ພວກຜູ້ຕັດສິນ
8 ຕໍ່ມາ ພວກຜູ້ຊາຍໃນຕະກູນເອຟຣາຢິມມາເວົ້າກັບກີເດໂອນວ່າ: “ເປັນຫຍັງເຈົ້າຄືເຮັດກັບພວກເຮົາແນວນີ້? ເປັນຫຍັງເຈົ້າຄືບໍ່ເອີ້ນພວກເຮົາຕອນໄປສູ້ກັບພວກມີດີອານ?”+ ເຂົາເຈົ້າໃຈຮ້າຍໃຫ້ລາວແຮງ.+ 2 ລາວກໍເລີຍເວົ້າກັບເຂົາເຈົ້າວ່າ: “ອັນທີ່ຂ້ອຍເຮັດມັນທຽບກັບສິ່ງທີ່ພວກເຈົ້າເຮັດບໍ່ໄດ້ດອກ. ສິ່ງນ້ອຍໆທີ່ຕະກູນເອຟຣາຢິມ+ເຮັດສຳເລັດກໍຍັງຍິ່ງໃຫຍ່ກວ່າທຸກສິ່ງທີ່ຈຸ້ມເຈື້ອຂອງອາບີເອເຊເຮັດ.*+ 3 ພະເຈົ້າໄດ້ມອບໂອເຣັບກັບເຊເອບ+ທີ່ເປັນເຈົ້ານາຍຂອງພວກມີດີອານໄວ້ໃນມືຂອງພວກເຈົ້າແລ້ວ. ອັນທີ່ຂ້ອຍເຮັດມັນທຽບບໍ່ໄດ້ເລີຍກັບສິ່ງທີ່ພວກເຈົ້າເຮັດ.” ເມື່ອກີເດໂອນເວົ້າແນວນັ້ນ ເຂົາເຈົ້າກໍໃຈເຢັນລົງ.
4 ແລ້ວກີເດໂອນກໍມາຮອດແມ່ນ້ຳຈໍແດນແລະຂ້າມໄປອີກຟາກໜຶ່ງ. ລາວກັບທະຫານ 300 ຄົນທີ່ມານຳລາວເມື່ອຍຫຼາຍ ແຕ່ເຂົາເຈົ້າກໍໄລ່ນຳຫຼັງພວກສັດຕູຕໍ່ໄປ. 5 ກີເດໂອນເວົ້າກັບຄົນໃນເມືອງສຸກໂກດວ່າ: “ຂໍເຂົ້າຈີ່ໃຫ້ທະຫານຂອງຂ້ອຍກິນແດ່ ເພາະເຂົາເຈົ້າເມື່ອຍຫຼາຍ ແລະຂ້ອຍກຳລັງໄລ່ຈັບເສບາກັບຊັນມຸນນາກະສັດຂອງພວກມີດີອານຢູ່.” 6 ແຕ່ພວກເຈົ້ານາຍຂອງເມືອງສຸກໂກດເວົ້າວ່າ: “ເຈົ້າຍັງຈັບເສບາກັບຊັນມຸນນາບໍ່ໄດ້ເທື່ອ ເຈົ້າຍັງມາຂໍເຂົ້າຈີ່ໃຫ້ທະຫານຂອງເຈົ້າອີກຫວະ?” 7 ກີເດໂອນກໍບອກເຂົາເຈົ້າວ່າ: “ຄັນຊັ້ນ ເມື່ອພະເຢໂຫວາມອບເສບາກັບຊັນມຸນນາໄວ້ໃນມືຂ້ອຍແລ້ວ ຂ້ອຍຊິກັບມາແລະເອົາຕົ້ນໜາມກັບຟຸ່ມໜາມທີ່ໄດ້ຈາກບ່ອນກັນດານມາຟາດພວກເຈົ້າ.”+ 8 ແລ້ວກີເດໂອນກໍອອກຈາກຫັ້ນໄປເມືອງເປນູເອນ ແລະຂໍເຂົ້າຈີ່ຈາກຄົນໃນເມືອງ ແຕ່ຄົນໃນເມືອງນັ້ນກໍຕອບລາວຄືກັນກັບຄົນໃນເມືອງສຸກໂກດ. 9 ລາວຈຶ່ງເວົ້າກັບຄົນໃນເມືອງເປນູເອນວ່າ: “ຫຼັງຈາກຂ້ອຍຊະນະ ຂ້ອຍຊິກັບມາທຳລາຍປ້ອມຂອງພວກເຈົ້າ.”+
10 ເສບາກັບຊັນມຸນນາພາທະຫານ 15.000 ຄົນໄປຕັ້ງຄ້າຍຢູ່ກາໂກເຣ. ທະຫານພວກນີ້ເປັນທະຫານທີ່ເຫຼືອຈາກທະຫານທັງໝົດທີ່ມາຈາກທາງທິດຕາເວັນອອກ+ ເພາະທະຫານທີ່ຖືດາບຖືກຂ້າໄປແລ້ວ 120.000 ຄົນ. 11 ກີເດໂອນເດີນທາງໂດຍໃຊ້ເສັ້ນທາງທີ່ຄົນຍ້າຍບ່ອນຢູ່ໄປເລື້ອຍໆໃຊ້ ເຊິ່ງຢູ່ທາງທິດຕາເວັນອອກຂອງເມືອງໂນບາກັບເມືອງໂຢກເບຮາ.+ ລາວໂຈມຕີຄ້າຍຂອງພວກສັດຕູໂດຍທີ່ພວກນັ້ນບໍ່ທັນຕັ້ງໂຕ. 12 ຕອນທີ່ເສບາກັບຊັນມຸນນາກຳລັງໜີ ລາວກໍໄລ່ນຳຫຼັງແລະຈັບກະສັດຂອງພວກມີດີອານທັງສອງອົງນີ້ໄດ້ ສ່ວນທະຫານທີ່ເຫຼືອກໍພາກັນຢ້ານ.
13 ແລ້ວກີເດໂອນລູກຊາຍຂອງໂຢອາດກໍກັບມາຈາກການສູ້ຮົບໂດຍໃຊ້ເສັ້ນທາງ ໄປເມືອງເຮເຫຼັດ. 14 ໃນລະຫວ່າງທາງ ລາວໄດ້ຈັບຊາຍໜຸ່ມຄົນໜຶ່ງຂອງເມືອງສຸກໂກດມາສອບຖາມ. ຊາຍໜຸ່ມຄົນນັ້ນກໍຈົດລາຍຊື່ພວກຜູ້ນຳແລະພວກຫົວໜ້າຂອງເມືອງສຸກໂກດທັງໝົດ 77 ຄົນໃຫ້ລາວ. 15 ແລ້ວລາວກໍໄປຫາຄົນໃນເມືອງສຸກໂກດແລະເວົ້າວ່າ: “ນີ້ເດ້ ເສບາກັບຊັນມຸນນາທີ່ພວກເຈົ້າເຄີຍເວົ້າດູຖູກຂ້ອຍວ່າ ‘ເປັນຫຍັງເຮົາຕ້ອງເອົາເຂົ້າຈີ່ໃຫ້ທະຫານທີ່ເມື່ອຍຂອງເຈົ້າກິນ? ເຈົ້າຈັບເສບາກັບຊັນມຸນນາໄດ້ແລ້ວຊັ້ນຫວະ?’”+ 16 ແລ້ວກີເດໂອນກໍເອົາຕົ້ນໜາມແລະຟຸ່ມໜາມທີ່ໄດ້ຈາກບ່ອນກັນດານມາຟາດພວກເຈົ້ານາຍກັບພວກຫົວໜ້າຂອງເມືອງສຸກໂກດ.+ 17 ລາວເຮັດໃຫ້ພວກເຂົາໄດ້ຮັບບົດຮຽນ. ລາວທຳລາຍປ້ອມຂອງເມືອງເປນູເອນ+ແລະໄດ້ຂ້າຜູ້ຊາຍໃນເມືອງນັ້ນ.
18 ກີເດໂອນຖາມເສບາກັບຊັນມຸນນາວ່າ: “ຄົນທີ່ພວກເຈົ້າຂ້າຢູ່ພູຕາໂບມີຮູບຮ່າງໜ້າຕາເປັນແນວໃດ?” ພວກເຂົາຕອບວ່າ: “ເຂົາເຈົ້າໜ້າຕາຄ້າຍໆຄືກັບເຈົ້າ ແຕ່ລະຄົນກໍເບິ່ງຄືກັບເປັນລູກຊາຍຂອງກະສັດ.” 19 ລາວບອກພວກເຂົາວ່າ: “ພວກເຈົ້າຮູ້ບໍວ່າເຂົາເຈົ້າເປັນອ້າຍນ້ອງຂອງຂ້ອຍ ເປັນລູກຂອງແມ່ຂ້ອຍ. ຂ້ອຍຂໍສາບານໃນຊື່ຂອງພະເຢໂຫວາພະເຈົ້າຜູ້ມີຊີວິດຢູ່ວ່າ ຖ້າພວກເຈົ້າບໍ່ໄດ້ຂ້າເຂົາເຈົ້າ ຂ້ອຍກໍຊິບໍ່ຂ້າພວກເຈົ້າ.” 20 ແລ້ວກີເດໂອນກໍເວົ້າກັບເຢເທລູກກົກຂອງລາວວ່າ: “ຂ້າພວກມັນສະ.” ແຕ່ເຢເທບໍ່ກ້າຖອດດາບຂ້າພວກນັ້ນ ຍ້ອນອາຍຸຍັງນ້ອຍຢູ່. 21 ເສບາກັບຊັນມຸນນາຈຶ່ງເວົ້າວ່າ: “ໃຫ້ເຈົ້າຫັ້ນມາຂ້າພວກເຮົາ. ຖ້າເຈົ້າເປັນລູກຜູ້ຊາຍກໍມາຂ້າພວກເຮົາເອງເລີຍ.” ແລ້ວກີເດໂອນກໍຂ້າເສບາກັບຊັນມຸນນາ+ ແລະເອົາກີ້ສາຍຄໍທີ່ເປັນຮູບເດືອນ*ທີ່ຢູ່ຄໍອູດຂອງພວກເຂົາໄປນຳ.
22 ຕໍ່ມາ ພວກທະຫານຂອງອິດສະຣາເອນກໍມາເວົ້າກັບກີເດໂອນວ່າ: “ຂໍໃຫ້ເຈົ້າປົກຄອງພວກເຮົາ ແລະກໍຂໍໃຫ້ລູກຫຼານຂອງເຈົ້າປົກຄອງພວກເຮົາຕໍ່ຈາກເຈົ້າ ເພາະເຈົ້າໄດ້ຊ່ວຍພວກເຮົາໃຫ້ລອດຈາກມືຂອງພວກມີດີອານ.”+ 23 ແຕ່ກີເດໂອນບອກເຂົາເຈົ້າວ່າ: “ຂ້ອຍກັບລູກຊາຍຂອງຂ້ອຍຈະບໍ່ປົກຄອງພວກເຈົ້າດອກ. ມີແຕ່ພະເຢໂຫວາຜູ້ດຽວທີ່ຈະປົກຄອງພວກເຈົ້າ.”+ 24 ລາວເວົ້າຕື່ມອີກວ່າ: “ແຕ່ຂ້ອຍຂໍຢ່າງໜຶ່ງຈາກພວກເຈົ້າໄດ້ບໍ? ຂ້ອຍຂໍບ້ວງດັງທີ່ພວກເຈົ້າຍຶດໄດ້ນັ້ນຄົນລະອັນ.” (ຄົນທີ່ພວກອິດສະຣາເອນເອົາຊະນະມີບ້ວງດັງຄຳ ຍ້ອນພວກເຂົາເປັນລູກຫຼານຂອງອິດຊະມາເອນ.)+ 25 ເຂົາເຈົ້າຕອບວ່າ: “ໄດ້ ເອົາໄປໂລດ.” ແລ້ວເຂົາເຈົ້າກໍພືເສື້ອຍາວໂຕໜຶ່ງອອກ ແລະທະຫານທຸກຄົນກໍຖິ້ມບ້ວງດັງຄຳໃສ່ເສື້ອນັ້ນ. 26 ບ້ວງດັງຄຳທີ່ກີເດໂອນໄດ້ມີນ້ຳໜັກ 1.700 ເຊເກນ.* ໃນນີ້ບໍ່ໄດ້ລວມເຖິງກີ້ສາຍຄໍຮູບເດືອນ ຕຸ້ມຫູຍອຍ ແລະເສື້ອຄຸມຂອງກະສັດຂອງພວກມີດີອານກັບສາຍຄໍຢູ່ຄໍອູດ.+
27 ກີເດໂອນເອົາຄຳເຫຼົ່ານັ້ນໄປເຮັດເປັນເອໂຟດ+ແລະເອົາໄປຕັ້ງໄວ້ຢູ່ເມືອງໂອຟຣາ+ທີ່ລາວຢູ່. ພວກອິດສະຣາເອນໄດ້ນະມັດສະການເອໂຟດຄືກັບຮູບບູຊາ*ຢູ່ຫັ້ນ.+ ສິ່ງທີ່ກີເດໂອນເຮັດກາຍເປັນບັນຫາສຳລັບລາວກັບຄອບຄົວຂອງລາວ.+
28 ພວກອິດສະຣາເອນເອົາຊະນະພວກມີດີອານໄດ້+ ແລະພວກມີດີອານກໍບໍ່ກ້າມາໂຈມຕີພວກອິດສະຣາເອນອີກເລີຍ. ໃນສະໄໝຂອງກີເດໂອນແຜ່ນດິນມີຄວາມສະຫງົບສຸກ 40 ປີ.+
29 ແລ້ວເຢຣຸບບາອານ*+ລູກຊາຍຂອງໂຢອາດກໍກັບເມືອເຮືອນຂອງໂຕເອງ.
30 ກີເດໂອນມີລູກຊາຍ 70 ຄົນ ຍ້ອນລາວມີເມຍຫຼາຍຄົນ. 31 ເມຍນ້ອຍຂອງລາວທີ່ຢູ່ເມືອງເຊເຄັມໄດ້ລູກຊາຍຄົນໜຶ່ງ. ລາວຕັ້ງຊື່ໃຫ້ວ່າອາບີເມເລັກ.+ 32 ກີເດໂອນລູກຊາຍຂອງໂຢອາດຕາຍຕອນທີ່ອາຍຸຫຼາຍແລ້ວ. ລາວຖືກຝັງໄວ້ຢູ່ບ່ອນຝັງສົບຂອງໂຢອາດພໍ່ຂອງລາວໃນເມືອງໂອຟຣາ ເຊິ່ງເປັນເມືອງຂອງລູກຫຼານອາບີເອຊາ.+
33 ຫຼັງຈາກກີເດໂອນຕາຍ ພວກອິດສະຣາເອນກໍໄປນະມັດສະການພະບາອານ.*+ ເຂົາເຈົ້າໄດ້ຕັ້ງພະບາອານເບຣິດເປັນພະເຈົ້າຂອງເຂົາເຈົ້າ.+ 34 ພວກອິດສະຣາເອນລືມພະເຢໂຫວາພະເຈົ້າຜູ້ທີ່ຊ່ວຍເຂົາເຈົ້າ+ໃຫ້ລອດຈາກມືຂອງພວກສັດຕູທີ່ຢູ່ອ້ອມຂ້າງ.+ 35 ເຂົາເຈົ້າບໍ່ໄດ້ສະແດງຄວາມຮັກທີ່ໝັ້ນຄົງຕໍ່ຄອບຄົວເຢຣຸບບາອານຫຼືກີເດໂອນສຳລັບສິ່ງດີໆທີ່ລາວໄດ້ເຮັດເພື່ອພວກອິດສະຣາເອນ.+