ເອເຊກຽນ
9 ຂ້ອຍໄດ້ຍິນເພິ່ນຮ້ອງດັງໆວ່າ: “ໃຫ້ເອີ້ນຄົນທີ່ຈະລົງໂທດເມືອງນີ້ມານີ້ ແລະໃຫ້ຄົນຖືອາວຸດທີ່ຈະໃຊ້ທຳລາຍມານຳ.”
2 ຂ້ອຍເຫັນຜູ້ຊາຍ 6 ຄົນມາຈາກທາງປະຕູທາງເທິງ+ທີ່ຢູ່ທິດເໜືອ. ເຂົາເຈົ້າແຕ່ລະຄົນຖືອາວຸດທີ່ຈະໃຊ້ທຳລາຍມານຳ. ມີຜູ້ຊາຍຄົນໜຶ່ງໃສ່ເຄື່ອງນຸ່ງທີ່ເປັນຜ້າລີນິນຢູ່ນຳເຂົາເຈົ້າ. ລາວມີກັບສໍ*ຂອງເລຂາເໜັບຢູ່ແອວ. ເຂົາເຈົ້າໄປຢືນຢູ່ຂ້າງແທ່ນບູຊາທອງແດງ.+
3 ຈາກນັ້ນ ແສງລັດສະໝີຂອງພະເຈົ້າຂອງອິດສະຣາເອນ+ທີ່ເຄີຍຢູ່ນຳເຄຣູບກໍຍ້າຍມາຢູ່ປະຕູທາງເຂົ້າວິຫານ+ ແລະເພິ່ນໄດ້ເວົ້າກັບຜູ້ຊາຍທີ່ນຸ່ງເຄື່ອງທີ່ເປັນຜ້າລີນິນທີ່ມີກັບສໍຂອງເລຂາເໜັບຢູ່ແອວ. 4 ພະເຢໂຫວາບອກລາວວ່າ: “ໃຫ້ເຈົ້າໄປທົ່ວເມືອງເຢຣູຊາເລັມ ແລະໝາຍໜ້າຜາກຄົນທີ່ທຸກໃຈແລະເສຍໃຈ+ ຍ້ອນສິ່ງທີ່ເປັນຕາຂີ້ດຽດທຸກຢ່າງທີ່ເຮັດຢູ່ໃນເມືອງນີ້.”+
5 ຂ້ອຍໄດ້ຍິນເພິ່ນບອກ 6 ຄົນນັ້ນວ່າ: “ໃຫ້ພວກເຈົ້ານຳລາວໄປທົ່ວເມືອງແລະຂ້າຄົນໃນເມືອງນີ້. ຢ່າອີ່ຕົນແລະຢ່າສົນໃຈເຂົາເຈົ້າ.+ 6 ໃຫ້ຂ້າທຸກຄົນບໍ່ວ່າຈະເປັນຜູ້ເຖົ້າ ຄົນໜຸ່ມ ຜູ້ສາວບໍລິສຸດ ເດັກນ້ອຍ ຫຼືຜູ້ຍິງ+ ແຕ່ຢ່າຂ້າຄົນທີ່ມີເຄື່ອງໝາຍຢູ່ໜ້າຜາກ.+ ໃຫ້ພວກເຈົ້າເລີ່ມຈາກວິຫານຂອງເຮົາ.”+ ເຂົາເຈົ້າຈຶ່ງເລີ່ມໂດຍຂ້າພວກຜູ້ນຳທີ່ຢູ່ຕໍ່ໜ້າວິຫານ.+ 7 ຈາກນັ້ນ ເພິ່ນບອກເຂົາເຈົ້າວ່າ: “ໃຫ້ພວກເຈົ້າໄປເຮັດໃຫ້ວິຫານບໍ່ສະອາດ ແລະເຮັດໃຫ້ເດີ່ນຂອງວິຫານເຕັມແຕ່ສົບຄົນຕາຍ.”+ ເຂົາເຈົ້າຈຶ່ງອອກໄປຂ້າທຸກຄົນຢູ່ໃນເມືອງນັ້ນ.
8 ຕອນທີ່ເຂົາເຈົ້າກຳລັງຂ້າຄົນໃນເມືອງນັ້ນ ມີແຕ່ຂ້ອຍຜູ້ດຽວທີ່ບໍ່ຖືກຂ້າ. ຂ້ອຍຈຶ່ງໝູບໜ້າລົງພື້ນແລະຮ້ອງວ່າ: “ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເອີ້ຍ! ຕອນທີ່ພະອົງໃຈຮ້າຍແຮງໃຫ້ເມືອງເຢຣູຊາເລັມ ພະອົງຈະຂ້າພວກອິດສະຣາເອນທີ່ຍັງເຫຼືອຈົນໝົດເລີຍບໍ?”+
9 ແລ້ວເພິ່ນກໍເວົ້າກັບຂ້ອຍວ່າ: “ພວກອິດສະຣາເອນກັບພວກຢູດາເຮັດຊົ່ວຫຼາຍແທ້ໆ.+ ແຜ່ນດິນເຕັມແຕ່ເລືອດຂອງຄົນທີ່ຖືກຂ້າ+ແລະເມືອງນີ້ກໍມີແຕ່ການສໍ້ໂກງ.+ ເຂົາເຈົ້າເວົ້າວ່າ ‘ພະເຢໂຫວາປະຖິ້ມແຜ່ນດິນນີ້ແລ້ວ. ພະເຢໂຫວາບໍ່ເຫັນຫຍັງດອກ.’+ 10 ແຕ່ເຮົາຈະບໍ່ອີ່ຕົນແລະບໍ່ສົນໃຈເຂົາເຈົ້າ.+ ເຮົາຈະໃຫ້ເຂົາເຈົ້າໄດ້ຮັບຜົນຈາກການກະທຳຂອງໂຕເອງ.”
11 ຈາກນັ້ນ ຂ້ອຍກໍເຫັນຜູ້ຊາຍທີ່ນຸ່ງເຄື່ອງທີ່ເປັນຜ້າລີນິນແລະມີກັບສໍເໜັບຢູ່ແອວ. ລາວກັບມາແລະເວົ້າວ່າ: “ຂ້ອຍໄດ້ເຮັດຕາມທີ່ພະອົງສັ່ງແລ້ວ.”