ຊາມູເອນສະບັບທີໜຶ່ງ
15 ຕໍ່ມາ ຊາມູເອນເວົ້າກັບຊາອູນວ່າ: “ພະເຢໂຫວາໃຊ້ຂ້ອຍມາແຕ່ງຕັ້ງເຈົ້າໃຫ້ເປັນກະສັດປົກຄອງພວກອິດສະຣາເອນປະຊາຊົນຂອງເພິ່ນ.+ ດັ່ງນັ້ນ ຂໍໃຫ້ເຈົ້າຟັງສິ່ງທີ່ພະເຢໂຫວາບອກ.+ 2 ພະເຢໂຫວາຜູ້ບັນຊາການກອງທັບບອກວ່າ ‘ຕອນທີ່ພວກອິດສະຣາເອນອອກຈາກເອຢິບ ພວກອາມາເລັກໄດ້ກົດຂີ່ຂົ່ມເຫງເຂົາເຈົ້າ. ຕອນນີ້ ເຮົາຈະແກ້ແຄ້ນພວກນັ້ນ.+ 3 ໃຫ້ເຈົ້າໄປຕໍ່ສູ້ພວກອາມາເລັກ+ແລະທຳລາຍເຂົາເຈົ້າ+ພ້ອມກັບທຸກສິ່ງທຸກຢ່າງທີ່ເຂົາເຈົ້າມີ. ຢ່າອີ່ຕົນ ໃຫ້ຂ້າໝົດທຸກຄົນ+ ທັງຜູ້ຊາຍຜູ້ຍິງ ທັງເດັກນ້ອຍແລະແອນ້ອຍ ທັງງົວແລະແກະ ທັງອູດແລະລານຳ.’”+ 4 ຊາອູນເອີ້ນພວກທະຫານມານັບຈຳນວນຢູ່ເຕລາຢິມ. ມີທະຫານ 200.000 ຄົນຈາກຕະກູນຕ່າງໆຂອງອິດສະຣາເອນ ແລະທະຫານ 10.000 ຄົນຈາກຕະກູນຢູດາ.+
5 ຊາອູນບຸກໄປຮອດເມືອງຂອງພວກອາມາເລັກແລະໄປລີ້ຖ້າໂຈມຕີຢູ່ໃກ້ຮ່ອມພູ.* 6 ຊາອູນບອກພວກເກນີວ່າ:+ “ໃຫ້ພວກເຈົ້າແຍກອອກມາຈາກພວກອາມາເລັກເພື່ອພວກເຈົ້າຈະບໍ່ຖືກທຳລາຍພ້ອມກັບເຂົາເຈົ້າ+ ຍ້ອນພວກເຈົ້າໄດ້ສະແດງຄວາມຮັກແລະເຮັດດີຕໍ່ພວກອິດສະຣາເອນ+ຕອນອອກມາຈາກເອຢິບ.” ພວກເກນີຈຶ່ງແຍກອອກມາຈາກພວກອາມາເລັກ. 7 ຈາກນັ້ນ ຊາອູນກັບພວກທະຫານກໍໄປຂ້າພວກອາມາເລັກ+ຕັ້ງແຕ່ຮາວິລາ+ຈົນຮອດຊູເຣ+ເຊິ່ງຢູ່ຕິດກັບເອຢິບ. 8 ເຂົາເຈົ້າໃຊ້ດາບຂ້າທຸກຄົນ+ ແຕ່ຈັບອາກັກ+ກະສັດຂອງອາມາເລັກໄວ້. 9 ຊາອູນກັບພວກທະຫານບໍ່ໄດ້ຂ້າອາກັກ ຝູງແກະທີ່ດີທີ່ສຸດ ຝູງງົວທີ່ດີທີ່ສຸດ ພວກສັດທີ່ຕຸ້ຍພີ ແລະບໍ່ໄດ້ທຳລາຍວັດຖຸສິ່ງຂອງທຸກຢ່າງທີ່ມີຄ່າ.+ ເຂົາເຈົ້າບໍ່ຢາກທຳລາຍສັດແລະວັດຖຸສິ່ງຂອງເຫຼົ່ານີ້ ແຕ່ທຳລາຍທຸກຢ່າງທີ່ບໍ່ຕ້ອງການແລະບໍ່ມີຄ່າ.
10 ແລ້ວພະເຢໂຫວາເວົ້າກັບຊາມູເອນວ່າ: 11 “ເຮົາເສຍໃຈທີ່ເລືອກຊາອູນເປັນກະສັດ. ລາວບໍ່ເຊື່ອຟັງເຮົາແລ້ວແລະບໍ່ໄດ້ເຮັດຕາມທີ່ເຮົາບອກ.”+ ຊາມູເອນທຸກໃຈຫຼາຍ ລາວໄດ້ອະທິດຖານອ້ອນວອນຫາພະເຢໂຫວາໝົດຄືນ.+ 12 ຊາມູເອນຕື່ນແຕ່ເຊົ້າໆແລ້ວໄປຫາຊາອູນ. ມີຄົນບອກຊາມູເອນວ່າ: “ຊາອູນໄປເມືອງກາເມນ+ເພື່ອສ້າງອະນຸສາວະລີໃຫ້ໂຕເອງຢູ່ຫັ້ນ.+ ຈາກນັ້ນ ລາວກໍກັບໄປເມືອງກິນການ.” 13 ເມື່ອຊາມູເອນຊອກຊາອູນເຫັນແລ້ວ ຊາອູນເວົ້າກັບຊາມູເອນວ່າ: “ຂໍໃຫ້ພະເຢໂຫວາອວຍພອນເຈົ້າ. ຂ້ອຍໄດ້ເຮັດທຸກຢ່າງຕາມທີ່ພະເຢໂຫວາບອກແລ້ວ.” 14 ແຕ່ຊາມູເອນຖາມວ່າ: “ຄັນຊັ້ນ ສຽງແກະສຽງງົວທີ່ຂ້ອຍໄດ້ຍິນມາແຕ່ໃສ?”+ 15 ຊາອູນຕອບວ່າ: “ກະເອົາມາຈາກພວກອາມາເລັກຫັ້ນເດ້. ພວກທະຫານໄດ້ຈົ່ງຝູງແກະທີ່ດີທີ່ສຸດແລະຝູງງົວທີ່ດີທີ່ສຸດໄວ້ເພື່ອເຜົາເປັນເຄື່ອງບູຊາໃຫ້ພະເຢໂຫວາພະເຈົ້າຂອງພວກເຮົາ ແຕ່ເຫຼືອນັ້ນພວກເຮົາຂ້າຖິ້ມໝົດ.” 16 ຊາມູເອນຈຶ່ງເວົ້າກັບຊາອູນວ່າ: “ເຊົາເວົ້າ! ຂ້ອຍຊິບອກເຈົ້າວ່າພະເຢໂຫວາເວົ້າຫຍັງກັບຂ້ອຍມື້ຄືນນີ້.”+ ຊາອູນບອກຊາມູເອນວ່າ: “ເວົ້າໃຫ້ຂ້ອຍຟັງແດ່!”
17 ຊາມູເອນບອກວ່າ: “ຕອນທີ່ພະເຢໂຫວາເລືອກເຈົ້າໃຫ້ເປັນກະສັດປົກຄອງຕະກູນຕ່າງໆຂອງອິດສະຣາເອນ+ ເຈົ້າເບິ່ງວ່າໂຕເອງບໍ່ມີຄວາມສຳຄັນຫຍັງແລະເບິ່ງວ່າໂຕເອງຕ່ຳຕ້ອຍ+ແມ່ນບໍ? 18 ພະເຢໂຫວາໄດ້ໃຊ້ເຈົ້າໄປເຮັດວຽກໜຶ່ງແລະສັ່ງວ່າ ‘ໃຫ້ໄປທຳລາຍພວກອາມາເລັກທີ່ຊົ່ວຮ້າຍ.+ ຕໍ່ສູ້ກັບເຂົາເຈົ້າແລະຂ້າເຂົາເຈົ້າຖິ້ມໃຫ້ໝົດ.’+ 19 ແຕ່ເປັນຫຍັງເຈົ້າບໍ່ເຊື່ອຟັງສິ່ງທີ່ພະເຢໂຫວາບອກ? ເຈົ້າຟ້າວແລ່ນໄປເອົາເຄື່ອງຂອງພວກສັດຕູແບບໂລບມາກໂລພາ+ແລະເຮັດສິ່ງທີ່ພະເຢໂຫວາຫ້າມ.”
20 ແຕ່ຊາອູນບອກຊາມູເອນວ່າ: “ຂ້ອຍກໍເຊື່ອຟັງທີ່ພະເຢໂຫວາບອກລະເດ້! ຂ້ອຍໄດ້ເຮັດວຽກຕາມທີ່ພະເຢໂຫວາສັ່ງ ແລະຂ້ອຍຍັງໄດ້ຈັບເອົາອາກັກກະສັດຂອງອາມາເລັກແລະໄດ້ຂ້າພວກອາມາເລັກທັງໝົດ.+ 21 ແຕ່ພວກທະຫານຫັ້ນເດ້ບໍ່ໄດ້ຂ້າໂຕແກະໂຕງົວທັງໝົດ ແຕ່ຈົ່ງໂຕທີ່ດີທີ່ສຸດໄວ້ເພື່ອເປັນເຄື່ອງບູຊາໃຫ້ພະເຢໂຫວາພະເຈົ້າຂອງພວກເຮົາຢູ່ເມືອງກິນການ.”+
22 ຊາມູເອນຈຶ່ງເວົ້າວ່າ: “ພະເຢໂຫວາພໍໃຈເຄື່ອງບູຊາເຜົາ+ຫຼາຍກວ່າການເຊື່ອຟັງພະເຢໂຫວາບໍ? ຟັງເດີ້! ການເຊື່ອຟັງດີກວ່າເຄື່ອງບູຊາ+ແລະການເຊື່ອຟັງດີກວ່ານ້ຳມັນ+ແກະໂຕຜູ້ 23 ເພາະການບໍ່ເຊື່ອຟັງ+ພະເຈົ້າມີຄວາມຜິດຮ້າຍແຮງສ່ຳກັບການຫຼິ້ນຜີ+ ແລະການເຮັດເກີນສິດກໍຮ້າຍແຮງສ່ຳກັບການໃຊ້ຄາຖາອາຄົມແລະການຂາບໄຫວ້ຮູບບູຊາ. ຍ້ອນເຈົ້າບໍ່ເຮັດຕາມທີ່ພະເຢໂຫວາບອກ+ ເພິ່ນຈະປົດເຈົ້າບໍ່ໃຫ້ເປັນກະສັດອີກຕໍ່ໄປ.”+
24 ຊາອູນບອກຊາມູເອນວ່າ: “ຂ້ອຍເຮັດຜິດແລ້ວ. ຂ້ອຍບໍ່ເຊື່ອຟັງຄຳສັ່ງຂອງພະເຢໂຫວາແລະບໍ່ເຊື່ອຟັງເຈົ້າ. ຍ້ອນຢ້ານປະຊາຊົນ ຂ້ອຍຈຶ່ງເຮັດຕາມທີ່ເຂົາເຈົ້າບອກ. 25 ຂໍຍົກໂທດໃຫ້ຂ້ອຍແດ່ແລະກັບໄປນຳຂ້ອຍ ຂ້ອຍຈະໄດ້ນະມັດສະການພະເຢໂຫວາ.”+ 26 ແຕ່ຊາມູເອນບອກຊາອູນວ່າ: “ຂ້ອຍຈະບໍ່ໄປນຳເຈົ້າ ເພາະເຈົ້າບໍ່ເຊື່ອຟັງຄຳສັ່ງຂອງພະເຢໂຫວາ. ພະເຢໂຫວາໄດ້ປົດເຈົ້າບໍ່ໃຫ້ເປັນກະສັດຂອງອິດສະຣາເອນແລ້ວ.”+ 27 ເມື່ອຊາມູເອນກຳລັງປິ່ນໜ້າຊິຍ່າງໄປ ຊາອູນກໍດຶງຍອຍເສື້ອແຂນກິ້ນຂອງຊາມູເອນໄວ້ ແລ້ວຍອຍເສື້ອນັ້ນກໍຂາດ. 28 ຊາມູເອນຈຶ່ງເວົ້າວ່າ: “ມື້ນີ້ພະເຢໂຫວາຈະເອົາຕຳແໜ່ງກະສັດຂອງອິດສະຣາເອນໄປຈາກເຈົ້າ ແລະເພິ່ນຈະເອົາໄປໃຫ້ອີກຜູ້ໜຶ່ງທີ່ດີກວ່າເຈົ້າ.+ 29 ຜູ້ທີ່ມີກຽດສູງສຸດຂອງອິດສະຣາເອນ*+ຈະເຮັດຕາມທີ່ເພິ່ນເວົ້າແລະຈະບໍ່ປ່ຽນໃຈ.*+ ເພິ່ນບໍ່ຄືກັບມະນຸດທີ່ມັກປ່ຽນໃຈ.”+
30 ຊາອູນຈຶ່ງເວົ້າວ່າ: “ຂ້ອຍເຮັດຜິດແລ້ວ ແຕ່ຂໍໃຫ້ເຈົ້າໃຫ້ກຽດຂ້ອຍຕໍ່ໜ້າພວກຜູ້ນຳຂອງປະຊາຊົນແລະຕໍ່ໜ້າພວກອິດສະຣາເອນ. ຂໍໃຫ້ກັບໄປນຳຂ້ອຍ ຂ້ອຍຈະໄດ້ນະມັດສະການພະເຢໂຫວາພະເຈົ້າຂອງພວກເຮົາ.”+ 31 ຊາມູເອນຈຶ່ງກັບໄປນຳຊາອູນ ແລະຊາອູນກໍນະມັດສະການພະເຢໂຫວາ. 32 ຊາມູເອນບອກວ່າ: “ພາອາກັກກະສັດອາມາເລັກມາຫາຂ້ອຍ.” ອາກັກເຂົ້າໄປຫາຊາມູເອນແບບສັ່ນໆເຊັນໆ* ແຕ່ກໍຄິດໃນໃຈວ່າ: “ຂ້ອຍລອດຕາຍແລ້ວ.” 33 ຊາມູເອນເວົ້າວ່າ: “ເຈົ້າເຮັດໃຫ້ຜູ້ຍິງຫຼາຍຄົນຮ້ອງໄຫ້ເສຍໃຈຍ້ອນເອົາດາບໄປຂ້າລູກຂອງເຂົາເຈົ້າ. ມື້ນີ້ແມ່ຂອງເຈົ້າຈະຮ້ອງໄຫ້ເສຍໃຈຫຼາຍກວ່າຜູ້ຍິງເຫຼົ່ານັ້ນອີກ.” ແລ້ວຊາມູເອນກໍຟັນອາກັກເປັນຕ່ອນໆຕໍ່ໜ້າພະເຢໂຫວາຢູ່ເມືອງກິນການ.+
34 ຈາກນັ້ນ ຊາມູເອນກໍໄປເມືອງຣາມາ ແລະຊາອູນກໍກັບໄປເຮືອນຂອງລາວຢູ່ເມືອງກີເບອາ. 35 ຊາມູເອນເສຍໃຈຫຼາຍເລື່ອງຊາອູນ.+ ລາວກັບຊາອູນບໍ່ໄດ້ເຈິກັນອີກເລີຍ.* ພະເຢໂຫວາກໍເສຍໃຈທີ່ໄດ້ແຕ່ງຕັ້ງຊາອູນໃຫ້ເປັນກະສັດປົກຄອງອິດສະຣາເອນ.+