ພະນິມິດທີ່ເປີດເຜີຍໃຫ້ໂຢຮັນ
1 ເລື່ອງທັງໝົດນີ້ແມ່ນສິ່ງທີ່ພະເຢຊູຄລິດໄດ້ເປີດເຜີຍ.+ ພະເຢຊູໄດ້ຮັບຄວາມຮູ້ນີ້ຈາກພະເຈົ້າ ເພື່ອເພິ່ນຈະເປີດເຜີຍໃຫ້ພວກທາດຂອງພະເຈົ້າ+ຮູ້ວ່າຈະເກີດຫຍັງຂຶ້ນໃນໄວໆນີ້. ພະເຢຊູໃຊ້ທູດສະຫວັນຂອງເພິ່ນໃຫ້ບອກໂຢຮັນ+ທາດຂອງພະເຈົ້າ*ໂດຍທາງນິມິດ. 2 ໂຢຮັນເປັນພະຍານຢືນຢັນທຸກສິ່ງທີ່ລາວເຫັນ. ລາວຂຽນກ່ຽວກັບສິ່ງທີ່ພະເຈົ້າເວົ້າແລະເຫດການທີ່ພະເຢຊູຄລິດໃຫ້ເຫັນ. 3 ຄວາມສຸກຈະເກີດກັບຄົນທີ່ອ່ານອອກສຽງ ຄົນທີ່ໄດ້ຍິນຄຳພະຍາກອນນີ້ ແລະຄົນທີ່ເຮັດຕາມສິ່ງທີ່ຂຽນໄວ້+ ຍ້ອນເວລາກຳນົດໃກ້ເຂົ້າມາແລ້ວ.
4 ຂ້ອຍໂຢຮັນຂຽນຫາ 7 ປະຊາຄົມ+ໃນແຂວງອາຊີ*ດັ່ງນີ້:
ຂໍໃຫ້ພວກເຈົ້າໄດ້ຮັບຄວາມກະລຸນາທີ່ຍິ່ງໃຫຍ່ແລະສັນຕິສຸກຈາກ “ຜູ້ມີຊີວິດຢູ່ໃນອະດີດ ຜູ້ມີຊີວິດຢູ່ຕອນນີ້ ແລະຜູ້ທີ່ກຳລັງຈະມາ”+ ແລະຈາກພະລັງທັງເຈັດ+ທີ່ຢູ່ໜ້າບັນລັງຂອງເພິ່ນ 5 ແລະຈາກພະເຢຊູຄລິດທີ່ເປັນ “ພະຍານທີ່ສັດຊື່”+ ແລະເປັນ “ຜູ້ທຳອິດທີ່ຄືນມາຈາກຕາຍ”+ ແລະເປັນ “ຜູ້ປົກຄອງເໜືອກະສັດທຸກອົງໃນໂລກ.”+
ພະເຢຊູຮັກພວກເຮົາ+ແລະໃຊ້ເລືອດຂອງເພິ່ນປົດປ່ອຍພວກເຮົາໃຫ້ເປັນອິດສະຫຼະຈາກບາບ.+ 6 ເພິ່ນເຮັດໃຫ້ພວກເຮົາເປັນກະສັດ+ແລະເປັນປະໂລຫິດ+ຂອງພະເຈົ້າຜູ້ເປັນພໍ່ຂອງເພິ່ນ. ຂໍໃຫ້ເພິ່ນໄດ້ຮັບສະຫງ່າລາສີແລະລິດເດດຕະຫຼອດໄປ. ອາແມນ.*
7 ເບິ່ງແມ້! ເພິ່ນກຳລັງມາເທິງຂີ້ເຝື້ອ.+ ທຸກຄົນຈະເຫັນເພິ່ນແລະຄົນທີ່ແທງເພິ່ນກໍຈະເຫັນເພິ່ນຄືກັນ. ທຸກຕະກູນທົ່ວໂລກຈະຮ້ອງໄຫ້ໂສກເສົ້າຍ້ອນເພິ່ນ. ແມ່ນແລ້ວ ເລື່ອງນີ້ຈະເກີດຂຶ້ນແນ່ນອນ.+ ອາແມນ.
8 ພະເຢໂຫວາ*ພະເຈົ້າເວົ້າວ່າ: “ເຮົາເປັນອັນຟາແລະໂອເມກາ*+ ເປັນຜູ້ມີຊີວິດຢູ່ໃນອະດີດ ເປັນຜູ້ມີຊີວິດຢູ່ຕອນນີ້ ແລະເປັນຜູ້ທີ່ກຳລັງຈະມາ. ເຮົາເປັນຜູ້ມີລິດເດດສູງສຸດ.”+
9 ຂ້ອຍໂຢຮັນເປັນພີ່ນ້ອງຂອງພວກເຈົ້າ. ຂ້ອຍຮ່ວມໃນຄວາມທຸກລຳບາກ+ ຮ່ວມໃນການປົກຄອງ+ ແລະຮ່ວມອົດທົນ+ກັບພວກເຈົ້າຍ້ອນພວກເຮົາເປັນລູກສິດຂອງພະເຢຊູ.+ ຂ້ອຍຢູ່ເກາະທີ່ຊື່ປັດໂມຍ້ອນຂ້ອຍເວົ້າເລື່ອງພະເຈົ້າແລະປະກາດເລື່ອງພະເຢຊູ. 10 ພະລັງຂອງພະເຈົ້າພາຂ້ອຍມາຢູ່ໃນວັນຂອງຜູ້ເປັນນາຍ ແລະຂ້ອຍໄດ້ຍິນສຽງດັງຈາກທາງຫຼັງຄືກັບສຽງແກ. 11 ສຽງນັ້ນເວົ້າວ່າ: “ໃຫ້ເຈົ້າຂຽນສິ່ງທີ່ເຫັນໃສ່ມ້ວນໜັງສືແລ້ວສົ່ງໄປໃຫ້ 7 ປະຊາຄົມ. ປະຊາຄົມເຫຼົ່ານັ້ນຢູ່ເມືອງເອເຟໂຊ+ ເມືອງຊະມີນາ+ ເມືອງເປຄາໂມ+ ເມືອງທົວເຕຣາ+ ເມືອງຊາເດ+ ເມືອງຟີລາເດັນເຟຍ+ ແລະເມືອງລາວດີເກອາ.”+
12 ເມື່ອຂ້ອຍຫຼຽວໄປທາງສຽງທີ່ເວົ້າກັບຂ້ອຍ ຂ້ອຍກໍເຫັນຂາຕະກຽງຄຳ 7 ອັນ+ 13 ແລະຂ້ອຍເຫັນຜູ້ໜຶ່ງຄືກັບລູກມະນຸດ+ຢູ່ທ່າມກາງຂາຕະກຽງເຫຼົ່ານັ້ນ. ເພິ່ນນຸ່ງເສື້ອຍາວຮອດຕີນແລະມີຜ້າທີ່ເປັນຄຳພັນອ້ອມເອິກ. 14 ຜົມເພິ່ນຂາວຄືກັບຂົນແກະສີຂາວແລະຄືກັບຫິມະ. ຕາຂອງເພິ່ນຄືກັບແປວໄຟ.+ 15 ຕີນຂອງເພິ່ນຄືກັບທອງແດງ+ທີ່ເປັ່ງແສງໃນເຕົາຫຼອມ ແລະສຽງຂອງເພິ່ນຄືກັບສຽງນ້ຳທີ່ໄຫຼແຮງໆ. 16 ໃນມືເບື້ອງຂວາຂອງເພິ່ນມີດາວ 7 ດວງ.+ ມີດາບ 2 ຄົມທີ່ຍາວແລະຄົມຫຼາຍອອກມາຈາກປາກຂອງເພິ່ນ+ ແລະໜ້າຂອງເພິ່ນຄືກັບຕາເວັນທີ່ສ່ອງແສງກ້າ.+ 17 ເມື່ອຂ້ອຍເຫັນເພິ່ນ ຂ້ອຍກໍລົ້ມລົງຢູ່ຕີນເພິ່ນຄືກັບຄົນຕາຍ.
ເພິ່ນຈຶ່ງເອົາມືເບື້ອງຂວາມາວາງຢູ່ເທິງໂຕຂ້ອຍແລ້ວເວົ້າວ່າ: “ບໍ່ຕ້ອງຢ້ານ. ຂ້ອຍຖືກເອີ້ນວ່າຜູ້ທຳອິດ+ແລະຜູ້ສຸດທ້າຍ+ 18 ແລະຜູ້ມີຊີວິດຢູ່.+ ຂ້ອຍເຄີຍຕາຍມາແລ້ວ.+ ແຕ່ເບິ່ງແມ້! ຕອນນີ້ ຂ້ອຍມີຊີວິດຢູ່ຕະຫຼອດໄປ+ແລະຂ້ອຍມີລູກກະແຈທີ່ຈະເປີດປະຕູແຫ່ງຄວາມຕາຍແລະບ່ອນຝັງສົບ.*+ 19 ໃຫ້ຂຽນສິ່ງທີ່ເຈົ້າໄດ້ເຫັນ ສິ່ງທີ່ກຳລັງເກີດຂຶ້ນ ແລະສິ່ງທີ່ຈະເກີດຂຶ້ນຕໍ່ໄປ. 20 ສ່ວນຄວາມລັບສັກສິດເລື່ອງດາວ 7 ດວງທີ່ເຈົ້າເຫັນໃນມືເບື້ອງຂວາຂອງຂ້ອຍ ແລະເລື່ອງຂາຕະກຽງຄຳ 7 ອັນນັ້ນມີຄວາມໝາຍຈັ່ງຊີ້. ດາວ 7 ດວງໝາຍເຖິງພວກຜູ້ສົ່ງຂ່າວ*ຂອງ 7 ປະຊາຄົມ ແລະຂາຕະກຽງ 7 ອັນໝາຍເຖິງ 7 ປະຊາຄົມ.”+