າບໍ່ເຊື່ອ+ເພິ່ນແລະບໍ່ຟັງຄວາມເພິ່ນ. 24 ຕັ້ງແຕ່ຂ້ອຍຮູ້ຈັກພວກເຈົ້າມາ ພວກເຈົ້າກະບົດຕໍ່ພະເຢໂຫວາຕະຫຼອດເລີຍ.
25 ຂ້ອຍໄດ້ໝູບໜ້າລົງຕໍ່ໜ້າພະເຢໂຫວາລະຫວ່າງ 40 ມື້ 40 ຄືນ.+ ຂ້ອຍເຮັດແນວນີ້ກໍຍ້ອນພະເຢໂຫວາບອກວ່າຊິທຳລາຍພວກເຈົ້າ. 26 ຂ້ອຍອ້ອນວອນພະເຢໂຫວາວ່າ ‘ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດ ຂໍຢ່າທຳລາຍຄົນຂອງພະອົງ. ເຂົາເຈົ້າເປັນຊັບສົມບັດສ່ວນໂຕຂອງພະອົງ.+ ພະອົງໄດ້ໃຊ້ລິດເດດທີ່ຍິ່ງໃຫຍ່ຂອງພະອົງ*+ຊ່ວຍເຂົາເຈົ້າໃຫ້ລອດ ແລະພາເຂົາເຈົ້າອອກມາຈາກເອຢິບ. 27 ຂໍພະອົງຄິດເຖິງອັບຣາຮາມ ອີຊາກ ແລະຢາໂຄບ+ທີ່ເປັນຜູ້ຮັບໃຊ້ຂອງພະອົງ. ຂໍພະອົງຢ່າສົນໃຈຄົນພວກນີ້ທີ່ເປັນຄົນຫົວແຂງ ເປັນຄົນຊົ່ວ ແລະເຮັດຜິດ.+ 28 ຖ້າພະອົງທຳລາຍເຂົາເຈົ້າ ຄົນໃນແຜ່ນດິນທີ່ພະອົງພາເຂົາເຈົ້າອອກມາອາດຈະເວົ້າວ່າ “ພະເຢໂຫວາພາເຂົາເຈົ້າເຂົ້າໄປໃນແຜ່ນດິນທີ່ເພິ່ນສັນຍາໄວ້ບໍ່ໄດ້. ຍ້ອນເພິ່ນຊັງເຂົາເຈົ້າ ເພິ່ນຈຶ່ງພາເຂົາເຈົ້າອອກມາຂ້າຢູ່ບ່ອນກັນດານນີ້.”+ 29 ເຂົາເຈົ້າເປັນຄົນຂອງພະອົງແລະເປັນຊັບສົມບັດສ່ວນໂຕຂອງພະອົງ.+ ພະອົງໃຊ້ລິດເດດທີ່ຍິ່ງໃຫຍ່*+ຂອງພະອົງຊ່ວຍເຂົາເຈົ້າໃຫ້ລອດ.’”