ຈົດເຊັນບັນຊີ
21 ເມື່ອກະສັດຂອງຄົນການາອານທີ່ປົກຄອງເມືອງອາຣັດ+ທີ່ຢູ່ເນເກັບ*ໄດ້ຍິນວ່າພວກອິດສະຣາເອນເດີນທາງມາຕາມເສັ້ນທາງອາທາຣີມ ລາວກໍມາໂຈມຕີເຂົາເຈົ້າແລະຈັບບາງຄົນໄປເປັນຊະເລີຍ. 2 ພວກອິດສະຣາເອນກໍເລີຍເຮັດສັນຍາກັບພະເຢໂຫວາວ່າ: “ຖ້າພະອົງຊ່ວຍພວກເຮົາໃຫ້ຊະນະຄົນພວກນີ້ ພວກເຮົາຊິທຳລາຍເມືອງຕ່າງໆຂອງພວກເຂົາບໍ່ໃຫ້ເຫຼືອ.” 3 ພະເຢໂຫວາກໍຟັງຄຳທີ່ເຂົາເຈົ້າຂໍ ແລະຊ່ວຍເຂົາເຈົ້າໃຫ້ເອົາຊະນະພວກການາອານ. ພວກອິດສະຣາເອນໄດ້ຂ້າພວກການາອານ ແລະທຳລາຍເມືອງຕ່າງໆຂອງພວກເຂົາຈົນບໍ່ເຫຼືອ. ຍ້ອນແນວນີ້ ບ່ອນນັ້ນຈຶ່ງຖືກເອີ້ນວ່າໂຮມາ.*+
4 ພວກອິດສະຣາເອນເດີນທາງອອກຈາກພູໂຮເຣ+ໂດຍໃຊ້ເສັ້ນທາງທີ່ຈະໄປທະເລແດງ ເພື່ອຊິບໍ່ຕ້ອງຜ່ານແຜ່ນດິນເອໂດມ.+ ຕອນນັ້ນ ເຂົາເຈົ້າພາກັນເມື່ອຍຫຼາຍ. 5 ພວກປະຊາຊົນກໍຈົ່ມໃຫ້ພະເຈົ້າກັບໂມເຊ+ວ່າ: “ເຈົ້າພາພວກເຮົາອອກມາຈາກເອຢິບ ແລະໃຫ້ພວກເຮົາມາຕາຍຢູ່ບ່ອນກັນດານນີ້ເຮັດຫຍັງ? ຢູ່ນີ້ບໍ່ມີເຂົ້າບໍ່ມີນ້ຳ+ ແລະພວກເຮົາເບື່ອມານານີ້ຊິຕາຍຢູ່ແລ້ວ.”+ 6 ພະເຢໂຫວາກໍເລີຍໃຫ້ງູພິດບັກຫຼາຍໆໂຕມາຕອດເຂົາເຈົ້າ. ພວກອິດສະຣາເອນຫຼາຍຄົນໄດ້ຕາຍຢູ່ຫັ້ນ.+
7 ປະຊາຊົນຈຶ່ງມາເວົ້າກັບໂມເຊວ່າ: “ພວກເຮົາເຮັດຜິດໄປແລ້ວ ເພາະພວກເຮົາໄດ້ຈົ່ມໃຫ້ພະເຢໂຫວາ ແລະຈົ່ມໃຫ້ເຈົ້ານຳ.+ ຂໍເຈົ້າຊ່ວຍຂໍພະເຢໂຫວາເຮັດໃຫ້ງູພວກນີ້ໜີໄປຈາກພວກເຮົາແດ່.” ແລ້ວໂມເຊກໍໄດ້ອະທິດຖານເພື່ອເຂົາເຈົ້າ.+ 8 ພະເຢໂຫວາບອກໂມເຊວ່າ: “ໃຫ້ຫຼໍ່ຮູບງູພິດໂຕໜຶ່ງ ແລ້ວເອົາໄປກ້ຽວໃສ່ເສົາ. ຖ້າຜູ້ໃດຖືກງູຕອດແລ້ວຫຼຽວເບິ່ງງູໂຕນີ້ ຜູ້ນັ້ນກະຊິບໍ່ຕາຍ.” 9 ແລ້ວໂມເຊກໍເອົາທອງແດງມາເຮັດເປັນງູ+ ແລະກ້ຽວໃສ່ເສົາ.+ ເມື່ອຄົນທີ່ຖືກງູຕອດແນມເບິ່ງງູທອງແດງນັ້ນ ເຂົາເຈົ້າກໍບໍ່ຕາຍ.+
10 ຈາກນັ້ນ ພວກອິດສະຣາເອນກໍເດີນທາງໄປທີ່ໂອໂບດ+ ແລະຕັ້ງຄ້າຍພັກຢູ່ຫັ້ນ. 11 ຕໍ່ມາ ເຂົາເຈົ້າເດີນທາງອອກຈາກໂອໂບດ ແລະໄປຕັ້ງຄ້າຍພັກຢູ່ທີ່ອີເຢອາບາຣີມ+ ເຊິ່ງເປັນບ່ອນກັນດານທີ່ຢູ່ທາງທິດຕາເວັນອອກຂອງໂມອາບ 12 ແລ້ວເຂົາເຈົ້າກໍເດີນທາງອອກຈາກບ່ອນນັ້ນໄປຕັ້ງຄ້າຍພັກຢູ່ທີ່ຮ່ອມພູ*ເຊເຣັດ.+ 13 ຈາກບ່ອນນັ້ນ ເຂົາເຈົ້າເດີນທາງອອກໄປຕັ້ງຄ້າຍພັກຢູ່ຮ່ອມພູ*ອາໂນນ.+ ຮ່ອມພູນັ້ນຢູ່ສຸດເຂດຂອງບ່ອນກັນດານທີ່ຕິດກັບເຂດແດນຂອງພວກອາໂມ. ບ່ອນກັນດານນີ້ຢູ່ລະຫວ່າງເຂດຂອງພວກໂມອາບກັບພວກອາໂມ. 14 ຍ້ອນແນວນັ້ນ ປຶ້ມທີ່ຊື່ສົງຄາມຂອງພະເຢໂຫວາກໍເລີຍເວົ້າເຖິງ “ວາເຮັບທີ່ຢູ່ໃນຊູຟາກັບຮ່ອມພູອາໂນນ 15 ເຊີ່ງມີແມ່ນ້ຳໄຫຼອອກມາຈາກທັງສອງບ່ອນມາລວມກັນ ແລ້ວກໍໄຫຼໄປທາງເມືອງອາຣະ ແລະໄຫຼໄປຕາມຊາຍແດນຂອງເຂດພວກໂມອາບ.”
16 ຈາກນັ້ນ ພວກອິດສະຣາເອນກໍມາຮອດເບເອ. ຢູ່ບ່ອນນັ້ນມີນ້ຳສ້າງ ແລະພະເຢໂຫວາໄດ້ບອກໂມເຊວ່າ: “ໃຫ້ທຸກຄົນມາລວມໂຕກັນ ເຮົາຊິເອົານ້ຳໃຫ້ເຂົາເຈົ້າ.”
17 ຕອນນັ້ນ ພວກອິດສະຣາເອນພາກັນຮ້ອງເພງວ່າ:
“ນ້ຳສ້າງເອີ້ຍ ໃຫ້ນ້ຳອອກມາເດີ້! ມາເລີຍ ມາຊ່ວຍກັນຮ້ອງເພງ!
18 ພວກເຈົ້ານາຍແລະຄົນທີ່ມີນ້ຳໃຈເປັນຄົນຂຸດນ້ຳສ້າງນີ້.
ເຂົາເຈົ້າໃຊ້ຄ້ອນຂອງພວກເຈົ້ານາຍແລະໄມ້ຄ້ອນເທົ້າຂອງໂຕເອງຂຸດນ້ຳສ້າງນີ້.”
ແລ້ວເຂົາເຈົ້າກໍອອກເດີນທາງຈາກບ່ອນກັນດານນີ້ໄປມັດຕານາ. 19 ຈາກມັດຕານາເຂົາເຈົ້າເດີນທາງໄປນາຮາລີເອນ. ຈາກນາຮາລີເອນເຂົາເຈົ້າກໍເດີນທາງໄປບາໂມດ.+ 20 ແລ້ວເຂົາເຈົ້າກໍເດີນທາງອອກຈາກບາໂມດໄປເຂດຮ່ອມພູຂອງໂມອາບ+ ເຊິ່ງຢູ່ໃກ້ປິຊະກາ+ບ່ອນທີ່ແນມເຫັນເຢຊີໂມນ.*+
21 ພວກອິດສະຣາເອນໄດ້ສົ່ງຄົນໄປບອກສີໂຮນກະສັດຂອງພວກອາໂມວ່າ:+ 22 “ພວກເຮົາຂໍຜ່ານແຜ່ນດິນຂອງທ່ານໄດ້ບໍ? ພວກເຮົາຊິບໍ່ຍ່າງຜ່າໄຮ່ນາຫຼືສວນໝາກລະແຊັງ ແລະຊິບໍ່ກິນນ້ຳຢູ່ນ້ຳສ້າງຂອງພວກທ່ານດອກ. ພວກເຮົາຊິໄປຕາມເສັ້ນທາງຫຼັກເທົ່ານັ້ນຈົນຜ່ານເຂດແດນຂອງທ່ານໄປ.”+ 23 ແຕ່ສີໂຮນບໍ່ຍອມໃຫ້ພວກອິດສະຣາເອນຜ່ານເຂດຂອງລາວ. ລາວລວບລວມຄົນຂອງລາວອອກມາເຈິພວກອິດສະຣາເອນຢູ່ບ່ອນກັນດານ ແລະໄດ້ຕໍ່ສູ້ກັບພວກອິດສະຣາເອນຢູ່ຢາຮາດ.+ 24 ແຕ່ພວກອິດສະຣາເອນໄດ້ຂ້າສີໂຮນ+ ແລະໄດ້ຍຶດແຜ່ນດິນຂອງລາວ+ຕັ້ງແຕ່ຮ່ອມພູອາໂນນ+ໄປຈົນຮອດຢັບໂບກ+ທີ່ຢູ່ໃກ້ໆພວກອຳໂມນ ແຕ່ບໍ່ກາຍເມືອງຢາເຊ+ ຍ້ອນເມືອງນີ້ຢູ່ຕິດກັບເຂດແດນຂອງພວກອຳໂມນ.+
25 ພວກອິດສະຣາເອນໄດ້ຍຶດເອົາເມືອງຕ່າງໆ ແລະເຂົ້າໄປອາໄສຢູ່ໃນເມືອງເຫຼົ່ານັ້ນທີ່ເປັນຂອງຄົນອາໂມ.+ ເຂົາເຈົ້າໄດ້ຍຶດເມືອງເຮັດຊະໂບນແລະເມືອງຕ່າງໆທີ່ຢູ່ອ້ອມເມືອງນັ້ນ 26 ເພາະເມືອງເຮັດຊະໂບນເປັນເມືອງຂອງສີໂຮນກະສັດຂອງຄົນອາໂມ. ສີໂຮນເຄີຍຕໍ່ສູ້ກັບກະສັດໂມອາບ ແລະໄດ້ຍຶດເອົາແຜ່ນດິນຂອງກະສັດໂມອາບໄປຈົນຮອດຮ່ອມພູອາໂນນ. 27 ຍ້ອນແນວນີ້ຜູ້ຄົນຈຶ່ງມັກເວົ້າຄຳກອນຕໍ່ໄປນີ້ເພື່ອເຍາະເຍີ້ຍຄົນອື່ນ:
“ລອງມາເຮັດຊະໂບນເບິ່ງແມ້.
ລອງມາສ້າງເມືອງຂອງສີໂຮນຂຶ້ນໃໝ່ໃຫ້ມັນເຂັ້ມແຂງເບິ່ງດຸ.
28 ໄຟອອກມາຈາກເຮັດຊະໂບນ ແລະແປວໄຟອອກມາຈາກເມືອງຂອງສີໂຮນ.
ໄຟໄດ້ໄໝ້ເມືອງອາຣະຂອງໂມອາບ ແລະເຜົາພວກເຈົ້ານາຍໃນບ່ອນສູງຂອງອາໂນນ.
29 ພວກໂມອາບເອີ້ຍ ພວກເຈົ້າຈິບຫາຍແລ້ວ! ຄົນຂອງພະເຄມົດ+ເອີ້ຍ ພວກເຈົ້າຈະຕ້ອງຖືກທຳລາຍ!
ພະເຄມົດຈະເຮັດໃຫ້ລູກຊາຍຂອງໂຕເອງບໍ່ມີບ່ອນຢູ່ ແລະສີໂຮນກະສັດຂອງພວກອາໂມຈະຈັບລູກສາວຂອງລາວໄປເປັນຊະເລີຍ.
30 ໃຫ້ເຮົາຍິງໃສ່ພວກເຂົາ.
ເຮົາຊິທຳລາຍເຮັດຊະໂບນໄປຈົນຮອດດີໂບນ+
ເຮົາຊິທຳລາຍທັງໝົດໄປຈົນຮອດໂນຟາ
ເຮົາຊິຈູດໄຟໃຫ້ລາມໄປຈົນຮອດເມເດບາ.”+
31 ຕອນນີ້ ພວກອິດສະຣາເອນໄດ້ເຂົ້າໄປອາໄສຢູ່ໃນແຜ່ນດິນຂອງພວກອາໂມ. 32 ໂມເຊໄດ້ສົ່ງຄົນໄປສອດແນມເມືອງຢາເຊ.+ ພວກອິດສະຣາເອນໄດ້ຍຶດເມືອງຕ່າງໆທີ່ຢູ່ອ້ອມເມືອງນັ້ນ ແລະໄດ້ໄລ່ຄົນອາໂມທີ່ຢູ່ໃນເມືອງນັ້ນອອກໄປ. 33 ຫຼັງຈາກນັ້ນ ເຂົາເຈົ້າກໍອອກເດີນທາງໄປຕາມເສັ້ນທາງບາຊານ. ແຕ່ໂອກ+ກະສັດຂອງບາຊານກັບຄົນຂອງລາວໄດ້ອອກມາຕໍ່ສູ້ກັບພວກອິດສະຣາເອນຢູ່ເອັດເຣອີ.+ 34 ພະເຢໂຫວາບອກໂມເຊວ່າ: “ຢ່າຊູ່ຢ້ານລາວ.+ ເຮົາຈະມອບລາວ ຄົນຂອງລາວ ແລະແຜ່ນດິນຂອງລາວໃຫ້ກັບເຈົ້າ.+ ເຈົ້າຈະຈັດການລາວຄືກັບທີ່ເຄີຍຈັດການສີໂຮນກະສັດຂອງຄົນອາໂມທີ່ຢູ່ເມືອງເຮັດຊະໂບນ.”+ 35 ພວກອິດສະຣາເອນໄດ້ຂ້າຄົນພວກນັ້ນໝົດທຸກຄົນຈົນບໍ່ເຫຼືອ.+ ເຂົາເຈົ້າໄດ້ຂ້າກະສັດກັບພວກລູກຂອງລາວແລະທະຫານຂອງລາວ ແລະໄດ້ຍຶດເອົາແຜ່ນດິນຂອງລາວ.+