ປະຖົມມະການ

6 ຕໍ່ມາ ມະນຸດຢູ່​ເທິງ​ໂລກ​ມີ​ຈຳນວນ​ຫຼາຍ​ຂຶ້ນ ແລະ​ເຂົາເຈົ້າ​ກໍ​ມີ​ລູກ​ສາວ​ເພີ່ມ​ຂຶ້ນ. 2 ພວກທູດ​ສະຫວັນ*+ເຫັນ​ວ່າ​ລູກ​ສາວ​ຂອງ​ມະນຸດ​ງາມ​ຫຼາຍ ເຂົາເຈົ້າ​ເລີຍ​ພາ​ກັນ​ເລືອກ​ວ່າ​ຈະ​ເອົາ​ຜູ້​ໃດ​ມາ​ເປັນ​ເມຍ. 3 ພະ​ເຢໂຫວາ​ຈຶ່ງ​ເວົ້າ​ວ່າ: “ເຮົາ​ຈະ​ບໍ່​ປ່ອຍ​ໃຫ້​ມະນຸດ​ເຮັດ​ແບບ​ນີ້​ຕະຫຼອດ​ໄປ+ ເພາະ​ເຂົາເຈົ້າເປັນ​ຄົນ​ບາບ. ດັ່ງນັ້ນ ເຂົາເຈົ້າ​ຈະ​ມີ​ເວລາ​ພຽງ​ແຕ່ 120 ປີ​.”+

4 ຕອນ​ນັ້ນ​ຢູ່​ເທິງ​ໂລກ​ມີ​ພວກ​ຄົນ​ຮ່າງ​ຍັກ.* ໃນ​ໄລຍະ​ນັ້ນ​ພວກ​ທູດ​ສະຫວັນຍັງ​ນອນ​ນຳ​ລູກ​ສາວ​ມະນຸດ​ຢູ່ ແລະ​ເຂົາເຈົ້າ​ກໍ​ມີ​ລູກ​ຊາຍ​ນຳ​ກັນ. ພວກ​ລູກ​ຊາຍ​ຂອງ​ເຂົາເຈົ້າ​ແຂງແຮງ​ຫຼາຍ​ແລະເປັນ​ທີ່​ຮູ້ຈັກ​ດີ​ຂອງ​ຜູ້​ຄົນ​ໃນ​ສະໄໝ​ບູຮານ.

5 ພະ​ເຢໂຫວາ​ເຫັນ​ວ່າ​ມະນຸດ​ຢູ່​ເທິງ​ໂລກ​ຊົ່ວ​ຫຼາຍ ແລະ​ໃນ​ໃຈ​ເຂົາເຈົ້າ​ຄິດ​ແຕ່​ແນວ​ຊົ່ວໆທຸກ​ເວລາ.+ 6 ພະ​ເຢໂຫວາຮູ້ສຶກເສຍໃຈ​ທີ່​ໄດ້​ສ້າງ​ມະນຸດ​ຂຶ້ນ​ມາ​ເທິງ​ໂລກ. ເພິ່ນ​ເຈັບ​ປວດໃຈຫຼາຍ.+ 7 ພະ​ເຢໂຫວາ​ຈຶ່ງ​ເວົ້າ​ວ່າ: “ເຮົາ​ຈະ​ທຳລາຍ​ມະນຸດ​ທີ່​ເຮົາ​ສ້າງ​ໃຫ້​ໝົດ​ໄປ​ຈາກ​ແຜ່ນດິນ. ແລ້ວ​ເຮົາ​ຈະ​ທຳລາຍ​ສັດ​ບ້ານ ສັດ​ເລືອຄານ ແລະ​ສັດ​ທີ່​ບິນ​ໄດ້​ຢູ່​ເທິງ​ຟ້າ​ນຳ ຍ້ອນ​ເຮົາ​ເສຍໃຈ​ຫຼາຍ​ທີ່​ໄດ້​ສ້າງ​ສິ່ງ​ເຫຼົ່າ​ນີ້.” 8 ແຕ່​ພະ​ເຢໂຫວາ​ເຫັນ​ວ່າ​ໂນອາ​ເປັນ​ຄົນ​ດີ.

9 ນີ້​ແມ່ນ​ປະຫວັດ​ຂອງ​ໂນອາ.

ໂນອາ​ເປັນ​ຄົນ​ດີ​ຫຼາຍ.+ ເຖິງ​ວ່າ​ຜູ້​ຄົນ​ທີ່​ຢູ່​ອ້ອມ​ຂ້າງ​ລາວ​ເປັນ​ຄົນ​ບໍ່​ດີ ແຕ່​ລາວ​ກໍ​ເຮັດ​ດີ​ຕະຫຼອດ. ໂນອາ​ເຮັດ​ໃຫ້​ພະເຈົ້າ​ພໍ​ໃຈ*ຢູ່​ສະເໝີ.+ 10 ໂນອາ​ມີ​ລູກ​ຊາຍ 3 ຄົນ​ຊື່​ວ່າ​ເຊມ ຮາມ ແລະ​ຢາເຟດ.+ 11 ພະເຈົ້າ​ເຫັນ​ວ່າ​ໂລກ​ຖືກ​ທຳລາຍ ແລະ​ມີ​ແຕ່​ຄວາມ​ຮຸນແຮງ. 12 ເມື່ອ​ແນມ​ລົງ​ມາ​ເທິງ​ໂລກ ເພິ່ນ​ເຫັນ​ຜູ້​ຄົນ​ເຮັດ​ແຕ່​ສິ່ງຊົ່ວ​ໆ​.+

13 ພະເຈົ້າ​ກໍ​ເລີຍ​ເວົ້າ​ກັບ​ໂນອາ​ວ່າ: “ເຮົາ​ໄດ້​ຕັດສິນ​ໃຈ​ແລ້ວ​ວ່າ​ຊິ​ທຳລາຍ​ສິ່ງ​ທີ່​ມີ​ຊີວິດ​ທັງ​ໝົດ ເພາະ​ມະນຸດ​ໃຊ້​ແຕ່​ຄວາມ​ຮຸນແຮງ. ເຮົາ​ຈະ​ທຳລາຍ​ມະນຸດ​ທີ່​ເຮັດ​ຊົ່ວ​ທັງ​ໝົດ​ແລະ​ທຸກສິ່ງທີ່​ຢູ່​ໃນ​ໂລກ​ນີ້.+ 14 ໃຫ້​ເຈົ້າເຮັດເຮືອ*ດ້ວຍໄມ້​ຢ່າງ​ດີ+ແລະ​ຂັ້ນ​ເປັນ​ຫ້ອງ​ເປັນ​ຫ້ອງ. ໃຫ້​ເອົາ​ຢາງໝາກຕອຍ​ຈາກ​ທຳມະຊາດ+​ທາ​ທັງ​ທາງ​ໃນ​ແລະ​ທາງ​ນອກ​ເຮືອ. 15 ໃຫ້​ເຈົ້າ​ສ້າງ​ເຮືອ ຍາວ 300 ສອກ* ກວ້າງ 50 ສອກ* ແລະ​ສູງ 30 ສອກ.* 16 ໃຫ້​ສ້າງ​ປ່ອງ​ຢ້ຽມ​ຫ່າງ​ຈາກ​ຫຼັງ​ຄາ 1 ສອກ* ເພື່ອ​ໃຫ້​ແສງ​ສ່ອງ​ເຂົ້າ​ໄດ້. ໃຫ້​ເຮັດ​ປະຕູ​ເຮືອ​ຢູ່​ທາງ​ຂ້າງ+ ແລະໃຫ້​ເຮືອ​ມີ​ຊັ້ນ 1 ຊັ້ນ 2 ແລະ​ຊັ້ນ 3.

17 ເຮົາ​ຈະ​ໃຫ້​ນ້ຳ​ມາ​ຖ້ວມ​ໂລກ+​ເພື່ອ​ທຳລາຍ​ທຸກ​ສິ່ງ​ທີ່​ມີ​ຊີວິດ. ທຸກ​ສິ່ງ​ທຸກ​ຢ່າງ​ທີ່​ຢູ່​ໃນ​ໂລກ​ຈະ​ຕາຍ​ໝົດ.+ 18 ເຮົາ​ສັນຍາ​ວ່າເຮົາ​ຈະ​ຊ່ວຍ​ຊີວິດ​ເຈົ້າ. ໃຫ້ເຈົ້າ​ກັບ​ເມຍ ແລະ​ພວກ​ລູກ​ຊາຍ​ກັບ​ພວກ​ລູກໃພ້​ເຂົ້າ​ໄປ​ໃນ​ເຮືອ.+ 19 ເຈົ້າ​ຕ້ອງ​ເອົາ​ສັດ​ທຸກ​ຊະນິດ​ເຂົ້າ​ໄປ​ໃນ​ເຮືອ+ ທັງ​ໂຕ​ຜູ້​ແລະ​ໂຕ​ແມ່​ຊະນິດ​ລະ​ຄູ່+ ເພື່ອ​ຊ່ວຍ​ຊີວິດ​ພວກ​ມັນ. 20 ສັດ​ທີ່​ບິນ​ໄດ້​ຊະນິດ​ລະ​ຄູ່ ສັດ​ບ້ານ​ຊະນິດ​ລະ​ຄູ່ ແລະ​ສັດ​ເລືອຄານ​ຊະນິດ​ລະ​ຄູ່. ສັດ​ທັງ​ໝົດ​ນີ້​ຈະ​ມາ​ຫາ​ເຈົ້າ​ເອງ ເພື່ອ​ໃຫ້​ເຈົ້າ​ຊ່ວຍ​ຊີວິດ​ພວກ​ມັນ.+ 21 ໃຫ້​ເຈົ້າ​ສະສົມ​ອາຫານ​ທຸກ​ຢ່າງ​ໄວ້​ຫຼາຍ​ໆ​+ເພື່ອ​ເຈົ້າ​ແລະ​ສັດ​ທັງ​ໝົດ.”

22 ພະເຈົ້າ​ສັ່ງ​ໃຫ້​ໂນອາ​ເຮັດ​ຫຍັງ ລາວ​ກໍ​ເຮັດ. ລາວ​ເຮັດ​ຕາມ​ທຸກ​ຢ່າງ.+