ຊາມູເອນສະບັບທີໜຶ່ງ
12 ແລ້ວຊາມູເອນກໍເວົ້າກັບພວກອິດສະຣາເອນວ່າ: “ຂ້ອຍໄດ້ເຮັດທຸກສິ່ງຕາມທີ່ພວກເຈົ້າຂໍແລ້ວ ແລະຂ້ອຍໄດ້ແຕ່ງຕັ້ງກະສັດໃຫ້ປົກຄອງພວກເຈົ້າ.+ 2 ຕອນນີ້ ພວກເຈົ້າມີກະສັດທີ່ຈະເປັນຜູ້ນຳພວກເຈົ້າແລ້ວ.+ ຂ້ອຍເອງກໍເຖົ້າຫຼາຍຈົນຜົມຫງອກເຕັມຫົວແລະລູກຊາຍຂ້ອຍກໍຢູ່ນຳພວກເຈົ້າ+ ແລະຂ້ອຍໄດ້ເປັນຜູ້ນຳຂອງພວກເຈົ້າຕັ້ງແຕ່ຍັງໜຸ່ມຈົນຮອດຕອນນີ້.+ 3 ຖ້າພວກເຈົ້າມີເລື່ອງຈະເວົ້າໃຫ້ຂ້ອຍກໍໃຫ້ເວົ້າຕໍ່ໜ້າພະເຢໂຫວາແລະຕໍ່ໜ້າຜູ້ທີ່ເພິ່ນເລືອກ.+ ຂ້ອຍເຄີຍເອົາງົວຫຼືລາຂອງຜູ້ໃດບໍ?+ ຂ້ອຍເຄີຍສໍ້ໂກງຫຼືກົດຂີ່ຂົ່ມເຫງຜູ້ໃດບໍ? ຂ້ອຍເຄີຍຮັບເອົາເງິນຈາກຜູ້ໃດເພື່ອຕັດສິນຢ່າງບໍ່ຖືກຕ້ອງບໍ?+ ຖ້າຂ້ອຍເຄີຍເຮັດແບບນັ້ນ ຂ້ອຍຈະໄຊ້ຄືນໃຫ້.”+ 4 ເຂົາເຈົ້າຕອບລາວວ່າ: “ເຈົ້າບໍ່ເຄີຍສໍ້ໂກງຫຼືກົດຂີ່ຂົ່ມເຫງພວກເຮົາ ແລະບໍ່ເຄີຍເອົາເງິນຈາກຜູ້ໃດແບບບໍ່ສັດຊື່.” 5 ຊາມູເອນບອກເຂົາເຈົ້າວ່າ: “ມື້ນີ້ຂໍໃຫ້ພະເຢໂຫວາແລະຜູ້ທີ່ເພິ່ນເລືອກເປັນພະຍານວ່າ ຂ້ອຍບໍ່ໄດ້ເອົາຫຍັງຈາກພວກເຈົ້າ.” ເຂົາເຈົ້າກໍເວົ້າວ່າ: “ເພິ່ນເປັນພະຍານໃຫ້ພວກເຮົາ.”
6 ຊາມູເອນເວົ້າກັບປະຊາຊົນວ່າ: “ພະເຢໂຫວາເປັນພະຍານ. ເພິ່ນເປັນຜູ້ເລືອກໂມເຊກັບອາໂຣນ ແລະເປັນຜູ້ທີ່ພາປູ່ຍ່າຕານາຍຂອງພວກເຈົ້າອອກມາຈາກເອຢິບ.+ 7 ຕອນນີ້ໃຫ້ພວກເຈົ້າຢືນຟັງ. ຂ້ອຍຈະຕັດສິນພວກເຈົ້າຕໍ່ໜ້າພະເຢໂຫວາ ແລະຊ່ວຍພວກເຈົ້າໃຫ້ຈື່ສິ່ງດີໆທຸກຢ່າງທີ່ພະເຢໂຫວາໄດ້ເຮັດເພື່ອພວກເຈົ້າແລະປູ່ຍ່າຕານາຍຂອງພວກເຈົ້າ.
8 ຕອນທີ່ຢາໂຄບມາຮອດເອຢິບ+ແລະປູ່ຍ່າຕານາຍຂອງພວກເຈົ້າໄດ້ຮ້ອງຂໍໃຫ້ພະເຢໂຫວາຊ່ວຍ+ ພະເຢໂຫວາໄດ້ສົ່ງໂມເຊ+ກັບອາໂຣນໄປພາເຂົາເຈົ້າອອກຈາກເອຢິບແລະໃຫ້ມາຢູ່ນີ້.+ 9 ແຕ່ເຂົາເຈົ້າລືມພະເຢໂຫວາພະເຈົ້າຂອງເຂົາເຈົ້າ ແລະເພິ່ນໄດ້ປ່ອຍໃຫ້ເຂົາເຈົ້າ+ຕົກຢູ່ໃນມືຂອງຫົວໜ້າກອງທັບທີ່ຊື່ຊີເຊຣາ+ຈາກເມືອງຮາໂສ ແລະຕົກຢູ່ໃນມືຂອງພວກຟີລິດສະຕີນ+ ແລະຕົກຢູ່ໃນມືກະສັດໂມອາບ+ ແລະພວກນີ້ກໍມາຕໍ່ສູ້ເຂົາເຈົ້າ. 10 ເຂົາເຈົ້າຈຶ່ງຂໍໃຫ້ພະເຢໂຫວາຊ່ວຍ+ແລະເວົ້າວ່າ: ‘ພວກເຮົາເຮັດຜິດແລ້ວ+ທີ່ປະຖິ້ມພະເຢໂຫວາ ແລ້ວໄປນະມັດສະການພະບາອານ+ແລະຮູບພະອັດຊະໂຕເຣດ.*+ ຕອນນີ້ຂໍຊ່ວຍພວກເຮົາໃຫ້ພົ້ນຈາກພວກສັດຕູແດ່ ແລ້ວພວກເຮົາຈະຮັບໃຊ້ພະອົງ.’ 11 ພະເຢໂຫວາຈຶ່ງສົ່ງເຢຣຸບບາອານ+ ເບດານ ເຢັບທາ+ ແລະຊາມູເອນ+ມາຊ່ວຍພວກເຈົ້າໃຫ້ລອດຈາກພວກສັດຕູເພື່ອພວກເຈົ້າຈະຢູ່ຢ່າງປອດໄພ.+ 12 ເມື່ອພວກເຈົ້າເຫັນນາຮາດ+ກະສັດອຳໂມນມາຕໍ່ສູ້ພວກເຈົ້າ ພວກເຈົ້າກໍຂໍແລ້ວຂໍອີກກັບຂ້ອຍວ່າ ‘ພວກເຮົາຢາກໄດ້ກະສັດປົກຄອງ!’+ ທັງໆທີ່ພວກເຈົ້າກໍມີພະເຢໂຫວາພະເຈົ້າເປັນກະສັດຂອງພວກເຈົ້າຢູ່ແລ້ວ.+ 13 ຕອນນີ້ ພວກເຈົ້າມີກະສັດທີ່ພວກເຈົ້າຢາກໄດ້ແລະຕາມທີ່ພວກເຈົ້າຂໍ. ພະເຢໂຫວາໄດ້ແຕ່ງຕັ້ງກະສັດປົກຄອງພວກເຈົ້າແລ້ວ.+ 14 ຖ້າພວກເຈົ້າຢ້ານຢຳພະເຢໂຫວາ+ ຮັບໃຊ້ເພິ່ນ+ ເຮັດຕາມທີ່ເພິ່ນບອກ+ແລະບໍ່ເຮັດສິ່ງທີ່ພະເຢໂຫວາຫ້າມ ແລະຖ້າພວກເຈົ້າກັບກະສັດທີ່ປົກຄອງພວກເຈົ້າເຊື່ອຟັງພະເຢໂຫວາ ເພິ່ນກໍຈະພໍໃຈແລະພວກເຈົ້າກໍຈະໄດ້ຮັບປະໂຫຍດ. 15 ແຕ່ຖ້າພວກເຈົ້າບໍ່ເຮັດຕາມທີ່ພະເຢໂຫວາບອກແລະເຮັດສິ່ງທີ່ພະເຢໂຫວາຫ້າມ ພະເຢໂຫວາຈະລົງໂທດພວກເຈົ້າແລະພໍ່ຂອງພວກເຈົ້າ.+ 16 ຕອນນີ້ໃຫ້ພວກເຈົ້າຢືນເບິ່ງສິ່ງອັດສະຈັນທີ່ພະເຢໂຫວາຈະເຮັດໃຫ້ພວກເຈົ້າເຫັນ. 17 ມື້ນີ້ແມ່ນລະດູກ່ຽວເຂົ້າວີດ*ແມ່ນບໍ? ຂ້ອຍຈະຂໍພະເຢໂຫວາເຮັດໃຫ້ມີຟ້າຮ້ອງແລະຝົນຕົກ ເພື່ອພວກເຈົ້າຈະຮູ້ແລະເຂົ້າໃຈວ່າການທີ່ພວກເຈົ້າຂໍໃຫ້ມີກະສັດເປັນເລື່ອງຊົ່ວຮ້າຍແທ້ໆສຳລັບພະເຢໂຫວາ.”+
18 ຊາມູເອນໄດ້ຂໍພະເຢໂຫວາ ແລ້ວພະເຢໂຫວາກໍເຮັດໃຫ້ມີຟ້າຮ້ອງແລະຝົນຕົກໃນມື້ນັ້ນ. ທຸກຄົນຈຶ່ງຢ້ານພະເຢໂຫວາແລະຊາມູເອນຫຼາຍ. 19 ເຂົາເຈົ້າບອກຊາມູເອນວ່າ: “ຂໍໃຫ້ເຈົ້າອະທິດຖານຫາພະເຢໂຫວາພະເຈົ້າຂອງພວກເຮົາສຳລັບພວກເຮົາແດ່+ ເພາະພວກເຮົາບໍ່ຢາກຕາຍ. ພວກເຮົາເຮັດຜິດມາຫຼາຍແລ້ວ ແລະຍັງມາເຮັດຜິດຊ້ຳອີກເລື່ອງຂໍໃຫ້ມີກະສັດ.”
20 ຊາມູເອນບອກປະຊາຊົນວ່າ: “ບໍ່ຕ້ອງຢ້ານ ກະແມ່ນຢູ່ວ່າພວກເຈົ້າເຮັດສິ່ງທີ່ບໍ່ດີຫຼາຍຢ່າງ. ຂໍພຽງແຕ່ພວກເຈົ້າບໍ່ປະຖິ້ມພະເຢໂຫວາ+ແລະຮັບໃຊ້ພະເຢໂຫວາສຸດຫົວໃຈ.+ 21 ຢ່າປະຖິ້ມເພິ່ນແລະໄປນະມັດສະການພະເຈົ້າປອມ+ທີ່ຊ່ວຍຊີວິດພວກເຈົ້າບໍ່ໄດ້+ ເພາະພວກມັນເປັນພຽງແຕ່ຮູບບູຊາທີ່ບໍ່ມີຄ່າຫຍັງ. 22 ພະເຢໂຫວາຈະບໍ່ຖິ້ມປະຊາຊົນຂອງເພິ່ນ+ ຍ້ອນເຫັນແກ່ຊື່ທີ່ຍິ່ງໃຫຍ່ຂອງເພິ່ນ+ ແລະຍ້ອນພະເຢໂຫວາຕັ້ງໃຈເລືອກພວກເຈົ້າໃຫ້ເປັນປະຊາຊົນຂອງເພິ່ນ.+ 23 ຂ້ອຍຈະບໍ່ເຊົາອະທິດຖານເພື່ອພວກເຈົ້າ ເພາະຖ້າຂ້ອຍເຊົາກໍຈະເປັນການເຮັດຜິດຕໍ່ພະເຢໂຫວາ. ຂ້ອຍຈະສອນພວກເຈົ້າຕໍ່ໆໄປໃຫ້ຮູ້ຈັກໃຊ້ຊີວິດໃນທາງທີ່ດີແລະຖືກຕ້ອງ 24 ໃຫ້ຢ້ານຢຳພະເຢໂຫວາຜູ້ດຽວ+ ແລະຮັບໃຊ້ເພິ່ນຢ່າງສັດຊື່ແລະດ້ວຍສຸດຫົວໃຈ ເພາະເພິ່ນເຮັດສິ່ງທີ່ດີຫຼາຍຢ່າງເພື່ອພວກເຈົ້າ.+ 25 ແຕ່ຖ້າພວກເຈົ້າຍັງຕັ້ງໃຈເຮັດຜິດຢູ່ ທັງພວກເຈົ້າແລະກະສັດຂອງພວກເຈົ້າຈະຖືກທຳລາຍ.”+