ຈົດໝາຍເຖິງຄລິດສະຕຽນຄົນເຮັບເຣີ
11 ຄວາມເຊື່ອແມ່ນຄວາມໝັ້ນໃຈຍ້ອນມີເຫດຜົນໜັກແໜ້ນວ່າສິ່ງທີ່ຫວັງໄວ້ຈະເກີດຂຶ້ນ+ ແລະເປັນຄວາມແນ່ໃຈຍ້ອນມີຫຼັກຖານຈະແຈ້ງວ່າສິ່ງທີ່ເບິ່ງບໍ່ເຫັນນັ້ນມີແທ້. 2 ຍ້ອນຄວາມເຊື່ອ ຄົນສະໄໝແຕ່ກີ້*ຈຶ່ງມີຫຼັກຖານຢືນຢັນວ່າພະເຈົ້າພໍໃຈເຂົາເຈົ້າ.
3 ຍ້ອນຄວາມເຊື່ອ ພວກເຮົາຈຶ່ງເຂົ້າໃຈວ່າພະເຈົ້າຈັດສິ່ງຕ່າງໆໃນເອກະພົບ*ໃຫ້ເປັນລະບົບດ້ວຍຄຳເວົ້າຂອງເພິ່ນ. ສິ່ງທີ່ພວກເຮົາເບິ່ງເຫັນຈຶ່ງເກີດຂຶ້ນຈາກສິ່ງທີ່ເບິ່ງບໍ່ເຫັນ.
4 ຍ້ອນຄວາມເຊື່ອ ອາເບັນເອົາເຄື່ອງບູຊາທີ່ມີຄ່າຫຼາຍກວ່າຂອງກາອິນໃຫ້ພະເຈົ້າ.+ ຍ້ອນລາວມີຄວາມເຊື່ອ ພະເຈົ້າຈຶ່ງພໍໃຈເຄື່ອງບູຊາຂອງລາວເຊິ່ງເປັນຫຼັກຖານຢືນຢັນວ່າເພິ່ນຍອມຮັບລາວ.*+ ເຖິງວ່າລາວຕາຍແລ້ວ ຄວາມເຊື່ອຂອງລາວກໍຍັງສອນພວກເຮົາຢູ່.+
5 ຍ້ອນຄວາມເຊື່ອ ເອໂນກ+ຖືກຮັບໄປເພື່ອຈະບໍ່ຕ້ອງເຈິກັບຄວາມຕາຍ ແລະບໍ່ມີຜູ້ໃດເຫັນລາວອີກເລີຍຍ້ອນພະເຈົ້າຮັບເອົາລາວໄປ.+ ແຕ່ກ່ອນທີ່ຈະຖືກຮັບເອົາໄປ ລາວກໍໄດ້ຫຼັກຖານຢືນຢັນແລ້ວວ່າພະເຈົ້າພໍໃຈລາວ. 6 ຖ້າບໍ່ມີຄວາມເຊື່ອກໍບໍ່ມີທາງເຮັດໃຫ້ພະເຈົ້າພໍໃຈໄດ້ ຍ້ອນຄົນທີ່ເຂົ້າມາຫາພະເຈົ້າຕ້ອງເຊື່ອວ່າເພິ່ນມີຢູ່ແທ້ ແລະຕ້ອງເຊື່ອວ່າເພິ່ນໃຫ້ລາງວັນກັບຄົນທີ່ຊອກຫາເພິ່ນຢ່າງຈິງຈັງ.+
7 ຍ້ອນຄວາມເຊື່ອ ເມື່ອໂນອາ+ໄດ້ຮັບຄຳເຕືອນຈາກພະເຈົ້າກ່ຽວກັບສິ່ງທີ່ຍັງບໍ່ເຄີຍເຫັນ+ ລາວກໍສະແດງຄວາມຢ້ານຢຳພະເຈົ້າແລະສ້າງເຮືອ*+ເພື່ອຊ່ວຍຄົນໃນຄອບຄົວໃຫ້ລອດ. ຍ້ອນລາວມີຄວາມເຊື່ອ ລາວຈຶ່ງເຮັດໃຫ້ເຫັນວ່າໂລກໃນສະໄໝນັ້ນຄວນຖືກທຳລາຍ.+ ຄວາມເຊື່ອເຮັດໃຫ້ພະເຈົ້າຍອມຮັບລາວ.
8 ຍ້ອນຄວາມເຊື່ອ ອັບຣາຮາມ+ເຊື່ອຟັງເມື່ອພະເຈົ້າບອກໃຫ້ໄປແຜ່ນດິນທີ່ລາວຈະໄດ້ຮັບເປັນມໍລະດົກ. ລາວໄປທັງໆທີ່ຍັງບໍ່ຮູ້ວ່າຈະໃຫ້ໄປໃສ.+ 9 ຍ້ອນຄວາມເຊື່ອ ລາວຢູ່ແບບຄົນຕ່າງຊາດໃນແຜ່ນດິນທີ່ພະເຈົ້າສັນຍາໄວ້+ ແລະຢູ່ໃນເຕັ້ນ+ກັບອີຊາກແລະຢາໂຄບເຊິ່ງຮັບຄຳສັນຍາດຽວກັນນີ້ເປັນມໍລະດົກຮ່ວມກັບລາວ.+ 10 ອັບຣາຮາມເຮັດແບບນີ້ຍ້ອນລາວກຳລັງລໍຖ້າເມືອງທີ່ຕັ້ງຢູ່ເທິງຮາກຖານທີ່ໝັ້ນຄົງເຊິ່ງພະເຈົ້າເປັນຜູ້ອອກແບບ*ແລະຜູ້ສ້າງ.+
11 ຍ້ອນຄວາມເຊື່ອ ຊາຣາສາມາດຖືພາໄດ້ເຖິງວ່າຕອນນັ້ນລາວເຖົ້າກາຍຍາມທີ່ຈະມີລູກແລ້ວ.+ ລາວເຊື່ອວ່າຜູ້ທີ່ສັນຍາຈະເຮັດຕາມທີ່ເພິ່ນເວົ້າ.* 12 ດັ່ງນັ້ນ ຜູ້ຊາຍຄົນໜຶ່ງທີ່ສ່ຳກັບວ່າຕາຍແລ້ວ+ຈຶ່ງໃຫ້ກຳເນີດລູກຫຼານ+ບັກຫຼາຍໆຄືກັບດາວທີ່ຢູ່ເທິງຟ້າ ແລະນັບບໍ່ໄດ້ຄືກັບເມັດດິນຊາຍຢູ່ແຄມທະເລ.+
13 ຄົນເຫຼົ່ານີ້ຕາຍໄປຕອນທີ່ມີຄວາມເຊື່ອ. ເຖິງວ່າຍັງບໍ່ໄດ້ຮັບສິ່ງທີ່ພະເຈົ້າສັນຍາໄວ້+ ແຕ່ເຂົາເຈົ້າກໍເບິ່ງເຫັນແຕ່ໄກ+ແລະລໍຖ້າດ້ວຍຄວາມຍິນດີ. ເຂົາເຈົ້າປະກາດຢ່າງເປີດເຜີຍວ່າໂຕເອງເປັນຄົນແປກໜ້າແລະເປັນຄົນທີ່ອາໄສຢູ່ຊົ່ວຄາວໃນແຜ່ນດິນນັ້ນ. 14 ຄົນທີ່ເວົ້າແບບນັ້ນສະແດງວ່າເຂົາເຈົ້າຕັ້ງໃຈຊອກຫາບ່ອນຢູ່ທີ່ຈະເປັນຂອງເຂົາເຈົ້າເອງ. 15 ຖ້າເຂົາເຈົ້າຄິດເຖິງບ່ອນທີ່ໂຕເອງຈາກມາເລື້ອຍໆ+ ເຂົາເຈົ້າຈະກັບໄປກໍໄດ້. 16 ແຕ່ເຂົາເຈົ້າຢາກຈະຢູ່ໃນບ່ອນທີ່ດີກວ່າເຊິ່ງເປັນບ່ອນທີ່ກ່ຽວຂ້ອງກັບສະຫວັນ. ພະເຈົ້າຈຶ່ງບໍ່ອາຍທີ່ຖືກເອີ້ນວ່າເປັນພະເຈົ້າຂອງເຂົາເຈົ້າ+ ແລະເພິ່ນໄດ້ກຽມເມືອງໜຶ່ງໄວ້ໃຫ້ເຂົາເຈົ້າ.+
17 ຍ້ອນຄວາມເຊື່ອ ເມື່ອພະເຈົ້າລອງໃຈອັບຣາຮາມ+ໃຫ້ມອບອີຊາກເປັນເຄື່ອງບູຊາ ຜູ້ຊາຍຄົນນີ້ທີ່ດີໃຈທີ່ໄດ້ຮັບຄຳສັນຍາກໍພ້ອມທີ່ຈະມອບລູກຊາຍຄົນດຽວຂອງໂຕເອງເປັນເຄື່ອງບູຊາ.+ 18 ລາວເຮັດແບບນັ້ນເຖິງວ່າພະເຈົ້າເຄີຍບອກລາວວ່າ: “ຄົນທີ່ຈະຖືກເອີ້ນວ່າເປັນເຊື້ອສາຍຂອງເຈົ້າຈະມາທາງອີຊາກ.”+ 19 ອັບຣາຮາມເຊື່ອວ່າພະເຈົ້າຈະປຸກອີຊາກໃຫ້ຄືນມາຈາກຕາຍໄດ້ ແລະລາວກໍໄດ້ອີຊາກກັບຄືນມາແທ້ໆເຊິ່ງເປັນຕົວຢ່າງຂອງສິ່ງທີ່ຈະເກີດຂຶ້ນໃນອະນາຄົດ.+
20 ຍ້ອນຄວາມເຊື່ອ ອີຊາກໄດ້ອວຍພອນໃຫ້ຢາໂຄບ+ກັບເອຊາວ+ແລະບອກກ່ຽວກັບສິ່ງທີ່ຈະເກີດຂຶ້ນໃນອະນາຄົດ.
21 ຍ້ອນຄວາມເຊື່ອ ເມື່ອຢາໂຄບກຳລັງຊິຕາຍ+ ລາວໄດ້ອວຍພອນໃຫ້ລູກຊາຍ 2 ຄົນຂອງໂຢເຊັບ+ ແລະລາວຕ້ອງໃຊ້ໄມ້ຄ້ອນເທົ້າຄ້ຳໂຕໄວ້ເພື່ອນະມັດສະການພະເຈົ້າ.+
22 ຍ້ອນຄວາມເຊື່ອ ເມື່ອໂຢເຊັບໃກ້ຊິຕາຍ ລາວໄດ້ເວົ້າໄວ້ວ່າຄົນອິດສະຣາເອນຈະໄດ້ອອກຈາກເອຢິບ ແລະລາວໄດ້ສັ່ງໄວ້ເລື່ອງກະດູກ*ຂອງລາວ.+
23 ຍ້ອນຄວາມເຊື່ອ ເມື່ອໂມເຊເກີດມາ ພໍ່ແມ່ຂອງລາວກໍເຊື່ອງລາວໄວ້ 3 ເດືອນ+ຍ້ອນເຫັນວ່າລາວເປັນເດັກນ້ອຍທີ່ໜ້າຮັກຫຼາຍ.+ ເຂົາເຈົ້າບໍ່ຢ້ານຄຳສັ່ງຂອງກະສັດ.+ 24 ຍ້ອນຄວາມເຊື່ອ ເມື່ອໂມເຊໃຫຍ່ແລ້ວ+ ລາວກໍບໍ່ຍອມໃຫ້ຜູ້ໃດເອີ້ນລາວວ່າລູກຂອງລູກສາວຟາໂຣ.*+ 25 ລາວເລືອກທີ່ຈະຖືກຂົ່ມເຫງຮ່ວມກັບປະຊາຊົນຂອງພະເຈົ້າແທນທີ່ຈະມ່ວນຊື່ນຊົ່ວຄາວກັບການເຮັດຜິດ. 26 ຍ້ອນລາວຖືວ່າຄວາມອັບອາຍທີ່ໄດ້ຮັບໃນຖານະຜູ້ທີ່ຖືກເລືອກ*ມີຄ່າຫຼາຍກວ່າຊັບສົມບັດໃນເອຢິບ ລາວຈຶ່ງຕັ້ງໃຈລໍຖ້າລາງວັນທີ່ຈະໄດ້ຮັບ. 27 ຍ້ອນຄວາມເຊື່ອ ລາວອອກຈາກເອຢິບ+ໂດຍບໍ່ຢ້ານທີ່ກະສັດໃຈຮ້າຍ.+ ລາວຢືນຢັດຕໍ່ໄປຄືກັບເຫັນພະເຈົ້າຜູ້ທີ່ມະນຸດເບິ່ງບໍ່ເຫັນ.+ 28 ຍ້ອນຄວາມເຊື່ອ ລາວໄດ້ສະຫຼອງປັດສະຄາແລະຊິດເລືອດໃສ່ຂອບປະຕູເພື່ອທູດສະຫວັນຈະບໍ່ເຮັດອັນຕະລາຍໃຫ້ລູກຊາຍຜູ້ທຳອິດຂອງຄົນອິດສະຣາເອນ.+
29 ຍ້ອນຄວາມເຊື່ອ ພວກອິດສະຣາເອນຍ່າງຂ້າມທະເລແດງຄືກັບຍ່າງຢູ່ເທິງດິນແຫ້ງ.+ ແຕ່ເມື່ອພວກເອຢິບພະຍາຍາມຈະຂ້າມໄປກໍຖືກນ້ຳຖ້ວມຕາຍໝົດ.+
30 ຍ້ອນຄວາມເຊື່ອ ເຂົາເຈົ້າຍ່າງອ້ອມກຳແພງເມືອງເຢຣິໂກ 7 ມື້ ແລ້ວກຳແພງເມືອງກໍພັງລົງມາ.+ 31 ຍ້ອນຄວາມເຊື່ອ ຣາຮາບທີ່ເປັນໂສເພນີໄດ້ຕ້ອນຮັບຄົນສອດແນມແບບເປັນມິດ ລາວຈຶ່ງບໍ່ໄດ້ຖືກທຳລາຍໄປພ້ອມກັບຄົນອື່ນໆທີ່ບໍ່ເຊື່ອຟັງ.+
32 ມີໃຜອີກທີ່ຂ້ອຍຄວນຈະເວົ້າເຖິງ? ຂ້ອຍມີເວລາບໍ່ພໍທີ່ຈະເລົ່າຕໍ່ກ່ຽວກັບກີເດໂອນ+ ບາຣາກ+ ແຊມຊັນ+ ເຢັບທາ+ ດາວິດ+ ຊາມູເອນ+ ແລະຜູ້ພະຍາກອນຄົນອື່ນໆ. 33 ຍ້ອນຄວາມເຊື່ອ ເຂົາເຈົ້າຕໍ່ສູ້ຊະນະປະເທດຕ່າງໆ+ ເຮັດໃຫ້ເກີດຄວາມຖືກຕ້ອງ ໄດ້ຮັບຄຳສັນຍາຈາກພະເຈົ້າ+ ງັບປາກສິງ+ 34 ມອດໄຟທີ່ຮ້ອນໆ+ ລອດຕາຍຈາກຄົມດາບ+ ຈາກທີ່ອ່ອນແອກໍມີກຳລັງຫຼາຍ+ ຕໍ່ສູ້ຢ່າງເຂັ້ມແຂງໃນສົງຄາມ+ ແລະເຮັດໃຫ້ກອງທັບທີ່ມາໂຈມຕີແຕກໜີໄປ.+ 35 ພວກຜູ້ຍິງກໍຮັບເອົາຄົນຂອງເຂົາເຈົ້າກັບມາຍ້ອນຄົນເຫຼົ່ານັ້ນຖືກປຸກໃຫ້ຄືນມາຈາກຕາຍ.+ ສ່ວນຄົນອື່ນໆຍອມຖືກທໍລະມານຍ້ອນບໍ່ຍອມປະຕິເສດຄວາມເຊື່ອເພື່ອແລກກັບການປ່ອຍໂຕ. ເຂົາເຈົ້າເຮັດແນວນີ້ກໍເພື່ອຈະຖືກປຸກໃຫ້ຄືນມາຈາກຕາຍໃນແບບທີ່ດີກວ່າ. 36 ຍັງມີຄົນອື່ນໆອີກທີ່ຖືກທົດສອບໂດຍຖືກເຍາະເຍີ້ຍ ຖືກເອົາແສ້ຟາດ ແລະເຖິງຂັ້ນຖືກລ່າມໂສ້+ແລະຖືກຂັງຄຸກ.+ 37 ບາງຄົນຖືກດຶກກ້ອນຫີນໃສ່+ ບາງຄົນຖືກທົດສອບຄວາມເຊື່ອ ບາງຄົນຖືກເລື່ອຍເປັນ 2 ທ່ອນ ບາງຄົນຖືກຂ້າດ້ວຍດາບ+ ບາງຄົນຕ້ອງນຸ່ງໜັງແກະໜັງແບ້+ ຂາດເຂີນ ທຸກຍາກລຳບາກ+ ແລະຖືກຂົ່ມເຫງ.+ 38 ໂລກນີ້ບໍ່ເໝາະສົມກັບຄົນແບບນີ້ເລີຍ. ເຂົາເຈົ້າບາງຄົນໄປລີ້ຢູ່ຕາມບ່ອນກັນດານ ຕາມພູ ຕາມຖ້ຳ+ ແລະຕາມໂຜ້ງໃຕ້ດິນ.
39 ທຸກຄົນມີຫຼັກຖານຢືນຢັນວ່າພະເຈົ້າພໍໃຈເຂົາເຈົ້າຍ້ອນມີຄວາມເຊື່ອ. ແຕ່ເຂົາເຈົ້າກໍຍັງບໍ່ໄດ້ຮັບສິ່ງທີ່ເພິ່ນສັນຍາໄວ້. 40 ເຂົາເຈົ້າຈະຮັບຄວາມສົມບູນແບບກ່ອນພວກເຮົາບໍ່ໄດ້*ຍ້ອນພະເຈົ້າຕັ້ງໃຈໄວ້ແລ້ວວ່າຈະໃຫ້ສິ່ງທີ່ດີກວ່າກັບພວກເຮົາ.+