ເຢເຣມີຢາ
15 ພະເຢໂຫວາເວົ້າກັບຂ້ອຍວ່າ: “ເຖິງວ່າໂມເຊກັບຊາມູເອນຈະມາຢືນຢູ່ຕໍ່ໜ້າເຮົາ+ ຈັ່ງໃດເຮົາກໍຈະບໍ່ອີ່ຕົນຄົນຊາດນີ້ດອກ. ໄລ່ເຂົາເຈົ້າໜີໄປຈາກເຮົາ. ໃຫ້ເຂົາເຈົ້າໄປສະ! 2 ຖ້າເຂົາເຈົ້າຖາມເຈົ້າວ່າ ‘ຈະເກີດຫຍັງຂຶ້ນກັບພວກເຮົາ?’ ເຈົ້າຕ້ອງບອກເຂົາເຈົ້າວ່າ ‘ພະເຢໂຫວາບອກວ່າ
“ບາງຄົນຈະຕາຍຍ້ອນພະຍາດ
ບາງຄົນຈະຕາຍຍ້ອນດາບ+
ບາງຄົນຈະຕາຍຍ້ອນຄວາມອຶດຢາກ
ແລະບາງຄົນຈະຖືກຈັບໄປເປັນຊະເລີຍ.”’+
3 ພະເຢໂຫວາເວົ້າວ່າ ‘ເຮົາຈະໃຫ້ເຂົາເຈົ້າເຈິຄວາມຈິບຫາຍ 4 ຢ່າງ*+ຄື: ຖືກຂ້າດ້ວຍດາບ ຖືກໝາລາກສົບໄປ ແລະຖືກນົກຢູ່ເທິງຟ້າກັບສັດປ່າກັດກິນແລະທຳລາຍ.+ 4 ເຮົາຈະເຮັດໃຫ້ຊາດຕ່າງໆໃນໂລກຢ້ານຫຼາຍເມື່ອເຫັນເຂົາເຈົ້າ.+ ເຮົາຈະເຮັດແນວນີ້ ຍ້ອນສິ່ງທີ່ມານາເຊລູກຊາຍຂອງເຮເຊກີຢາກະສັດຂອງຢູດາໄດ້ເຮັດໃນເຢຣູຊາເລັມ.+
5 ເຢຣູຊາເລັມເອີ້ຍ ໃຜຈະອີ່ຕົນເຈົ້າ?
ໃຜຈະເຫັນອົກເຫັນໃຈເຈົ້າ?
ແລະໃຜຈະຢຸດເພື່ອຖາມເຈົ້າວ່າເຈົ້າເປັນແນວໃດ?’
6 ພະເຢໂຫວາເວົ້າວ່າ ‘ເຈົ້າໄດ້ຖິ້ມເຮົາ.+
ເຈົ້າປິ່ນຫຼັງໃຫ້ເຮົາແລະຍ່າງໄປຈາກເຮົາ.+
ດັ່ງນັ້ນ ເຮົາຈະລົງໂທດເຈົ້າແລະທຳລາຍເຈົ້າ.+
ເຮົາເບື່ອທີ່ຈະອີ່ຕົນເຈົ້າແລ້ວ.
7 ຢູ່ປະຕູເມືອງຕ່າງໆຂອງແຜ່ນດິນ ເຮົາຈະຝັດເຂົາເຈົ້າຄືກັບຝັດເຂົ້າ ແລະຈະເຮັດໃຫ້ເຂົາເຈົ້າກະຈັດກະຈາຍໄປຄືກັບຂີ້ແກບ.*
ເຮົາຈະເຮັດໃຫ້ເຂົາເຈົ້າສູນເສຍລູກ.+
ເຮົາຈະທຳລາຍປະຊາຊົນຂອງເຮົາ
ຍ້ອນເຂົາເຈົ້າບໍ່ຍອມກັບໃຈ.+
8 ຈະມີແມ່ໝ້າຍຢູ່ໃນແຜ່ນດິນຂອງເຂົາເຈົ້າເພີ່ມຂຶ້ນຫຼາຍ ຫຼາຍກວ່າເມັດດິນຊາຍຢູ່ທະເລ.
ເຮົາຈະພາຜູ້ທຳລາຍມາຕໍ່ສູ້ເຂົາເຈົ້າໃນຕອນກາງເວັນ ມາຕໍ່ສູ້ທັງແມ່ແລະທັງຄົນໜຸ່ມຂອງເຂົາເຈົ້າ.
ເຮົາຈະເອົາຄວາມວຸ່ນວາຍແລະຄວາມຢ້ານມາໃຫ້ເຂົາເຈົ້າແບບກະທັນຫັນ.
9 ຜູ້ຍິງທີ່ມີລູກ 7 ຄົນເປັນລົມໄປແລ້ວ.
ລາວຫາຍໃຈຝືດ.
ລາວຢູ່ໃນຄວາມມືດທັງໆທີ່ຍັງເປັນຕອນກາງເວັນຢູ່
ເຊິ່ງເຮັດໃຫ້ລາວອັບອາຍແລະຂາຍໜ້າ.*
ສ່ວນຄົນຂອງເຂົາເຈົ້າທີ່ຍັງເຫຼືອໜ້ອຍດຽວ
ເຮົາຈະໃຫ້ສັດຕູເອົາດາບຂ້າເຂົາເຈົ້າ.’ ພະເຢໂຫວາເວົ້າໄວ້ແນວນີ້.”+
10 ແມ່ເອີ້ຍ ລູກຕ້ອງຕາຍຄັກໆຍ້ອນແມ່ເກີດລູກມາ.+
ປະຊາຊົນທັງໝົດໃນແຜ່ນດິນໄດ້ຜິດຖຽງກັບລູກແລະຕໍ່ສູ້ລູກ.
ລູກບໍ່ເຄີຍໃຫ້ເຂົາເຈົ້າຢືມຫຼືໄປຢືມເຂົາເຈົ້າເລີຍ
ແຕ່ເຂົາເຈົ້າທຸກຄົນພັດມາສາບແຊ່ງລູກ.
11 ພະເຢໂຫວາເວົ້າວ່າ: “ເຮົາຈະເຮັດດີກັບເຈົ້າແນ່ນອນ.
ເຮົາຈະຊ່ວຍເຈົ້າໃນຕອນທີ່ເຈົ້າເຈິຄວາມຈິບຫາຍ
ແລະໃນເວລາທີ່ເຈົ້າເຈິຄວາມລຳບາກຍ້ອນສັດຕູ.
12 ໃຜຈະຫັກເຫຼັກທີ່ມາຈາກທາງເໜືອ
ແລະຫັກທອງແດງເປັນທ່ອນໆໄດ້?
13 ເຮົາຈະປ່ອຍໃຫ້ຊັບພະຍາກອນແລະຊັບສົມບັດຂອງເຈົ້າຖືກປຸ້ນ.+
ສັດຕູຂອງເຈົ້າຈະຍຶດເອົາສິ່ງເຫຼົ່ານັ້ນໄປລ້າໆ ຍ້ອນມັນເປັນການລົງໂທດສຳລັບຄວາມຜິດທັງໝົດທີ່ເຈົ້າໄດ້ເຮັດທົ່ວແຜ່ນດິນຂອງເຈົ້າ.
14 ເຮົາຈະເອົາພວກມັນໃຫ້ສັດຕູຂອງເຈົ້າ.
ເຂົາເຈົ້າຈະເອົາພວກມັນໄປໃນແຜ່ນດິນທີ່ເຈົ້າບໍ່ຮູ້ຈັກ+
ຍ້ອນຄວາມໃຈຮ້າຍຂອງເຮົາໄດ້ເຮັດໃຫ້ເກີດໄຟໄໝ້
ແລະມັນກຳລັງໄໝ້ເຈົ້າຢູ່.”+
15 ພະເຢໂຫວາເອີ້ຍ ພະອົງກໍຮູ້ວ່າລູກທຸກລຳບາກສ່ຳໃດ
ຂໍພະອົງຄິດເຖິງລູກແລະສົນໃຈລູກ.
ຂໍພະອົງແກ້ແຄ້ນຄົນທີ່ຂົ່ມເຫງລູກ.+
ຂໍພະອົງຢ່າປ່ອຍໃຫ້ລູກຕາຍ*ຍ້ອນພະອົງບໍ່ໃຈຮ້າຍງ່າຍ.
ພະອົງກໍຮູ້ວ່າລູກຍອມໃຫ້ຄົນອື່ນດູຖູກຍ້ອນເຫັນແກ່ພະອົງ.+
16 ພະເຢໂຫວາພະເຈົ້າຜູ້ບັນຊາການກອງທັບເອີ້ຍ ເມື່ອລູກໄດ້ຮັບຄຳເວົ້າຂອງພະອົງ ລູກກໍກິນຄຳເວົ້ານັ້ນຄືກັບກິນອາຫານ.+
ຄຳເວົ້າຂອງພະອົງເຮັດໃຫ້ລູກມີຄວາມຍິນດີແລະມີຄວາມສຸກໃນໃຈ
ຍ້ອນລູກຖືກເອີ້ນຕາມຊື່ຂອງພະອົງ.
17 ລູກບໍ່ໄດ້ນັ່ງກັບຄົນທີ່ມັກມ່ວນແລະມັກເວົ້າຕະຫຼົກ.+
ຍ້ອນລູກຢູ່ພາຍໃຕ້ອຳນາດຂອງພະອົງ ລູກຈຶ່ງນັ່ງຢູ່ຄົນດຽວ.
ລູກໃຈຮ້າຍຄືກັບພະອົງຍ້ອນຄວາມຊົ່ວທີ່ເຂົາເຈົ້າໄດ້ເຮັດ.+
18 ເປັນຫຍັງລູກເຈັບປວດຊຳເຮື້ອແລະບາດແຜຂອງລູກກໍປົວບໍ່ໄດ້?
ມັນປົວບໍ່ເຊົາເລີຍ.
ພະອົງຈະກາຍເປັນແຫຼ່ງນ້ຳທີ່ບໍ່ມີນ້ຳ
ແລະໄວ້ໃຈບໍ່ໄດ້ບໍ?
19 ພະເຢໂຫວາຈຶ່ງບອກວ່າ:
“ຖ້າເຈົ້າກັບມາຫາເຮົາ ເຮົາຈະພໍໃຈເຈົ້າອີກເທື່ອໜຶ່ງ
ແລະເຈົ້າຈະໄດ້ຢືນຢູ່ຕໍ່ໜ້າເຮົາ.
ຖ້າເຈົ້າແຍກສິ່ງທີ່ມີຄ່າອອກຈາກສິ່ງທີ່ບໍ່ມີຄ່າ
ເຈົ້າກໍຈະເປັນຄືກັບຄົນທີ່ເວົ້າແທນເຮົາ.
ເຂົາເຈົ້າຈະຕ້ອງສົນໃຈຟັງສິ່ງທີ່ເຈົ້າເວົ້າ
ແຕ່ເຈົ້າບໍ່ຕ້ອງໄປສົນໃຈສິ່ງທີ່ເຂົາເຈົ້າເວົ້າ.”
20 ພະເຢໂຫວາບອກວ່າ: “ເຮົາຈະເຮັດໃຫ້ເຈົ້າເປັນກຳແພງທອງແດງທີ່ແຂງແຮງໃນກຸ່ມຄົນເຫຼົ່ານີ້.+
ເຂົາເຈົ້າຈະມາຕໍ່ສູ້ເຈົ້າແນ່ນອນ
ແຕ່ເຂົາເຈົ້າຈະບໍ່ຊະນະເຈົ້າ+
ຍ້ອນເຮົາຢູ່ກັບເຈົ້າເພື່ອຈະຊ່ວຍເຈົ້າໃຫ້ລອດ.
21 ເຮົາຈະຊ່ວຍເຈົ້າໃຫ້ລອດຈາກມືຂອງຄົນຊົ່ວ
ແລະໄຖ່ເຈົ້າຈາກມືຂອງຄົນທີ່ໂຫດຫ້ຽມ.”