ກະສັດສະບັບທີໜຶ່ງ
11 ນອກຈາກລູກສາວຂອງກະສັດເອຢິບ*ແລ້ວ+ ກະສັດໂຊໂລໂມນຍັງໄດ້ຮັກຜູ້ຍິງຕ່າງຊາດອີກຫຼາຍຄົນ+ ເຊັ່ນ: ຄົນໂມອາບ+ ຄົນອຳໂມນ+ ຄົນເອໂດມ ຄົນຊີໂດນ+ ແລະຄົນເຮດ.+ 2 ຜູ້ຍິງເຫຼົ່ານີ້ມາຈາກຊາດທີ່ພະເຢໂຫວາເຄີຍບອກພວກອິດສະຣາເອນວ່າ: “ພວກເຈົ້າຢ່າແຕ່ງດອງກັບຄົນຊາດເຫຼົ່ານີ້ ແລະຢ່າໃຫ້ຄົນຊາດເຫຼົ່ານີ້ມາແຕ່ງດອງກັບພວກເຈົ້າ ຍ້ອນວ່າເຂົາເຈົ້າຈະເຮັດໃຫ້ພວກເຈົ້າໄປນະມັດສະການພະເຈົ້າຂອງເຂົາເຈົ້າແນ່ນອນ.”*+ ແຕ່ໂຊໂລໂມນທັງຮັກທັງຫຼົງຜູ້ຍິງເຫຼົ່ານັ້ນ. 3 ລາວມີເມຍ 700 ຄົນທີ່ເປັນເຈົ້າຍິງ ແລະມີເມຍນ້ອຍ*ອີກ 300 ຄົນ. ຜູ້ຍິງເຫຼົ່ານີ້ຄ່ອຍໆເຮັດໃຫ້ໃຈຂອງໂຊໂລໂມນເອນອຽງໄປ.* 4 ຕອນທີ່ໂຊໂລໂມນເຖົ້າແລ້ວ+ ພວກເມຍຂອງລາວໄດ້ເຮັດໃຫ້ລາວໄປນະມັດສະການພະເຈົ້າອື່ນ*+ ແລະລາວບໍ່ໄດ້ນະມັດສະການພະເຢໂຫວາພະເຈົ້າຂອງລາວດ້ວຍສຸດຫົວໃຈ*ຄືກັບດາວິດພໍ່ຂອງລາວ. 5 ໂຊໂລໂມນນະມັດສະການພະອັດຊະໂຕເຣດ*+ທີ່ເປັນພະເຈົ້າຂອງພວກຊີໂດນ ແລະລາວຍັງນະມັດສະການພະມີເລກອມ+ທີ່ເປັນຕາຂີ້ດຽດເຊິ່ງເປັນພະເຈົ້າຂອງພວກອຳໂມນ. 6 ໂຊໂລໂມນເຮັດສິ່ງທີ່ພະເຢໂຫວາເບິ່ງວ່າຊົ່ວ ແລະລາວບໍ່ໄດ້ເຊື່ອຟັງພະເຢໂຫວາສຸດຫົວໃຈຄືກັບດາວິດພໍ່ຂອງລາວ.+
7 ໂຊໂລໂມນໄດ້ສ້າງບ່ອນນະມັດສະການ+ເທິງພູທີ່ຢູ່ຕໍ່ໜ້າເມືອງເຢຣູຊາເລັມໃຫ້ພະເຄມົດທີ່ເປັນຕາຂີ້ດຽດເຊິ່ງເປັນພະເຈົ້າຂອງພວກໂມອາບ ແລະພະໂມເລັກ+ທີ່ເປັນພະເຈົ້າຂອງພວກອຳໂມນ.+ 8 ລາວຍັງໄດ້ເຮັດແທ່ນບູຊາໃຫ້ພວກເມຍຕ່າງຊາດທຸກຄົນ ເພື່ອໃຫ້ເຂົາເຈົ້າເຜົາເຄື່ອງບູຊາແລະໃຫ້ຄວັນນັ້ນລອຍຂຶ້ນໄປຫາພະເຈົ້າຂອງເຂົາເຈົ້າ.
9 ພະເຢໂຫວາໃຈຮ້າຍໃຫ້ໂຊໂລໂມນຫຼາຍ ຍ້ອນໃຈລາວອອກຫ່າງຈາກພະເຢໂຫວາພະເຈົ້າຂອງອິດສະຣາເອນ+ຜູ້ທີ່ມາຫາລາວໂດຍທາງຄວາມຝັນຕັ້ງ 2 ເທື່ອ+ 10 ແລະເຕືອນລາວວ່າຢ່ານະມັດສະການພະເຈົ້າອື່ນ+ ແຕ່ລາວບໍ່ເຊື່ອຟັງຄຳສັ່ງຂອງພະເຢໂຫວາ. 11 ພະເຢໂຫວາຈຶ່ງເວົ້າກັບໂຊໂລໂມນວ່າ: “ຍ້ອນເຈົ້າເຮັດແບບນີ້ແລະບໍ່ເຮັດຕາມສັນຍາທີ່ເຈົ້າເວົ້າກັບເຮົາ ແລະບໍ່ເຮັດຕາມສິ່ງທີ່ເຮົາສັ່ງເຈົ້າ ເຮົາຈະຍຶດເອົາປະເທດນີ້ໄປຈາກເຈົ້າ ແລ້ວເຮົາຈະເອົາໃຫ້ຜູ້ໜຶ່ງທີ່ເປັນຄົນຂອງເຈົ້າ.+ 12 ແຕ່ຍ້ອນເຫັນແກ່ດາວິດພໍ່ຂອງເຈົ້າ ເຮົາຈະບໍ່ເຮັດແບບນັ້ນຕອນທີ່ເຈົ້າຍັງມີຊີວິດຢູ່ ເຮົາຈະຍຶດເອົາຕອນທີ່ລູກຊາຍເຈົ້າປົກຄອງ.+ 13 ເຮົາຈະບໍ່ຍຶດເອົາທັງໝົດ+ ເຮົາຈະເອົາຕະກູນໜຶ່ງໃຫ້ເຈົ້າ+ຍ້ອນເຫັນແກ່ດາວິດຜູ້ຮັບໃຊ້ຂອງເຮົາແລະເຫັນແກ່ເມືອງເຢຣູຊາເລັມທີ່ເຮົາໄດ້ເລືອກໄວ້.”+
14 ພະເຢໂຫວາໄດ້ໃຫ້ຄົນເອໂດມຜູ້ໜຶ່ງທີ່ຊື່ຮາດັດມາຕໍ່ຕ້ານໂຊໂລໂມນ.+ ລາວເປັນລູກຫຼານຂອງກະສັດເອໂດມ.+ 15 ຕອນທີ່ດາວິດຕໍ່ສູ້ຊະນະພວກເອໂດມ+ ໂຢອາບທີ່ເປັນຫົວໜ້າກອງທັບໄດ້ຂຶ້ນໄປຝັງສົບຄົນທີ່ຖືກຂ້າ ແລະລາວພະຍາຍາມຂ້າຜູ້ຊາຍທຸກຄົນໃນເອໂດມ. 16 (ກອງທັບຂອງອິດສະຣາເອນທັງໝົດໄດ້ຢູ່ເອໂດມ 6 ເດືອນເພື່ອຂ້າຜູ້ຊາຍທຸກຄົນໃຫ້ໝົດ.) 17 ແຕ່ຮາດັດໜີໄປເອຢິບກັບຄົນເອໂດມກຸ່ມໜຶ່ງທີ່ເປັນຄົນຂອງພໍ່ລາວ. ຕອນນັ້ນຮາດັດຍັງນ້ອຍຢູ່. 18 ເຂົາເຈົ້າອອກຈາກມີດີອານໄປບ່ອນກັນດານປາຣານ ແລະພາຄົນຈາກປາຣານ+ໄປເອຢິບນຳ. ກະສັດເອຢິບໄດ້ເອົາດິນເອົາເຮືອນໃຫ້ຮາດັດ ແລະໃຫ້ລາວມີຂອງຢູ່ຂອງກິນຕະຫຼອດ. 19 ກະສັດເອຢິບຮັກຮາດັດຫຼາຍຈົນຍົກນ້ອງສາວຂອງລາຊີນີຕາເປເນັດໃຫ້ເປັນເມຍຂອງລາວ. ຕາເປເນັດເປັນເມຍຂອງກະສັດເອຢິບ. 20 ຕໍ່ມາ ນ້ອງສາວຂອງຕາເປເນັດກໍໄດ້ລູກຊາຍຜູ້ໜຶ່ງກັບຮາດັດຊື່ເກນູບັດ. ຕາເປເນັດເອົາລາວໄປລ້ຽງໃນວັງຂອງກະສັດເອຢິບ ເກນູບັດຈຶ່ງໃຫຍ່ຂຶ້ນມາພ້ອມກັບພວກລູກຊາຍຂອງກະສັດເອຢິບ.
21 ຕອນທີ່ຢູ່ເອຢິບ ຮາດັດໄດ້ຍິນຂ່າວວ່າດາວິດແລະໂຢອາບຫົວໜ້າກອງທັບຕາຍແລ້ວ+ ລາວຈຶ່ງເວົ້າກັບກະສັດເອຢິບວ່າ: “ຂ້ອຍຂໍກັບເມືອບ້ານເກີດໄດ້ບໍ?” 22 ກະສັດເອຢິບຈຶ່ງຖາມລາວວ່າ: “ເຈົ້າຊິກັບເມືອເຮັດຫຍັງ? ສິ່ງທີ່ເຈົ້າຢາກໄດ້ຢູ່ນີ້ບໍ່ມີບໍ?” ຮາດັດຕອບວ່າ: “ຢູ່ນີ້ມີໝົດທຸກຢ່າງ ແຕ່ຂ້ອຍຢາກກັບເມືອບ້ານເກີດ.”
23 ພະເຈົ້າໄດ້ໃຫ້ອີກຜູ້ໜຶ່ງມາຕໍ່ຕ້ານໂຊໂລໂມນ.+ ລາວຊື່ເຣໂຊນເປັນລູກຊາຍຂອງເອລີອາດາ. ເຣໂຊນໜີມາຈາກຮາດາເດເຊ+ທີ່ເປັນກະສັດຂອງໂຊບາເຊິ່ງເປັນເຈົ້ານາຍຂອງລາວ. 24 ຫຼັງຈາກທີ່ດາວິດຕໍ່ສູ້ຊະນະ*ກອງທັບຂອງພວກໂຊບາ+ ເຣໂຊນໄດ້ລວບລວມຄົນທີ່ລອດຊີວິດຈາກກອງທັບນັ້ນແລະຕັ້ງໂຕເອງເປັນຫົວໜ້າກຸ່ມໂຈນ ແລ້ວເຂົາເຈົ້າກໍໄປຕັ້ງຖິ່ນຖານຢູ່ເມືອງດາມາເຊ+ແລະປົກຄອງເມືອງນັ້ນ. 25 ເຣໂຊນຕໍ່ຕ້ານອິດສະຣາເອນຕອນທີ່ໂຊໂລໂມນປົກຄອງ. ລາວສ້າງບັນຫາໃຫ້ອິດສະຣາເອນຄືກັບທີ່ຮາດັດໄດ້ເຮັດ. ຕະຫຼອດໄລຍະທີ່ເຣໂຊນປົກຄອງຊີເຣຍ ລາວຊັງພວກອິດສະຣາເອນຫຼາຍ.
26 ເຢໂຣໂບອາມ+ເປັນລູກຊາຍຂອງເນບັດຄົນເອຟຣາຢິມຈາກເຊເຣດາ. ແມ່ຂອງລາວເປັນແມ່ໝ້າຍຊື່ເຊຣູອາ. ເຢໂຣໂບອາມເປັນລູກນ້ອງຄົນໜຶ່ງຂອງກະສັດໂຊໂລໂມນ+ ແລະລາວກໍເປັນອີກຜູ້ໜຶ່ງທີ່ຕໍ່ຕ້ານໂຊໂລໂມນຄືກັນ.+ 27 ລາວຕໍ່ຕ້ານກະສັດໂຊໂລໂມນກໍຍ້ອນວ່າໂຊໂລໂມນໄດ້ສ້າງໂນນ*+ແລະອັດປ່ອງກຳແພງເມືອງຂອງດາວິດ.+ 28 ເຢໂຣໂບອາມເປັນຄົນທີ່ເກັ່ງແລະແຂງແຮງ. ເມື່ອໂຊໂລໂມນເຫັນວ່າລາວເປັນຄົນໜຸ່ມທີ່ດຸໝັ່ນ ໂຊໂລໂມນຈຶ່ງຕັ້ງລາວໃຫ້ເບິ່ງແຍງ+ຄົນເຮັດວຽກທັງໝົດທີ່ຢູ່ໃນຕະກູນຂອງໂຢເຊັບ.* 29 ຕອນທີ່ເຢໂຣໂບອາມອອກຈາກເມືອງເຢຣູຊາເລັມ ຜູ້ພະຍາກອນອາຮີຢາ+ຄົນຊີໂລໄດ້ໄປຫາລາວຢູ່ຫົນທາງ ແລະໃນຫົນທາງນັ້ນມີແຕ່ເຂົາເຈົ້າ 2 ຄົນ. 30 ອາຮີຢານຸ່ງເສື້ອໃໝ່ໂຕໜຶ່ງ ແລະລາວຈີກເສື້ອໂຕນັ້ນເປັນ 12 ຕ່ອນ 31 ແລ້ວລາວກໍບອກເຢໂຣໂບອາມວ່າ:
“ໃຫ້ເຈົ້າເອົາໄປ 10 ຕ່ອນ ເພາະພະເຢໂຫວາພະເຈົ້າຂອງອິດສະຣາເອນບອກວ່າ ‘ເຮົາຈະຍຶດເອົາອິດສະຣາເອນຈາກໂຊໂລໂມນ ແລະຈະເອົາ 10 ຕະກູນໃຫ້ເຈົ້າ.+ 32 ແຕ່ເຮົາຈະຈົ່ງຕະກູນໜຶ່ງໄວ້ໃຫ້ລາວ+ຍ້ອນເຫັນແກ່ດາວິດຜູ້ຮັບໃຊ້ຂອງເຮົາ+ແລະເຫັນແກ່ເຢຣູຊາເລັມເມືອງທີ່ເຮົາເລືອກຈາກທຸກເມືອງໃນຕະກູນຕ່າງໆຂອງອິດສະຣາເອນ.+ 33 ເຮົາຈະເຮັດແບບນີ້ກໍຍ້ອນປະຊາຊົນຂອງເຮົາປະຖິ້ມເຮົາ+ແລະໄປກົ້ມກາບພະອັດຊະໂຕເຣດທີ່ເປັນພະເຈົ້າຂອງພວກຊີໂດນ ກົ້ມກາບພະເຄມົດທີ່ເປັນພະເຈົ້າຂອງພວກໂມອາບ ແລະກົ້ມກາບພະມີເລກອມທີ່ເປັນພະເຈົ້າຂອງພວກອຳໂມນ. ເຂົາເຈົ້າບໍ່ໄດ້ໃຊ້ຊີວິດຕາມແນວທາງຂອງເຮົາ ບໍ່ໄດ້ເຮັດສິ່ງທີ່ເຮົາເບິ່ງວ່າຖືກຕ້ອງ ບໍ່ໄດ້ເຊື່ອຟັງຄຳສັ່ງຂອງເຮົາ ແລະບໍ່ເຮັດຕາມການຕັດສິນຂອງເຮົາຄືກັບດາວິດພໍ່ຂອງໂຊໂລໂມນໄດ້ເຮັດ. 34 ແຕ່ຍ້ອນເຫັນແກ່ດາວິດຜູ້ຮັບໃຊ້ຂອງເຮົາທີ່ເຮົາໄດ້ເລືອກໄວ້+ ເຊິ່ງເຊື່ອຟັງຄຳສັ່ງແລະກົດໝາຍຂອງເຮົາ ເຮົາຈະບໍ່ຍຶດເອົາປະເທດທັງໝົດໄປຈາກໂຊໂລໂມນ ແລະເຮົາຈະໃຫ້ລາວປົກຄອງປະເທດນີ້ຕະຫຼອດຊີວິດຂອງລາວ. 35 ແຕ່ຕອນທີ່ລູກຊາຍຂອງລາວປົກຄອງ ເຮົາຈະເອົາ 10 ຕະກູນໃຫ້ເຈົ້າ.+ 36 ເຮົາຈະເອົາຕະກູນໜຶ່ງໃຫ້ລູກຊາຍຂອງລາວເພື່ອດາວິດຜູ້ຮັບໃຊ້ຂອງເຮົາຈະມີລູກຫຼານປົກຄອງຕໍ່ໆໄປ*ໃນເມືອງເຢຣູຊາເລັມ+ທີ່ເຮົາໄດ້ເລືອກໄວ້ສຳລັບຊື່ຂອງເຮົາ. 37 ເຮົາຈະເລືອກເຈົ້າແລະໃຫ້ເຈົ້າປົກຄອງທຸກສິ່ງທີ່ເຈົ້າຕ້ອງການ ແລະເຈົ້າຈະເປັນກະສັດປົກຄອງອິດສະຣາເອນ. 38 ຖ້າເຈົ້າເຊື່ອຟັງຄຳສັ່ງທຸກຢ່າງທີ່ເຮົາສັ່ງເຈົ້າ ໃຊ້ຊີວິດຕາມແນວທາງຂອງເຮົາ ເຮັດສິ່ງທີ່ເຮົາເບິ່ງວ່າຖືກຕ້ອງ ເຊື່ອຟັງຄຳສັ່ງແລະກົດໝາຍຂອງເຮົາຄືກັບດາວິດຜູ້ຮັບໃຊ້ຂອງເຮົາໄດ້ເຮັດ+ ເຮົາກໍຈະຢູ່ກັບເຈົ້າຄືກັນ. ເຮົາຈະໃຫ້ລູກຫຼານຂອງເຈົ້າປົກຄອງຕະຫຼອດໄປຄືກັບລູກຫຼານຂອງດາວິດ+ ແລະເຮົາຈະໃຫ້ເຈົ້າປົກຄອງອິດສະຣາເອນ. 39 ເຮົາຈະເຮັດໃຫ້ລູກຫຼານຂອງດາວິດເສຍກຽດຍ້ອນເລື່ອງນີ້+ ແຕ່ຈະບໍ່ເປັນແບບນັ້ນຕະຫຼອດໄປ.’”+
40 ດັ່ງນັ້ນ ໂຊໂລໂມນຈຶ່ງພະຍາຍາມຂ້າເຢໂຣໂບອາມ ແຕ່ເຢໂຣໂບອາມໜີໄປຫາຊີຊາກ+ກະສັດຂອງເອຢິບ+ ແລະລາວກໍຢູ່ເອຢິບຈົນໂຊໂລໂມນຕາຍ.
41 ເລື່ອງຕ່າງໆຂອງໂຊໂລໂມນ ທຸກສິ່ງທີ່ລາວເຮັດ ແລະເລື່ອງກ່ຽວກັບສະຕິປັນຍາຂອງລາວກໍຂຽນໄວ້ໃນປຶ້ມປະຫວັດຂອງໂຊໂລໂມນ.+ 42 ໂຊໂລໂມນເປັນກະສັດປົກຄອງອິດສະຣາເອນຢູ່ເມືອງເຢຣູຊາເລັມ 40 ປີ. 43 ເມື່ອໂຊໂລໂມນຕາຍ ເຂົາເຈົ້າຝັງລາວໄວ້ຢູ່ເມືອງຂອງດາວິດພໍ່ຂອງລາວ. ຈາກນັ້ນ ເຣໂຮໂບອາມ+ລູກຊາຍຂອງລາວກໍເປັນກະສັດແທນ.