ຈົດໝາຍຂອງຢາໂກໂບ
4 ແມ່ນຫຍັງເຮັດໃຫ້ພວກເຈົ້າຕໍ່ສູ້ແລະຜິດຖຽງກັນ? ກໍຍ້ອນໃນໂຕພວກເຈົ້າມີຄວາມຕ້ອງການຂອງຮ່າງກາຍທີ່ມີບາບຄວບຄຸມຢູ່ແມ່ນບໍ?+ 2 ພວກເຈົ້າຢາກໄດ້ຫຼາຍຢ່າງແຕ່ພັດບໍ່ໄດ້. ພວກເຈົ້າຊັງກັນ*ແລະໂລບມາກຢູ່ ແຕ່ກໍຍັງບໍ່ໄດ້ຕາມທີ່ຕ້ອງການ ພວກເຈົ້າຈຶ່ງຜິດຖຽງກັນແລະຍັງຕໍ່ສູ້ກັນ.+ ພວກເຈົ້າບໍ່ໄດ້ຕາມທີ່ຕ້ອງການກໍຍ້ອນບໍ່ໄດ້ຂໍຈາກພະເຈົ້າ. 3 ແຕ່ພວກເຈົ້າຂໍແລ້ວຍັງບໍ່ໄດ້ ກໍຍ້ອນພວກເຈົ້າຂໍດ້ວຍເຈຕະນາທີ່ຜິດໆເພື່ອໃຫ້ໄດ້ຕາມຄວາມຕ້ອງການຂອງຮ່າງກາຍທີ່ມີບາບ.
4 ຄົນບໍ່ສັດຊື່* ພວກເຈົ້າບໍ່ຮູ້ບໍວ່າ ຖ້າເປັນໝູ່ກັບໂລກກໍສ່ຳກັບເປັນສັດຕູກັບພະເຈົ້າ? ດັ່ງນັ້ນ ຄົນທີ່ຢາກເປັນໝູ່ກັບໂລກກໍເປັນສັດຕູກັບພະເຈົ້າ.+ 5 ພວກເຈົ້າຄິດວ່າພະຄຳພີຂຽນໄວ້ຫຼິ້ນໆບໍທີ່ວ່າ: “ຄວາມອິດສາທີ່ຝັງຢູ່ໃນໃຈພວກເຮົາເຮັດໃຫ້ພວກເຮົາຢາກໄດ້ນັ້ນຢາກໄດ້ນີ້ແບບບໍ່ຮູ້ຈັກພໍ”?+ 6 ແຕ່ຄວາມກະລຸນາທີ່ຍິ່ງໃຫຍ່ຈາກພະເຈົ້າຊ່ວຍພວກເຮົາໃຫ້ເອົາຊະນະຄວາມຮູ້ສຶກແບບນັ້ນໄດ້. ພະຄຳພີບອກວ່າ: “ພະເຈົ້າຊັງຄົນຍິ່ງ+ ແຕ່ເພິ່ນສະແດງຄວາມກະລຸນາທີ່ຍິ່ງໃຫຍ່ຕໍ່ຄົນຖ່ອມ.”+
7 ໃຫ້ພວກເຈົ້າເຊື່ອຟັງພະເຈົ້າ+ ແຕ່ໃຫ້ຕໍ່ຕ້ານມານຮ້າຍ+ ແລ້ວມັນຈະໜີໄປຈາກພວກເຈົ້າ.+ 8 ໃຫ້ໃກ້ຊິດກັບພະເຈົ້າ ແລ້ວເພິ່ນຈະໃກ້ຊິດກັບພວກເຈົ້າ.+ ພວກເຈົ້າທີ່ເປັນຄົນບາບ ໃຫ້ເຮັດໃຫ້ໂຕເອງສະອາດໂດຍເຊົາເຮັດຊົ່ວ+ ແລະພວກເຈົ້າທີ່ມັກລັງເລ ໃຫ້ເຮັດໃຫ້ໃຈໂຕເອງສະອາດ.+ 9 ໃຫ້ພວກເຈົ້າໂສກເສົ້າແລະຮ້ອງໄຫ້.+ ໃຫ້ພວກເຈົ້າປ່ຽນສຽງຫົວເປັນສຽງຮ້ອງໄຫ້ ແລະໃຫ້ປ່ຽນຄວາມມ່ວນຊື່ນເປັນຄວາມໂສກເສົ້າ. 10 ໃຫ້ຖ່ອມໂຕຕໍ່ໜ້າພະເຢໂຫວາ*+ ແລ້ວເພິ່ນຈະໃຫ້ກຽດພວກເຈົ້າ.+
11 ພີ່ນ້ອງເອີ້ຍ ເຊົາເວົ້າແນວບໍ່ດີໃຫ້ກັນ.+ ຄົນທີ່ເວົ້າແນວບໍ່ດີຫຼືຕັດສິນພີ່ນ້ອງກໍຕຳໜິແລະຕັດສິນກົດໝາຍ* ແລະຖ້າພວກເຈົ້າຕັດສິນກົດໝາຍ ພວກເຈົ້າກໍຕັ້ງໂຕເອງເປັນຜູ້ຕັດສິນ ບໍ່ແມ່ນເປັນຜູ້ເຮັດຕາມກົດໝາຍ. 12 ທີ່ຈິງ ມີແຕ່ຜູ້ດຽວເທົ່ານັ້ນທີ່ເປັນທັງຜູ້ຕັ້ງກົດໝາຍແລະຜູ້ຕັດສິນ.+ ເພິ່ນມີອຳນາດທີ່ຈະຊ່ວຍໃຫ້ລອດຫຼືຈະທຳລາຍກໍໄດ້.+ ແລ້ວເຈົ້າແມ່ນໃຜຈຶ່ງຈະຕັດສິນຄົນອື່ນ?+
13 ພວກເຈົ້າບາງຄົນມັກເວົ້າວ່າ: “ບໍ່ມື້ນີ້ກະມື້ອື່ນ ພວກເຮົາຈະຍ້າຍໄປເມືອງໜຶ່ງ ແລ້ວຈະຢູ່ຫັ້ນຈັກປີໜຶ່ງເພື່ອຄ້າຂາຍໃຫ້ໄດ້ກຳໄລ.”+ 14 ແຕ່ພວກເຈົ້າກໍບໍ່ຮູ້ວ່າມື້ອື່ນຊິເປັນແນວໃດ+ ຍ້ອນພວກເຈົ້າເປັນຄືກັບນ້ຳໝອກທີ່ຢູ່ແຕ່ບຶດດຽວແລ້ວກໍຫາຍໄປ.+ 15 ພວກເຈົ້າຄວນຈະເວົ້າວ່າ: “ຖ້າພະເຢໂຫວາ*ຕ້ອງການ+ ພວກເຮົາກໍຈະມີຊີວິດຢູ່ແລະເຮັດສິ່ງນັ້ນສິ່ງນີ້ໄດ້.” 16 ແຕ່ພວກເຈົ້າພັດຈອງຫອງແລະໂອ້ອວດ. ຖ້າພວກເຈົ້າເຮັດແບບນັ້ນ ພວກເຈົ້າກໍເຮັດຊົ່ວ. 17 ດັ່ງນັ້ນ ຖ້າຜູ້ໃດຮູ້ວ່າສິ່ງໃດຖືກຕ້ອງ ແຕ່ບໍ່ໄດ້ເຮັດ ລາວກໍເຮັດຜິດ.+