ຈົດໝາຍຂອງຢາໂກໂບ
3 ພີ່ນ້ອງເອີ້ຍ ພວກເຈົ້າຫຼາຍຄົນບໍ່ຄວນເປັນຄູສອນ. ພວກເຈົ້າຮູ້ວ່າຖ້າເປັນຄູສອນກໍຕ້ອງຮັບຜິດຊອບຕໍ່ພະເຈົ້າຫຼາຍກວ່າຄົນອື່ນ.+ 2 ພວກເຮົາທຸກຄົນເຮັດຜິດພາດຢູ່ເລື້ອຍໆ.+ ຖ້າຜູ້ໃດບໍ່ຜິດພາດເລີຍໃນຄຳເວົ້າ ລາວກໍເປັນຄົນສົມບູນແບບແລ້ວ ແລະສາມາດຄວບຄຸມຮ່າງກາຍໄດ້ທຸກສ່ວນ. 3 ຖ້າພວກເຮົາເອົາເຊືອກ*ຄາດໃສ່ປາກມ້າເພື່ອໃຫ້ມັນເຊື່ອຟັງເຮົາ ພວກເຮົາກໍຄວບຄຸມມັນໄດ້ທຸກສ່ວນ. 4 ເຮືອກໍຄືກັນ ເຖິງວ່າມັນຈະລຳໃຫຍ່ແລະແລ່ນໄປໂດຍໃຊ້ແຮງຂອງລົມ ແຕ່ມັນກໍຖືກຄວບຄຸມໂດຍຫາງເສືອນ້ອຍໆເພື່ອໃຫ້ແລ່ນໄປຕາມທີ່ຜູ້ຂັດທ້າຍເຮືອຕ້ອງການ.
5 ລີ້ນກໍຄືກັນ ມັນເປັນອະໄວຍະວະນ້ອຍໆແຕ່ເວົ້າໃຫຍ່. ຄິດເບິ່ງແມ້ ແປວໄຟນ້ອຍໆກໍສາມາດຈູດປ່າທີ່ໃຫຍ່ໆໃຫ້ໝົດໄດ້! 6 ລີ້ນເປັນຄືກັບໄຟ.+ ໃນອະໄວຍະວະຕ່າງໆຂອງຮ່າງກາຍ ລີ້ນເຮັດສິ່ງທີ່ຊົ່ວຮ້າຍຫຼາຍຢ່າງ. ມັນເຮັດໃຫ້ທຸກສ່ວນຂອງຮ່າງກາຍບໍ່ສະອາດ+ແລະທຳລາຍຊີວິດຄົນຄືກັບການເຜົາໄໝ້ຂອງໄຟຈາກເກເຮັນນາ.* 7 ສັດທຸກຊະນິດຝຶກໄດ້ ບໍ່ວ່າຈະເປັນສັດປ່າ ນົກ ສັດເລືອຄານ ຫຼືສັດໃນທະເລ ແລະມີຄົນເຄີຍຝຶກພວກມັນມາແລ້ວ. 8 ແຕ່ບໍ່ມີໃຜຝຶກລີ້ນໄດ້. ມັນຄວບຄຸມບໍ່ໄດ້ ສ້າງຄວາມເສຍຫາຍ ແລະມີພິດຮ້າຍແຮງຈົນເຮັດໃຫ້ຕາຍ.+ 9 ພວກເຮົາໃຊ້ລີ້ນສັນລະເສີນພະເຢໂຫວາ*ພໍ່ຂອງພວກເຮົາ ແຕ່ກໍຍັງໃຊ້ມັນປ້ອຍດ່າມະນຸດທີ່ຖືກສ້າງ “ຄ້າຍຄືກັບພະເຈົ້າ.”+ 10 ທັງຄຳສັນລະເສີນແລະຄຳປ້ອຍດ່າກໍອອກມາຈາກປາກດຽວກັນ.
ພີ່ນ້ອງເອີ້ຍ ຢ່າໃຫ້ເປັນແບບນັ້ນເລີຍ.+ 11 ນ້ຳຈືດກັບນ້ຳເຄັມຈະອອກມາຈາກບໍ່ດຽວກັນໄດ້ບໍ? 12 ພີ່ນ້ອງເອີ້ຍ ໝາກກອກຈະເປັນໝາກຢູ່ຕົ້ນໝາກເດື່ອໄດ້ບໍ? ໝາກເດື່ອຈະເປັນໝາກຢູ່ຕົ້ນໝາກລະແຊັງໄດ້ບໍ?+ ຄັນຊັ້ນ ນ້ຳຈືດຈະອອກມາຈາກບໍ່ນ້ຳເຄັມກໍບໍ່ໄດ້ຄືກັນ.
13 ໃນພວກເຈົ້າມີໃຜທີ່ມີສະຕິປັນຍາແລະຄວາມເຂົ້າໃຈບໍ? ໃຫ້ລາວເຮັດໃຫ້ເຫັນໂດຍການປະພຶດທີ່ດີ ແລະເຮັດທຸກຢ່າງດ້ວຍຄວາມອ່ອນໂຍນທີ່ມາຈາກສະຕິປັນຍາຂອງພະເຈົ້າ. 14 ແຕ່ຖ້າໃນໃຈພວກເຈົ້າມີຄວາມອິດສາ+ແລະນ້ຳໃຈຊີງດີຊີງເດັ່ນ*+ ກໍຢ່າອວດວ່າໂຕເອງມີສະຕິປັນຍາ.+ ຖ້າພວກເຈົ້າເຮັດແບບນັ້ນກໍສະແດງວ່າພວກເຈົ້າເວົ້າຂັດກັບຄວາມຈິງ. 15 ສະຕິປັນຍານີ້ບໍ່ໄດ້ມາຈາກພະເຈົ້າທີ່ຢູ່ໃນສະຫວັນ ແຕ່ເປັນສະຕິປັນຍາແບບໂລກ+ ແບບສັດ ແລະແບບປີສາດ. 16 ຖ້າບ່ອນໃດມີຄວາມອິດສາແລະນ້ຳໃຈຊີງດີຊີງເດັ່ນ ບ່ອນນັ້ນກໍມີຄວາມວຸ່ນວາຍແລະຄວາມຊົ່ວຮ້າຍທຸກຢ່າງ.+
17 ແຕ່ສະຕິປັນຍາຈາກພະເຈົ້ານັ້ນ ທຳອິດເຮັດໃຫ້ຄົນມີຫົວໃຈບໍລິສຸດ.+ ຈາກນັ້ນ ມັນກໍເຮັດໃຫ້ລາວເປັນຄົນສ້າງສັນຕິສຸກ+ ຍອມຄົນອື່ນ+ ພ້ອມຈະເຊື່ອຟັງ ຮູ້ສຶກອີ່ຕົນຄົນອື່ນ ເຮັດສິ່ງທີ່ດີ+ ບໍ່ລຳອຽງ+ ແລະບໍ່ໜ້າຊື່ໃຈຄົດ.+ 18 ນອກຈາກນັ້ນ ຄົນທີ່ເຮັດດີກັບຄົນອື່ນກໍເຮັດສິ່ງທີ່ຖືກຕ້ອງ+ ແລະເຮັດໃຫ້ຄົນອື່ນມີສັນຕິສຸກນຳ.+